واحنا مالْنـا ؟

- إحنـا مالنا ازَّاي يا خالْنا ؟
إلاَّ مالنا ،
دَحنا مالنا وألف مالنا
دَه الكلام بيخُصِّ بيتنا وشُغلِنا ولُقمِة عِيالنا !

- يا ابنِ والدي ،
دا اللِّي كلنا ، كلنا ييجي ألفِ مرَّهْ
خَد فلوسنا وهَجِّ بَرَّهْ
فَصِّ ملح وداب في جَرَّهْ
عِرَّه حَتقُلِّلي ، أقُلـَّك ألف عِرَّهْ
دا اشتَرى دروبِ الخيانَه وباع أمَلنا
كَل حلاوَه بعَقلِنا ،
في يوم ما كان بيقُلـِّنا أحلى الكلام
هوَّ كِرشُه بتتمِلي وعيالنا بيشِدُّو الحِزام
حدِّ كان يِقدَر يصَدَّق إنُّو يطلَع مُفتَري وواكل حَرامْ ؟

- والله كلنا يا ابن والدي وكَل حَلالنا
بَرَّه بَرَّه
وهَجِّ بَرَّهْ
هوَّ كان يَعني سألنا ؟

- يعني بَرضَك إحنا مالـنا ؟
يَعني راح ننسى وخَلاصْ !
لأه ، في أدينا الخلاصْ ..
نَدلِ زَيُّه يِأدبه صوتِ الرصاصْ
لو نِسيبُه يوم فِ حالُه ، عُمرُه ما يسيبنا في حالنا .
إلاَّ مالـنا !
إحنا ما نبِعشِ الوطن وابنِ الوطن
باستِمارَه وحِلِّتين كوسا ولَبَنْ
دي البَلَد قِصِّة بَدَنْ !
والبَلَد حِتِّة زَمَنْ
أطوِل كتيرِ من الزَّمَنْ
هيه عزة مَجدِنا ومَهدِ الحضارَه
هيه لحن يعلم الناي الشجنْ
كلِّ غاصِب جانا غادِر
راح وغادِر
عارُه والخيبه الكفنْ
طَب يِقوم واحد من اولادِ البَلَد
يفتكر عيشْ الغلابى ملك يـدُّه
والغلابى خدّامينـُه
داحنا نقطع مننا شْمالـُه ويمينـُه
واحنا مالـنا . تقولـِّلي يَعني
دَحنا مالـنا وألف مالـنا !!
مش حنرحَم نَدلِ خانـَّا !
دَه الكلام بيمِسِّ بيتنا ومَصرِنا ولُقمِة عيالنا !