۩ أكاديمية الفينيق ۩ - عرض مشاركة واحدة - إرادتنا صلبة وعزِمْنا حَجَرْ صنِّينْ
عرض مشاركة واحدة
قديم 22-04-2019, 12:39 PM رقم المشاركة : 1
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي إرادتنا صلبة وعزِمْنا حَجَرْ صنِّينْ




إرادتنا صلبة وعزِمْنا حَجَرْ صنِّينْ
***************************************
يا مرسال يااللي رايحْ عَ فْلِسطينْ
سلِّم عَ اللي فيها بَعِدْهُم صامدينْ
بحيفا والناصرة ، عرابة وسخنينْ
باللد والرملة وعكا طولكرم وجنينْ
أمِّ الفحم ويافا بينَادُولْنا وصبَّارينْ
وما نِنْسى الطنطورة وغزة ونِمْرينْ
هادول واللهِ همِّي حارِسها الأمينْ
طبريا بتِستَنَّى الحريِّة هيِّ ونعلينْ
وحاكوراتنا والبيَّارات في كُفر عينْ
قولوا لهُمْ إنَّا كتير،كتيرْ مشتاقينْ
ويشهد الله علينا إنُّو قتَلْنا الحَنينْ
مِ اللَّوعة والهِجران بَعِدنَا سهرانينْ
وإنْ كتَمْنا آلامْنا بيفضَحْنا الأنينْ
صارْ لنا في الغربِة مدِّة صَابرينْ
قالولْنا كُلْها أكَمِّنْ شَهرْ يا لاجئينْ
مرَّتْ الشهورْ وهاي عدَّت السنينْ
لَأيمتى حَنْظَلّ عَ الجَمِر قَابضينْ
وعَ الظلُم والبؤس والمرارة سَاكتينْ
يعْنِي مَكتوبْ علينا نِبقى لاجئينْ
لأ يا سيدي حِنَّا عَالوطَن راجْعينْ
القدُسْ جَريحَة بتْئِنْ ومَعها حِطِّينْ
وَلْكُمْ بقبرُهْ قد تمَلْملْ صَلاح الدِّينْ
وإنتو ياعَرَبْ مثل الجُثَثْ هَامدينْ
مَا في خَواصْ مِنْ العويل والأنينْ
فلسطينْ رح يحرِّرها دمِّ المقاتلينْ
إرادتنا صلبة وعزِمْنا حَجَرْ صنِّينْ
وما بْنِرضَى وطن لنا إلا فلسطينْ
وللوطنْ بالنضال والإيمانْ عائدينْ
رح نحرّركْ من النَّاقورة إلى عبوين
هذا وَعِدْ والنَشَامى ما بيِنْسوا الدَّينْ

د٠محمد طرزان العيق
صوفيا / 17.08.2014






  رد مع اقتباس
/