۩ أكاديمية الفينيق ۩

۩ أكاديمية الفينيق ۩ (http://www.fonxe.net/vb/index.php)
-   ⊱ مَطْويّات⊰ (http://www.fonxe.net/vb/forumdisplay.php?f=126)
-   -   العم حسين (http://www.fonxe.net/vb/showthread.php?t=72891)

جمال نصير 28-01-2019 09:16 PM

العم حسين
 
أصدقائي الكرام
عارف إنكم مابتحبوش الكلام والرغي الكتير وخصوصا في القصائد الشعرية
بس أعمل أيه دى طبيعتي فى الكتابة
إستحملوا فالقصيدة تستاهل
تحكى عن قصة حدثت في كل بيت مصري ومازالت تحدث
..........................
العم حسين..
زى الملايين..
فلاح كان عايش بين حلمين
كان عنده يادوبك م الدنيا
أجمل ولدين
رباهم من عرقه وجهده
من نفس الأرض.. ونفس المية ..
و نفس الطين
*****
نبت القلبين
الاول عاقل وبيفهم ف أمور الدين
والتاني بيفهم ف الدنيا.. له عقل رزين
يعني الاتنين
مساكين – عاقلين- !!
*****
كبر الولدين
وإتربوا ف أمن ودعا والدين
الاول دخل الجيش...( مسكين)
والتاني مدرس ..كان واعي
والوعى ف وسط الجهل سلاح...
من غير حدين
الأول كان مغلوب على أمره بحكم الجيش
الطاعة دي واجب..بس الطاعة هتبقى لمين..؟
بيشوف القهر وبيوطيله عشان مخنوق...
مغصوب العين
والتاني بحكم المهنة...بيفهم ف الجاهلين
بلسانة بيقدر يتكلم
وبيقدر يرفع راسه لفوق
كان فاكر نفسه من العايشين
****
وف يوم الشعب النايم قام...معرفش إزاى
قالوا ثورة ولكن ..ثورة إزاى..؟
الشعب ماهوش واخد أبداً ع الثورات
بينام متكتف بين الهم...وبين الظلم...
وبيصحى يعافر بين أموات
والنفس الطالع منه...أهات
بيحارب لجل يلاقي اللقمة بدون إهانات
ف الآخر حس بطعم المر ف كل مكان
تقريبا - حس - بإن العيشة دى سجن كبير..
والسجن بيزحف على الطرقات
*****
قام عم حسين شمر دراعاته وقال ثوار
يانموت بكرامة يا إما نعيش عيشة الأحرار
ونزل للشارع بولاده
قال ثورة ولازم نحييها...حتى ولو كانت نهايتها
وسط الظلمات
وأخوه الضابط كان ف ثبات
والثورة ف نظرة يادوب...شعارات
معذور و مكلف بحماية كل البهوات
ازاى هيبص على الهفوات..؟!
*****
نزل الأخين...وسط الملايين
ومعاهم نزل الناس تايهين
و ملوا الميادين
الأول مأمور من قادته...يقطع ف لسان المتظاهرين
بالذوق..بالعافية..بأيها شئ...
ف الآخر يقضي على الإرهاب..والمتأمرين..!!
ما هو أيها واحد بيفكر يحلم بحياة...
أو يحيي الدين..
يصبح ملعون...عند الملاعين
والتاني بيهتف بكرامته
وكرامة وطنه ال إتهانت...بين الفاسدين
ومصمم يرجع إما ببلده أو بشهاته
أو حتى يحقق حلم الكل ( المصريين)
*****
والدايرة تدور بين جر وفر
والشر بيبحث بين أشلاء الناس ف الحر
وقف الآخين قدام بعضيهم بالوشين
بس القلبين..خجلانة تبص على الأخين
وتالتهم كان كل الشياطين
والضابط أعمى و كان مش شايف غير...كام حرف
((الجيش والقادة ..وأمن السادة - صحاب الوطن - البنى أدمين))
وحسين كان شايف بعيون تانية ...يادوب سطرين
(( الجيش والقادة كأى مواطن له وعليه ))
(( والعدل دا خط ولازم كل الخلق تمشي بحرص عليه))
وعملها حسن...وقتل ف حسين
علشان ف بلاد الجهل يادوب بتلاقي حاجتين...
(( القوة أساس المتخانقين ))
((والعقل مكانة يادوب ف رجول المتنازعين))
******
ودى أخرة حكم ركبنا سنين
دوّقنا الجهل ومر الفقر وقُصر العين
والشعب المصري صبح صنفين
الأول عبد لناس تافهين
بيخاف على سادة ويحميهم حتى ولو كانوا مين
والتاني محافظ على وطنه
سموه إرهابي ومش م الدين
*****
هل ينفع نقلع طرح الارض
ويغور العرض...!!
هل ينفع نغسل جسم الاخوة بدم حرام
ونقول دا سلام..؟
حتى ولو كان السلم توطى لخلق لئام؟؟
هل ينفع نقتل حق الناس..وبإسم الفرض..؟؟
طب فين الفرض؟؟
مين عمل الفرض..؟؟
أو أيه الفرض...؟؟
الفرض ياسادة - ف شرع القادة - حقوقهم وخلاص
ويدوسوا على الباقين...وخلاص
لازم ياخدوها بأيها شكل...
بالطول ...والعرض
******
#جمال_نصير
يناير2019

زياد السعودي 29-01-2019 01:12 AM

رد: العم حسين
 
سلام الله
ذي حملة للتواصل مع النصوص
ترشح لكم :

http://www.fonxe.net/vb/showthread.php?t=72871

فثمة اضافة يضفيها التعقيب على النص
شاركونا الحملة كرما
وود

نوال البردويل 29-01-2019 04:36 AM

رد: العم حسين
 
انسياب جميل للحرف أدى غرضه بحرفية
كان الله في عون الشعوب المظلومة المقهورة
كل التقدير أ. جمال
وتحياتي

الزهراء صعيدي 01-02-2019 12:58 AM

رد: العم حسين
 
جميل جداً موسقة النص
جعلت القارئ ينساب فيه كقصة شيقة من قلب الواقع تحمل حكمة و عبرة
دام المداد

جمال نصير 03-02-2019 09:26 PM

رد: العم حسين
 
اقتباس:

المشاركة الأصلية كتبت بواسطة الزهراء صعيدي (المشاركة 1771297)
جميل جداً موسقة النص
جعلت القارئ ينساب فيه كقصة شيقة من قلب الواقع تحمل حكمة و عبرة
دام المداد

الاجمل وجودك يا زهراء...تحية من القلب لشخصك الكريم

جمال نصير 03-02-2019 09:29 PM

رد: العم حسين
 
اقتباس:

المشاركة الأصلية كتبت بواسطة جمال عمران (المشاركة 1770930)
اخى جمال
تعيد إلى أذهاننا مشهد ...مهما كان الرب واحد ليكو رب ولينا رب ...احنا شعب وانتو شعب...وهى الأغنية الأشهر .
النص ليس طويلا بل هو بالكاد يغطى مساحة صغيرة من جانب واقع عشناه جميعا ..فى القرآن الكريم ( اذا التقي الجمعان ) لكن حدث انه ( التقى الشقيقان ) ..فى مواجهة بين مايعتقده كل منهما أنه الحق والصواب .
مودتى

الرائع جمال عمران..
قصة الالم هى الاطول من أى كلام نكتبه...ولكن من يقرأ ومن يشعر سوى الاحرار والحرائر في كل مكان..وكم هم قلة..
وجودك يسعندنا أخى الحبيب

جمال نصير 03-02-2019 09:31 PM

رد: العم حسين
 
اقتباس:

المشاركة الأصلية كتبت بواسطة نوال البردويل (المشاركة 1770925)
انسياب جميل للحرف أدى غرضه بحرفية
كان الله في عون الشعوب المظلومة المقهورة
كل التقدير أ. جمال
وتحياتي

ده من حسن وجمال شاعريتك ورقة أحاسيسك شاعرتنا نوال..شكرا تليق بكم

جمال نصير 03-02-2019 09:32 PM

رد: العم حسين
 
اقتباس:

المشاركة الأصلية كتبت بواسطة زياد السعودي (المشاركة 1770902)
سلام الله
ذي حملة للتواصل مع النصوص
ترشح لكم :

http://www.fonxe.net/vb/showthread.php?t=72871

فثمة اضافة يضفيها التعقيب على النص
شاركونا الحملة كرما
وود

اهلا ومرحبا بكم..تشريف اخى

حكمت البيداري 04-02-2019 07:40 PM

رد: العم حسين
 
الفرض ياسادة - ف شرع القادة - حقوقهم وخلاص
ويدوسوا على الباقين...وخلاص
لازم ياخدوها بأيها شكل...
بالطول ...والعرض
******
#جمال_نصير
يناير2019

اخي جمال نصير
احسنت في حكاية المواطن والوطن والثورة , جميل جداً
كل التقدير


الساعة الآن 05:07 AM.

Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لأكاديمية الفينيق للأدب العربي
يرجى الإشارة إلى الأكاديمية في حالة النقل
الآراء المنشورة في الموقع لا تعبر بالضرورة عن رأي الإدارة بل تمثل وجهة نظر كاتبها فقط