إمَّا سعيدٌ أو فيلسوفْ

[محمد طرزان العيق]

إمَّا سعيدٌ أو فيلسوفْ
*************************
لمَّا الواحدٌ من مِنَّا يستوي عَ الخالِصْ٠٠٠ وغريزةُ العائلِة بهِ قدْ إستَحْكَمتْ٠٠٠يعمَلْ إستِخارَة٠٠٠لإنُّو هادا القرارْ هوَ قرارْ مَصيري ويحَدِّدْ المسارْ٠٠٠ ومتِلْ ، ما بتعرفوا، يكونْ هادا ،إِلْنَا، آخرْ قرارْ٠٠ فَمنْ هذه اللحظَة الحاسمة ولآخرِ العُمرْ يُقرِّرُ عنَّا!٠٠٠٠٠
من شان هيكْ ،اللي نَوى يدخُلْ القَفصْ بِرجلِيهْ، بيستَجْمع قُواه وبيقولْ: العُمرْ واحِدْ والرَّبْ واحدْ٠٠٠والمكتوب ما منُّو مَهروبْ٠٠٠٠ والطنجَرة بِدهَا غَطاها!٠٠ و إيدْ وَحْدة ما بتزَقِفْ٠٠٠واللي بدُّو عيالْ لازمْ يِحْوي إمْ العيال!!٠٠٠ وبدون هيك ، واللهِ /وبكَسْرِ الهاءْ/ إنُّو ، لو صامْ وصلَّى للأبدْ، بدونْ ''المَرَة'' بِيضَلْ بدون ْوَلَدْ وتَلَدْ٠٠٠
يللا شِدْ حيلَكْ يا وَلَدْ ، وإتِّكِلْ عَ واحدْ أحدْ!٠٠٠
وهيك يا جماعة الخير٠٠٠بيحطْ راسو بين هَالرُّوسْ و شو بيقولْ؟!٠٠٠نعمْ ،شو بِيقُولْ؟!٠٠٠٠٠''يا قطَّاع الرُّوسْ''!٠٠
أيوَة ، صح مزبوط ،هاي إنتو كُلْكُو بتعِرفوا الكمالة٠٠٠ طيِّبْ مَا زَالْ هيك ، شَرْفُوا لَعادْ مَحلِّي وكَمْلوا إنتُو الحكايِّة!!!٠٠٠

شو مالْكو سَكَتوا٠٠٠وَلْ علِكوا بتِلقُوشْ مزِح!؟٠٠٠طيِّب رحْ أكَّملها أنا٠٠٠٠ وينْ وْصِلنا؟!٠٠شو يا إخوانْ ، عم نِسألْ وينْ وْصِلنا؟!٠٠٠عزَّا ماحَدا مِنكو مِستَرجِي يجاوبْ!٠٠٠طيِّب أنا رح أجاوِبْ٠٠٠

عَ كلْ حال وصَلْنا إنُّو صَاحبنا قرَّر يتجوَّز٠٠٠قال شو بدُّو يصيرْ رَبْ عيلة ٠٠٠٠ويصير ،عَ قولِة المَصَارْوِة، ''سِي السيِّد''٠٠٠
يرجع من شغلو تعبانْ ٠٠٠يلاقي الميِّة السُّخنة بالقازانْ٠٠٠بَرَّاده بالخيرات عَمرانْ٠٠٠والبيتْ بالأكلات الطيّبِة مَلَان٠٠٠ وفراشو نظيف ودفيانْ٠٠٠ومَرْتو تِستقبلو بِحنانْ٠٠٠رْجِعتْ يا سيدِ الفُرسانْ٠٠٠ نوَّرتْ البيتْ والمَكانْ!٠٠٠إحنا والولاد بنستناكْ٠٠٠

المُهِمْ راح أخُونَا عَ سُوقِ العرسانْ٠٠٠لِقي من النِّسوان أشكالْ وألوان٠٠٠قالْ لحالو نيَّالكْ ياضَرسانْ٠٠٠ إختارلَكْ أحلى الغزلان٠٠٠بسْ زي ما بيقول المثَلْ٠٠٠ ''إزا بدَّكْ تْحيِّرْو خَيّرو''٠٠٠

ومِنْ كُثرْ النِّسوان ٠٠٠صار بأمْرو حَيرانْ : والله هَايْ حِلوة بَسْ طويلة ، وهاي شقرا بَسْ سمينة ، هَايْ نحيفة بَسْ بِشعة !٠٠وهَايْ ال ''بَسْ'' ما كانْ يِخلصْ منها ٠٠٠ اللهْ وكيلْكُم ما كَانْ يِلحَقْ يعَيِّنْ وينَشِّن عَ وَحْدِة إلَّا وهَايْ ال ''بَسْ'' تِطلعلو بالمِرصادْ٠٠٠ مالِقي مخلوقَة بدون ''البَسْ '' ، فَهَايْ مُنخارها كبير، وهاي شعَرها قصير، وهاي عيونها صغَارْ ٠٠٠

فِشْ وحَدِة كاملة مكمَّلة ٠٠٠ ومتِل ما بتعِرْفو ''الكَمَالْ لله وحْدَهْ''٠٠٠ظَلْ يروحْ ويجي حتَّى تكسَّرَتْ إجْريه٠٠٠وبعدين؟!٠٠٠شو بدَّكْ تْسَاوي يا فارِسْ يا هُمامْ؟!٠٠٠
بالأخير قرَّر هيكْ يختارْ من غيرْ ما يدقّقْ ٠٠٠غمَّضْ عيونُه ومسَكْ بوَحدَة منْ هالبناتْ٠٠٠طلعَتْ ، إللي مسَكْها بيضا وشقرة ٠٠٠قال يلَّلا ما إِلها نصيب ،عندي، هالسَّمْرة ٠٠٠إتَّكَلْنا على الله٠٠٠ إنشالله يجعَلْها إِلِي مُهْرَة٠٠٠تكون وجِهْ خيرْ عَليِّ و يِجعَلْها خضْرة ٠٠٠

المهِم يا جماعة الخير٠٠٠مشْ المهِم ، المنظر من بَرَّة٠٠٠٠الأَهَمْ تكون البطِّيخة، من جوَّا ، حَمْرة٠٠٠ وتكونْ حِلوة وطعمها أحلى وِبزِرْها أصيلْ٠٠٠٠

ربِّي إجعَلْ بطِّيخَتِي حَمْرة٠٠٠٠ربّْي وإطْعِمها لكلْ مشتهي٠٠٠ ويعطي كلْ واحدْ نَصِيبو و حسَبْ نِيّتُو!٠٠٠
إخترْ بَطِّيختكْ وإتِّكلْ عَ المَوْلى٠٠٠
فمنْ كانتْ بطِّيختُه حَمرة قضَّى عمرَه بمسَرَّة وقضَى عُمرَهُ سعيداً ، ومنْ كانتْ لهُ بيضا٠٠٠٠صارَ فيلسوفاً!٠٠٠
شو مالكو عمْ تِطَّلَعوا فيني؟!٠٠٠
ولا تأخذكم الظنون بعيداً فأنا ما عمْ أتفلسفْ عَ حدا٠٠٠كلْ ما في الأمِر عمْ أعرِضْ عليكم تجربتي وفلسفَتي بِــ هالحياة!٠٠٠
وطوبى لمنْ رُزِقَ ببطيخةْ حمرا!٠٠٠

يا جماعة ، أنا أخذت راحتي بالكلام لإنُّو عيد النسوان عدَّا وفات مِن كَامْ يوم ع خيرْ وسلامةْ!٠٠٠
بالمناسبة يوجدْ عنَّا بطيخْ ، وعَ المكْسَرْ ، بس هات شِي واحد يرضَى ببطيخة مَشقُوحَة٠٠٠ما رحْ نلاقي٠٠٠ ولحَدْ هونْ وبيكَفِّي ٠٠٠فُتْناكُم بخير وعافية٠٠٠٠ والله يخلِّيكو لَنسوانْكو ويخلِّيلْكُم إيَّاهِنْ ،عَ رُوسْكو، تِيجانْ!!٠٠
بالمناسبة/كمانْ مَرَّة/ ; ماتَّعْبوا حالْكو ، وعنْ خِبْرة بَقُولْكُو، ما تدَّوْرا وتبَحِلقُوا بعقْد زواجْكو ما رحْ تلاقو فِيهْ خانةْ ''إنتهاء الصلاحية''٠٠٠لزْقَة أصليِّة وللمَماتْ٠٠٠الله يعين كلْ واحدْ على بَلْواه٠٠٠ والصبر مفتاح الفرَج٠

د٠محمد طرزان العيق
26.03.2014

[غلام الله بن صالح]

ساخر هادف وجميل
دمت مبدعا
مودتي وتقديري

[أمل عبدالرحمن]

خليك عزابي أحلالك شو بها العزوبية لاهم ولامشغلة ولامسؤولية ، ومتل ما قلت الزواج متل البطيخة ..وربنا يستر ويحفظنا بحفظه ..
ساخر جميل من الواقع ..
تحياتي وكل التقدير

[محمد طرزان العيق]

المشاركة الأصلية كتبت بواسطة غلام الله بن صالح

ساخر هادف وجميل
دمت مبدعا
مودتي وتقديري

حيّاكم الله أخي بن صالح
أشكركم على هذا الإطراء ، الذي يعكس ذوقكم الرفيع!٠٠

[محمد طرزان العيق]

المشاركة الأصلية كتبت بواسطة أمل عبدالرحمن

خليك عزابي أحلالك شو بها العزوبية لاهم ولامشغلة ولامسؤولية ، ومتل ما قلت الزواج متل البطيخة ..وربنا يستر ويحفظنا بحفظه ..
ساخر جميل من الواقع ..
تحياتي وكل التقدير

تحياتي أُخيَّتي أمل
سُئِل سقراط ; أيُّهمَا أفْضلُ حالاً ، الأعزبُ أمِ المتزوِّج؟!٠٠
فأجاب ; كِلاهُما نَادِمْ!٠٠٠ههه
شكراً على المداخلة اللطيفة٠

[نوال البردويل]

ما هو نفس الوضع عند النسوان
يمكن تطلع بطيخة الوحدة فينا بيضا
وهات مين يفك هاللزقة
خلص صار اللي صار وبدها ترضى بالواقع الـ "مر"
ربي يسعد الجميع
ودمت بكل الخير والسعادة