[عاصم المير]

(عا بلادي مارح عودْ؟!!...
...طبّيلي هالفنجانْ
خبّي الوتر والعودْ...
...والنّاي بالريحانْ)
غافي على كتف النّهِرْ
يمكن سنه...يمكن دهرْ
غنّى لطقّ من القهرْ...
باقي الصدى رجعانْ...:
( يا مّا مويلي هوا...يامّا مويليّا
ضربات الخناجر خَلّت ...شوكتنا محنيّه)
*****************

دَمّكْ عسل متلوتْ...يا خِفِّتو دَمّكْ
شامي عصير التّوتْ...يا روحها لأمّكْ
ومهما انهدّ بيوتْ ... رح ترجع تلمّكْ
من عند ربّا العاصفه جايي
عملت قليل الموت تحلايه
وغطّت حنين الصوت بمْلايه
سمعتُو كأنو سْكُوتْ !
...منّو الصدى رجعانْ
( يا مّا مويلي هوا...يامّا مويليّا
ضربات الخناجر خَلَّت ...شوكتنا محنيّه)
************************

ضعنا يا إمي وضاعت الأحلامْ
مركب هوى ...وشراع حنّيه
كنتِ لأغفى...تنْطريني نامْ
تبوسيلي إيدي ...تزوغ عينيّ
تقوليلي" ماشي الحالْ
لاينشغلّك بالْ
سرّك بعبي مطرحو...وهالسر مابينقالْ"
راسي اللي عمبتدورْ
مش قادر عليها
شفلَك شي طاقة نورْ
تا بوس إجريها
يمكن ألف ناطورْ
شافت بعينيها

ويمكن ألف وشويْ
الغزلان فوق الميْ
شدّو الرحال خطيْ
وشراعهون مِخْفِي
نصّون صبِح غرقانْ
والنصّ عميطفي
هدّو التّعب مطفِي
وهالنص رح يبقى
ونبض القلب بقيانْ
عميعزف الدّ قّه
وبالشام رح يبقى
وكل ال بيحب الشام
عا حبّها بيبقى
ومتل الصدى رجعان...:
" يامّا مويلي هوا...يامّا مويليّا
ضربات الخناجر خلّت...شوكتنا محنيّه"
****************************************