يا غزة (بالعامية المصرية)

**هشام نعمار** · 13-04-2024, 10:45 AM

يا غزة ليكي من
يشيل الملوك
من كراسيها
ويحط بدالهم
في الارض اضعف
اللي من فيها
يا غزة انا عمري
ما شوفت نفوس
بتتعمر بخراب
مبانيها
وخراب شهامة
ورجولة
بحيطان نعليها
يا غزة انا
ما شفتش في حياتي
جنود بترتعش
والطيارات بتحميها
واطفال سبقت الشجاعة
بخطوتين وسلاحها
في الحرب اياديها
أطفال مابتخفش
كأن ليها
الموت لعبة
تسليها
اصل الشجاعة
سجية
بتحب اللي يرفعها
وبتهرب من
اللي يوطيها
وما تحبش
الجبان اللي
نفسو موطيها
يا غزة انا شفت
في الحروب
ناس بتموت
التراب يغطيها
لكن اول مرة اشوف
ميت برجولتو
السما بوسعها
يغطيها
وانت ياللي بتحكم
عمال تمشِِّي
الدنيا شقلبة
بعدما كانت ع رجليها
إن كنت ما تقدرش
تشيل
شيلة البلد
ومخليها على الله
يمكن بمعجزة ينجيها
والمعجزات وانت عارف
ماتجيش يا سيد القوم
غير لمواليها
اصله انت اللي فضيت
روح الوطن من
اجمل معانيها
ورحت فاكر بانك
لما تملاها زبالة
ونجاسة فانت
كده معبيها
لأ وعمال تقاوح
وبتقول انا اللي
لما مِرضِت قضية الارض
رحت بحنكتي
مداويها
فراح اقولك حاجة
بالفصيح
ان كان فخامتك
لامؤاخذة
لي معديها
يا باري القوس
بريا ليس يحسنه
لاتفسدنه وأعط القوس
لباريها

يا غزة انا حزين
وحزني مالوش لزمة
اصل الشهيد
رفع بدموا
راية الأمة
وحط على امم
بتدعي
الانسانية
واداها
بالجزمة
واللي بيقولو
دلوقتي والمجزرة
قايمة
إن فلسطين
مش ارضنا
بقت في العالم
صُورتُهم
رخمة
سواء لبس
بدلة مثقف
فصيح
او مقدِّس كلامو
بلبستو العمَّة
المداري بان
والحق لازم
تكون له في
أمتو الكلمة

يا غزة انتي
الأم واحنا
اولادك اللي
عقوك
وانتي اللي بتردي
على اولادك
لما بينادوك
ما تسيبش ايد
اخوك يابني
لما العدا
يعادوك
والملايكة إن تستمدهم
بعد ما تعمل كده
اكيد راح يمدوك
يا غزة الحرب ليه
قانون يحمي
البنيان واللي فيه
لكن النذل ابن النذل
بجرايمو قام لاغيه
وبنفسيتو المجرمة
راح قتل
انسان وحيوان وشجر
كلوا في قتلتو مساويه
والعالم بيبص
من بعيد
وقام راح بعد
كل ده مخليه
والعروبة بكت
والدمع في الحرب
يا عروبة أصله
حيعمل ايه
والحزن رغم هول
المجازر
لئى في سكتو
قلوب صابرة
تداريه
والامل اللي
معيِّش الحلم
لئناه في الشجاعة بس،
وراح ديما
نلائيه
وافتكري يا غزة
انو الطفل
اللي شاف وعاش كل ده
مفيش حاجة
في الدنيا عن
ثارو راح تنسيه
والعمر افتكروا يا ناس
انه مش بئيد
العدو هو بس وفقط بئيد
اللي باريه.