۩ أكاديمية الفينيق ۩

۩ أكاديمية الفينيق ۩ (http://www.fonxe.net/vb/index.php)
-   ♞صَهيــــــــــلْ (http://www.fonxe.net/vb/forumdisplay.php?f=5)
-   -   يُحكى أنَّ ..! (http://www.fonxe.net/vb/showthread.php?t=42351)

د. نديم حسين 18-04-2013 10:33 AM

يُحكى أنَّ ..!
 
يُحكـى أنَّ ...!

د. نديم حسين

يُحكـى ويُحكـى
إنُّـه فـي تُوشكـى
الرَّملِ اتحَضَّرْ .
قَلع الأصفَرْ ، لِبسِ الأخضَرْ ، ورياحُه ما بَقتشِ تصَفَّرْ .
جاب الصَّحرا لروضِةْ قَلبُه وفَتَح الفَصلِ وعلِّمْ شَمسُه تنوَّر أكتَرْ .
وِسكوتُه بقى يِحكي ويِسهَرْ .
ويَّا الميَّه ، ويَّا الصُّحبَه اللي بتِمشي وخَطاويها تخضَّرْ !

****

يُحكـى ويُحكـى
إنُّه في توشكى النَّخل عساكِرْ
تِرمي السِّلـْم وتَمر الحب في كفِّ العَسكَرْ .
وانِّ الدبابه والمدفع
تِهدي وتِرفَعْ
للقمحايَه بشايِرْ سُكَّرْ .
والمستقبَل رغم همومُه ، كلِّ شويَّه بييجي يشَقَّرْ .
والإنجاز يِرفَع تقاريرُه
مش رقصِة زيبَق على مَرمَرْ .
لكنْ جِـدِّ وجَـدِّ و" شُفنا " ،
مش " قالوا " و " قُلنا " .. ومش أكتَرْ .
فيه ناس ياما بتعشَق مَصرْ .
وفيه ناس ما تحِبِّش تتعمَّرْ .
فيه ناس كافرَه تحبِّ تكَفَّرْ .
فيه شِلـَّه بتِقبَض من بَرَّه ، وجُوَّه بحَجمِ الدَّفعِ تدَمَّرْ .
لكن مصر الحلوه الهاديَه .. لمـَّا تكَشَّرْ .. يِبقى تكَشَّرْ .
فيه جيش أوَّل .. تاني وتالِتْ ،
فيه جيش رابِع جُوه الريف وجوَّه البَندَرْ .
أعتى وأخطَرْ .
زِند يقَدم ليها ورودُه .. نِسمَع : تُشكَرْ !
زند وما بيعرفش حدودُه .. تِقدَر تِكسَرْ .
ولمَّا بتِضحك ، يِضحك كل الكون ويَّاها .. ولمَّا تكَشَّرْ
أعاديها بتوقَف .. تتسَمَّرْ .
هيه تخَضَّر والمِتنيِّل ييجي يصَحَّرْ .
ده المتنيِّل صحرا بتزحف على سنابلها وعلى مصانعها وعلى متاحفها
وعلى شوارعها وعلى مفاهيم العصر الأخضَرْ .
حاجَه تغيظ الغيظ .. تحيَّرْ .
في تلاته وعشرين من يوليه
حاربِت مصر بشرف وعِزَّهْ .
قاموا الفَرعونجيه اياهم حاربو " جمال " .
سرقوا الروح ونهبوا المالْ .
قالت مصر :
بعد الحرب وبعد السِّلم حنبقى نعَمَّرْ .
قامت ذات الشلـَّه الخاينه ، بتقبَض بَرَّه ، وجوه بحجم الدفعه تدمَّرْ .
أول مره وتاني وتالِت ،
والله يا خويَه ده حاجه تحَيَّرْ .
لكن مصر الحلوه الهاديه .. لمـَّا تقَرَّرْ يِبقى تقَرَّرْ .
مصر النيل والمكن الدايِرْ .
مصر تاريخ بينادي الحاضِرْ :
قوم من رمل الصحرا وشَمَّرْ .
مصر ولادها كتار وأكابِرْ .
لمـَّا في عيد الأم يجيبُم لحم زنودهم أغلى هديَّه ،
حتِقرا الأم في نَصِّ المَحضَرْ :
يُحكـى ويُحكـى
إنُّه في توشكى
مصر بتتذوَّق للجَيّ .
تِحلى وتِعلى وتِملى وتِكبَرْ .
مصر في يوم العزِّ بتِزأَرْ .
لا بتِستعطي " الباب العالي " ، ولا تِقبَل فَرَمان من خنجَرْ .
مصر الحره مشيئِة باري الخلق الأكبَرْ .
وانا مؤمن بالرب الحارسْ ، والمحروسه بروح الأزهَرْ .

****

يُحكـى ويُحكـى
إنـُّه فـي مَـكَّـهْ
شافو حمايم بيضَه وآيـَّه ، وشافو ملايكـَّهْ
سِمعُم أشرف خلق الله بيقول لِصحابُهْ :
شَرف الدينِ وشرف الأمـَّهْ ده غايَه ورايَه وثوره .. وأكتَرْ .
والغايَه محتاجَه لسِكـَّهْ .
ومصر الحره الغاليه العاليه ، هيـَّهْ السِكـَّهْ .
ومهما حيُحكـى ويُحكـى ويُحكـى ..
هيـَّه القايِلْ .. هيـَّه القول .. وهيـَّه المنبَرْ !.


الساعة الآن 01:37 AM.

Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لأكاديمية الفينيق للأدب العربي
يرجى الإشارة إلى الأكاديمية في حالة النقل
الآراء المنشورة في الموقع لا تعبر بالضرورة عن رأي الإدارة بل تمثل وجهة نظر كاتبها فقط