شوفوا الغربة والهجرة شو ساووا فينا - ۩ أكاديمية الفينيق ۩



لِنَعْكِسَ بّياضَنا


« تَحْــليقٌ حَيٌّ وَمُثـــابِر »
         :: الزمن الأخير (آخر رد :حسين محسن الياس)       :: رفيف (آخر رد :صبري الصبري)       :: ،، نهرُ الأحلام ،، (آخر رد :أحلام المصري)       :: صَمَتَ الليل؟ (آخر رد :أحلام المصري)       :: لغة الضاد (آخر رد :عدنان عبد النبي البلداوي)       :: إلى السارق مهند جابر / جهاد دويكات/ قلب.. (آخر رد :أحلام المصري)       :: لنصرة الأقصى ،، لنصرة غزة (آخر رد :محمد داود العونه)       :: السير في ظل الجدار (آخر رد :محمد داود العونه)       :: إجراءات فريق العمل (آخر رد :محمد داود العونه)       :: بــــــــــــلا عُنْوَان / على مدار النبض 💓 (آخر رد :محمد داود العونه)       :: إخــفاق (آخر رد :محمد داود العونه)       :: جبلة (آخر رد :محمد داود العونه)       :: تعـديل (آخر رد :محمد داود العونه)       :: إنه أنـــــــا .. (آخر رد :الفرحان بوعزة)       :: أُمْسِيَّات لُصُوصِيَّة ! (آخر رد :محمد داود العونه)      


العودة   ۩ أكاديمية الفينيق ۩ > ▆ أنا الفينيقُ أولدُ من رَمَادِ.. وفي الْمَلَكُوتِ غِريدٌ وَشَادِ .."عبدالرشيد غربال" ▆ > ⊱ مَطْويّات⊰

⊱ مَطْويّات⊰ للنصوص اللاتفاعلية ..

إضافة رد
 
أدوات الموضوع انواع عرض الموضوع
قديم 22-01-2018, 03:58 AM رقم المشاركة : 1
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي شوفوا الغربة والهجرة شو ساووا فينا


شوفوا الغربة والهجرة شو ساووا فينا!٠٠
**************************************
مقدِّمة لا بدَّ منها
للإنترنت وشبكات التواصل الإجتماعي فضِلْ كبير علينا ، وإللي بينْكِر هالشِّي إمَّا جاحدْ أو جاهل أو بأحسن الأحوال غشيم!٠٠٠ بس وبنفس الوقت فالإنترنتْ متلو ومتِلْ أي وسيلِة لا يخلو من مساوئ ، أو بالأحرى والأصح بإنُّو; أي وسيلة هيِّ بطبيعتها بالعادة بتكون لصالح الإنسان ، و الإنسان هوِّ اللي بيساويها إمَّا وسيلة خير ومنيحة،أو وسيلة شر وسيئة٠٠وبالتأكيد فإنَّ الإعتدال والتوازن والتحكُّم بأهواءنا لهُمْ دور كبير في توجيها والإستفادة منها!٠٠٠
تعمَّدتُ في موضوعي هذا الخلط بين الكتابة بالعاميّة المفرِطة في شعبيَّتِها وبين الفصحى المُغالية في نحْوِها وبلاغتها ، راجياً أن أُرضي كلِّ الأذواق ولو أنِّي أعلم سلفاً صعوبةَ إدراك هذا الهدفْ٠٠٠٠ على كلٍّ فَصدريَ رحبٌ لكلِّ إنتقاداتِكُمْ البناءة وآرائكم القيمة ، فلا تتردَّدوا في إتحافي بها٠
========================
هذا هو قَدرْنَا ، واللي علينا مكتوبْ٠٠٠٠ أُنظروا الى صفحاتنا وما فيها٠٠٠٠كلامْ بكلام ولا شيئ غير الكلام ٠٠٠٠صارتْ صفحات التواصل الإجتماعي منبراً لكلٍّ منَّا٠٠٠٠ُصُرنا كلنا من صنَّاع الأخبار وحتَّى من أصحاب القرار!٠٠٠طبعاً على الورقْ فقطْ٠٠٠٠
صرنا مصادرَ للأنباء والإعلام ;
توديعٌ بمناسبةِ سَفرْ أو حمْدٌ للهِ على سلامةِ الوصولْ!٠٠٠٠تهنئةٌ بمولودْ أو تعزيةٌ بوفاة٠٠٠٠دعاءٌ بالشفاءْ أو دعاءٌ على الظالمين!٠٠٠٠شوقٌ وحنينْ وبكاءٌ وأنينْ٠٠٠٠سلامٌ وكلامْ ، متبوعٌ بكلامٍ وسلامْ٠٠٠٠نصائحٌ و حِكَمْ ، موعظةٌ أو توعية وربما تحذير أو وَعِيدْ ويَصِلُ حتى للتهديدْ٠٠٠٠
إشِي بيِحْكِي عن الحَاضرْ ، وآخرْ بيسْتَنجِد بالماضي ، وثالثْ يحذِّر من القادم٠٠٠٠
ناس معْ ٠٠٠٠ وناس ضدْ٠٠٠وكلْ واحد مفكِّر نفْسُه على حقْ ، والمخالفين لهُ في الرأي همْ على خطأ ٠٠٠٠ مسبَّات وبهدلاتْ ومن جميع العياراتْ ، بالتصريح حيناً أو بالتلميح أحياناً٠٠٠توزيع شهادات حسن سلوك وتبشير بالجنَّة أو بالنار٠٠٠٠والكل يقول إنٍّو الحَلْ عِنْدو٠٠٠ما حَدَا بيِفْهْم سواهُ أبداً٠٠٠٠
خواطر وافكارْ٠٠٠قِصصْ واشعارْ٠٠٠صارْ معظَمْنا شاعر أو اديب٠٠٠فيلسوف او حكيم.٠٠٠واعظ أو داعية٠٠٠محلِّل سياسي او مُفتي مآسي٠٠٠كلٍّه بْيفهَم بكُّلهْ ، وما حَدا بيقولْ عن زيتُهْ عِكِرْ ٠٠٠وبالطبِعْ ما حَدا عاجْبُو حَدا٠٠٠
إن كتب بالنَّحوي قالُوا بيِتفَصْحَنْ ، وإذا كتبْ بالعَاميِّة قالوا عَمْ يِتوجْهَن٠٠٠وإن خلَط بين الأسلوبينْ قالوا عم يتملْعَنْ وإن تساءلْ بِبَراءَة ; طَبْ شو بدكُو؟!٠٠٠قالوا بيتْغَشْمَنْ٠٠٠ وإن حكى كانْ وِقِحْ ، وإن سكتْ صارْ متوطِئْ أو سافِلْ٠٠٠إن أبدى رأيَهُ وُصِف بأنّه متهَوِّر ، وإن صَمتَ قالوا إنُّو جَبانْ٠٠٠٠إذا قال الحقيقة قالوا متشائم ، وإذا عبَّرْ عن أحلامِه قالوا متفائلْ٠٠٠٠
إنْ أيَّد فهوِّ عَمْ يزَاوِد وإذا ندَّدْ ، قالوا عَمْ يهاوِدْ وإذا دعا للصلحْ قالوا عَمْ يراوِدْ!٠٠٠
بالمناسبِة نسِيتْ قسم كبيرْ وهام جداً من موضُوعَاتنا عَ صفحاتْنَا وهو موضوع التحيَّات والسَّلامْ والعَزائمْ والولائم وكُلَّها على الصور أو في أحسنْ الحالات بِتكونْ على شكل مقاطع فيديو للتَّحياتْ والأماني وإهداءِ الأغاني أو قدتكون وصفات لأكلات وطبخات أو مواعظ دينية أو حتى طرائف مسلية وأحياناً أفلام رعب وحتى مواضيع جنسِيِّة واللي أغلَبْنا بيِتْبرَّى مِنها وبيلعن سَنْسَفِيل القراصنة والهَكَرْزْ والفيروسات اللي هيِّ أكتَرْ من الهَمّ ع القلبْ وتفضَّلوا معاي وشوفوا كل أنواع ;
الدعواتْ للطَّعام والشَرابْ والتفنُّن فيها في الصباح ، أو في المساء وحتَّى على الغدَاء ، والكرم الحاتَمِي طبعاً ، والزيارات المكُوكِيَّة والسياحة في بلاد الله والخبرات المُكتسبة في الأوطان الجديدة[المؤقتة]٠
ونشاهد سِجالاتْ ومُناظرات عن فضَائِل هايْ الدول ، وتُعقَدْ مُقارَنات حوْلها ; فإذا بواحد بيقول ; تعالوا شوفوا ''عنَّا'' في السويد كيف بيعَامْلوا الأطفالْ ويردُّ عليه آخر ; لَكَان شُو أحكي إلكُو أنا هون عن ''بلدنا'' الدنمارك ، والله إشي بياخدْ العقل!٠٠٠ و واحد تَالِتْ بيقول والله إنِّي مُت من الضَّجَر والبَردْ في النرويج ''تبعتْنا''!٠٠٠سُبحانْ الله ما بينَ ليلةٍ وضُحَاها صارَتْ هايْ البْلادْ بلادْنَا!٠٠
كُلْ واحد منَّا اصبحْ خبير في العوْلَمة والرأسمالية والدِّينْ٠٠٠٠وَ عندُو ، بحُكُمْ خِبِرتُه حُلولْ لكُلِّ الامور الاقتصادية والسياسية والاجتماعية ايَّاً كانتْ٠٠٠كلٌّ منَّا صارَ حكيمُ زمانه وفيلسوفُ عصْرِه٠٠٠٠٠لا شيئَ قبلَهٌ ولا شيئَ بَعْدهْ!٠٠ وتعالْ خُود درُوسْ في الحضارة والرُّقِي والتقدُّم وطبعاً النصائح المَجَّانية لأهالينا في المخيَّمات وإنتقادهم والإعتراض على عاداتهم وتقاليدهم المتخلِّفة ، وكمانْ هناكَ شرائِحَ ،على النَّقيضِ مما ذُكِرْ أعلاه تلعنُ الغربَ على كلِّ شِي فيه وتذوبُ شوقاً وحنيناً لجذورِهَا وتنْدبُ حظَّها العاثِرَ وتكتبُ عن مُعانَاتِها وعن قسَاوةِ الغُربة و وَحشِيَّتها!٠٠٠ وكلُّهْ طبعاً على الورق وعلى صَفَحاتِ النِّتْ ٠٠٠يلَّلا مَهُو الحَكِي ليسَ عليهِ جَماركْ٠٠٠٠٠
هلأ شو بدنا بالحَكِي الكتير ؟!٠٠٠
إسمحولي في الختام-من فضلكم- وبكل تواضعِ وأنا العاجزُ ، الذي ليس بيدهِ شيئْ، أَنْ اهديكُمْ مِنَ السَّماء نجومَها ومِنَ الورودِ عبقَها ومِنَ النَّهارِ فيئَهُ ومِنَ السَّحابِ مُزْنَه ،ومِنَ الثلج بياضَه وصفاءَهُ ومِنَ الخريف أوراقَه الذهبيَّة ومِنَ الربيعِ أزهارَه ومِنَ الليلِ قَمَره ومِنَ الجَمالِ سِحرَه ومِنَ الغابات خَضارَها ومِنَ الأنهار خَريرَها ومِنَ العنادل شدْوَها....وشو ما بِدْكو ! ٠٠٠أي شِي بيخطُرْ عَ بالكو أو ما خَطَرْ٠٠٠٠٠أيْ هُو انا يعنِي دافِع ْشي مِنَ جيبتي وصحتَينْ ع قلبْكُو ودُمتُمْ إِلِي بألف خيرْ ، وشكراً جزيلاً على طُولةْ بَالكُم٠٠٠
أَمانة أَيْ واحد منكُمْ في بنِفسُو شِي ، أَمانِة مَا يستْحِي وأنا تحتِ الطلَبْ!٠٠٠٠
خيرْ اللهْ علينا كبير وعنا منُّو كتيرْ ، وما فِي شِي مِنَ واجبْكُم٠٠٠٠قالوا وبيقولُوا ; اللِّي بِبَلاش كتِّر منو ، وانْتُو واللهِ بتستاهلوا هيكْ واكثر من هيك٠٠٠٠
فهمتوا شي علي٠٠٠٠ما أظْنْ!!٠٠٠ لإنُّو أنا ذاتْ نفسِي ما فهْمانْ شي٠٠٠ و حتّى إنِّي نسيت شو كُنتْ بدِّي أحكي!٠٠٠
خلص رحْ اتوقَّف هونْ ، احسن ما تكُرْ المسبَحَة معي مِن جديدْ وبعدين أرجعْ أعيد عليكو هالأسطورة اللي ما إلْها بداية ولا نهاية وأعيد على مسامعكُم الاسطوانة من أوَّل وجديد ....فُتْنَاكم بخير وعافية.... وإلكو منِّي أحلى سَلامْ وأعذبْ كَلام و و و ٠٠٠٠و و٠٠
فجأة يا جماعةْ الخير صابَتْني في دَاني[أُذُني] وَشِّة قويِّة و دوَّخَتنِي ،وبعدْ شويّة خفَّت الوَشِّة وصرت أسمع صوت ضعيف٠٠٠٠ وشويِّة شوَيِّة اتضَحْ الصوت!٠٠٠
-قُلتْ مينْ معِي؟!٠٠٠مينْ عم يحَاكِيني؟!٠٠
-قال الصوتْ ،اللي في داني وجاوبني بكل ثقة وبوضوح ; أنا صوتك الداخلي ٠٠٠
-تساءلت; شو بدَّكْ منِّي ، إتركني بِحَالي٠٠٠٠أنا مِشْ فاضي إلَكْ٠
-قالَّلي بصوت حَادْ وعاَلِي ; وَقِّفْ٠٠٠٠٠ وَلَكْ وقِّفْ٠ ولَكْ ذبَحتْ العَالم بكلامَك ، شو إنتِ بالع راديو؟!٠٠
وَلَكْ حتَّى إنَّكْ لو كنتْ راديو، فالراديو إلو وقت بَثْ محدَّد وفيه إستراحة وفيه فاصِل موسيقي٠٠٠٠٠ريِّح العالم يا زلَمة بِسكوتَكْ!!٠٠٠٠
العمى ، العمى طِلع صُوتي الداخلي أكثر ثرثرة مني٠٠٠٠قُلت بنفسي إنِّي أهَادْنُه و'''أسحَبْ معو عَ النَّاعمْ'' وأريِّحكُمْ وأريِّحْ حالي منُّو فقلتلُّوا أمْركْ يا صوتي الداخلي العزيز ، سمعاً وطاعة هاي سكتنا ومنَّكْ السمَاحْ !٠٠٠
ونصيحة منِّي إلكُو ; إنْتو إنِفدُوا بجلدْكُمْ ، قبل ما تدُّورْ معي وتعلَقوا مابينِي وبينْ صوتي الدَّاخِلي٠ سلامْ!٠٠٠٠

د٠ محمد طرزان العيق
صوفيا / 15.08.2015






  رد مع اقتباس
/
قديم 24-01-2018, 02:14 AM رقم المشاركة : 2
معلومات العضو
زياد السعودي
الإدارة العليا
مدير عام دار العنقاء للنشر والتوزيع
رئيس التجمع العربي للأدب والإبداع
عضو اتحاد الكتاب العرب
عضو رابطة الكتاب الاردنيين
عضو الهيئة التاسيسية للمنظمة العربية للاعلام الثقافي الالكتروني
الاردن

الصورة الرمزية زياد السعودي

افتراضي رد: شوفوا الغربة والهجرة شو ساووا فينا

سلام الله
ميمون منجزكم
طمعاً في رايكم وتعقيبكم على نتاج الزملاء والزميلات
نرشح لكم هذا المنجز :

http://www.fonxe.net/vb/showthread.php?t=70624

ود لا يبور






  رد مع اقتباس
/
قديم 27-03-2018, 01:39 AM رقم المشاركة : 3
معلومات العضو
نوال البردويل
عضو أكاديمية الفينيق
عضو تجمع أدب الرسالة
فائزة بالمركز الثالث
مسابقة القصة القصيرة2018
عنقاء العام 2016
تحمل وسام الأكاديمية للابداع والعطاء
عضو لجنة تحكيم مسابقات الأكاديمية
فلسطين

الصورة الرمزية نوال البردويل

افتراضي رد: شوفوا الغربة والهجرة شو ساووا فينا

ههه والله موضوع شيق رغم طوله وصادق
ونيالك ما أطول بالك وبجد أحسدك على طول النفس
الموضوع أعجبني وقرأته كلمة كلمة وحرف حرف
"بجرب إني أطول بالحكي لكن ما قدرت بيكفي هيك"
معجم عامي ومعجم فصيح ما شاء الله
والله يلعن أبو الغربة والهجرة شو سووا فينا
تقديري وتحياتي






  رد مع اقتباس
/
قديم 28-04-2018, 07:58 PM رقم المشاركة : 4
معلومات العضو
أمل عبدالرحمن
عضو أكاديميّة الفينيق
عضو تجمع أدباء الرسالة
تحمل أوسمة الأكاديمية للابداع والعطاء
الأردن

الصورة الرمزية أمل عبدالرحمن

افتراضي رد: شوفوا الغربة والهجرة شو ساووا فينا

أهنيك على نفسك الطويل بين العامي الجميل واللغة العربية الفصيحة ، وصدقت فيما قلت نعم مواقع التواصل الإجتماعي العربية بالذات أشبه بسوق مفتوح للتبضع ..وصنعت شيء من اللاشيء وظهر من يتغطى بالقيم والدين والشعارات وهو فالسو ..وظهر من ينادي بتحرير الأوطان وهو أول من باعها .. وطبعا بنرجع نحكي إلا ما رحم الله أما الغربة عن الوطن الشيء اللي بيجرح انك فعلا تسمع عن مستوى العلم والصحة بل حتى مستوى قيمة الانسان هناك خاصة في السويد وكيف صارت قيمة انساننا العربي أمام صواريخ الغرب ومؤامراتهم .. بعين الله
كل الإحترام والتقدير أخي الأستاذ الأديب محمد العيق .






  رد مع اقتباس
/
قديم 01-05-2018, 06:59 PM رقم المشاركة : 5
معلومات العضو
خالد يوسف أبو طماعه
عضو مجلس إدارة
المستشار الفني للسرد
عضو تجمع الأدب والإبداع
عضو تجمع أدب الرسالة
يحمل أوسمة الأكاديمية للابداع والعطاء
عضو لجنة تحكيم مسابقات الأكاديمية
الاردن

الصورة الرمزية خالد يوسف أبو طماعه

افتراضي رد: شوفوا الغربة والهجرة شو ساووا فينا

الغربة لعنة كبيرة وقاسية
لديك معجم خاص وجميل
حري بهذا الحرف أن يتابع
شكرا لهذه الجرعة الدسمة
تحياتي






حَسْبِيَ اللَّهُ لا إِلَـهَ إِلاَّ هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ
  رد مع اقتباس
/
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة نصوص جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة

الانتقال السريع


الساعة الآن 04:57 PM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لأكاديمية الفينيق للأدب العربي
يرجى الإشارة إلى الأكاديمية في حالة النقل
الآراء المنشورة في الموقع لا تعبر بالضرورة عن رأي الإدارة بل تمثل وجهة نظر كاتبها فقط