لِنَعْكِسَ بّياضَنا | |
« تَحْــليقٌ حَيٌّ وَمُثـــابِر » |
|
♞صَهيــــــــــلْ واحات فيها يتمدّد الموّال على خبب إيقاع الشعر الشعبي إرثاً ثريّاً و حاضراً مموسقاً.. محكيات تحمل المضامين |
|
أدوات الموضوع | انواع عرض الموضوع |
07-11-2016, 01:12 AM | رقم المشاركة : 1 | ||||
|
هاذي سمـَر !
هاذي سَمَر !
( بالعامية الفلسطينية ) د. نديم حسين (1) هاذي سمَر ! هاذي الصبيـَّه الفلسطينيـَّه نورِ الشَّمس ، تـِنعـَفـُه بهالليلْ عا أرضِ البشَر .. كَفِّ القَمَر ! هاذي سمَر ! تِحمِل على كْتافِ العُمُر بُقجِه ، فيها خيمِتْها وِشويِّةْ دَمـِعْ ، كِسرِةْ خُبِز بلـَّتْ عجينِتها دمعِة سفَر ! والصَّبـِر صبـَّرها .. وما عادْ عا ذُلِّ الكريمِهْ والوجَع كـَنِّ وْصَبـَرْ ! هاذي سمَرْ ! وينِ اللـِّي كانوا عْمامْها وِخْوالْها ؟ هِيـِّه اليتيمِهْ وأَهِلها مَلـُّو البَواديْ والحَظـَرْ ! ومينِ اللـِّي يِعقِدْ عَقِدها بيومِ الزفاف ؟ فجأَهْ شُفـِتْ طُرَّاحـَهْ من نورِ الطَّهارَهْ .. وكإِنـِّي شُفِتْ عالطُرَّاحَهْ قاعِدْ سيِّدنا " عُمـَرْ " !! هاذي سَمَرْ ! حُرَّه وجميلِه وما يِشبَعْ منها النَّظَرْ ! كانوا حبايِبها حَواليها .. واحَد رحَل لَلهـِندْ .. واحَد هربْ للسـِّندْ .. واحَد سـَبـَتْ قَلبُهْ " قَطَرْ " ! واللـِّي يِحِبّ عْيونْها ، ما يْخونْها .. بيظَلّ فيها تَيِحميها منِ سْيوفِ التَتَرْ ! واللـِّي هربْ من بيتها ، فـَلِّ وْهَجـَرْ ! خايِن جبان وْباعْها بْشـَقرا وْدُلـَرْ !! هاذي سَمَرْ ! هاذي فلسطينِ الكريمِهْ الطاهْرِه ، وْقالوا : ما يِعْـقـِد عَقـْدِ هالشَّهيدِهْ عاشـَّهيدْ غيرَكْ يا سيـِّدنا " عُمَرْ " !!. هاذي سَمَرْ !. ********** (2) هاذيْ سمـَرْ ! ما تْصّدِّقِ دْموعِ اللي خانِ عْيونْها .. وِجيوشْ مِن خيْبـِهْ ! تِنحـَطّ في الجيبـِهْ ! والعيبْ في اللي كَلـَّحِ وْما عادْ تِحِرجـُه العيْبـِهْ ! وينـَكْ يا ابنِ الوَليدْ ؟ لمـَّا تِناديكِ الحَرايِرْ اللي تَحِتْ بُسطارِ العدُوِّ رْقابْها .. يِذبَحها لَمـَّا يْذِلـّها ، وِيدَنـِّسْ بْكـَفـُّه بَياظِ نْقابْها ، وينـَك يا ابنِ الوليد يا خالِد ؟! وينَك غِبـِتْ عـَنـَّا وْطَوَّلتْ هالغيْبـِهْ !؟ وينَك يا بِنْ بَطنيْ ؟ قُلِتْ رايِحْ يا ميمْتي وْراجِعْ .. مِشْ عيبْ تِظحَك يا بِن بَطني عهالشـِّيْبـِهْ ؟! شِبِتْ لَمـَّا ثَلـِجْ عُمري تْكـَوَّم على راسيْ .. وين اللي كانوا عِزِوتي وأطهارْ حُرَّاسيْ ؟ وينِ اللي كانوا يِسهَرو تتنامْ مِرتاحـَهْ سَمَرْ ؟ وينِ اللي كانو المُبتَدا الحَنـَّتْ لَروحُه .. والخَبـَرْ ؟ وينِ اللي في يومِ الرُّجولـِه تْمَرجَلو ؟ رَدُّو الأَعادي وْدَردَبو : " جْيوشِ الأَعاديْ نْدوسِها ، وْكَفِّ الحبيبِهْ نْبوسِها .. " دَبَكو في ساحِةْ بيتْها واتحَنجـَلو .. وينِ اللي في يومِ الرُّجولِهْ تْمَرجَلو ؟ جابو النَّصِرْ لمـَّا النـَّصِرْ يومِ المعارِكْ باسْ اديْها وانتَصـَرْ ! هاذي سَمـَرْ ! حَيـِّه وْشَهيدِه وْشَعِبها حَيِّ وْشَهيدْ .. والغاصِبِ المَلعونْ مهما في غِيـُّهْ كـِبـِرْ ، بيْظـَلّ عن قَبرُهْ شـِبـِرْ ، هاذي سمرْ ! يومِنْ نِسَوِّيْ عُرِسها بْيومِ " الخَميسْ " .. أغلى عَروسِ وْشَعِبها أعلى عريسْ .. وْما يِعقِد عـَقِد هالشَّهيدِهْ عالشَّهيدْ ، غيرَك يا سيـِّدنا " عـُمـَرْ " !! هاذي سمَرْ !. ************** (3) هاذي سمَرْ ! أكثَر وأغلى وأعلى من كلِّ البشَرْ .. متروكي رقْبـَتها في كفّ أوباشِ التـَتَرْ .. كلّ ما نُخطُر عبالْها بِتصير تبكي هالإمِّ الحَنونـِهْ ! تِبكي ، واحِسّ بدمِعها يِنزَل من عْيونيْ ! وْهِيـِّه ما بْتبكي عليها ، لكِنْ بتِبكي علينا ! واحنا قلوبْنا طَبعِ الحجَرْ .. واللـِّي بِحيـِّرني إنْها كلّ ما بتشوفني بتِتطَقـَّسْ على حاليْ : طمـِّنـِّي يا وْليديْ على وْلادَكْ ، على بِنِتْ عمـَّكْ ، على حْوالـَكْ ! وْعلى إخوِةْ شهيدِ الوطنْ ، فرسانِ الوغى عْمامـَكْ ! و " مْحِمَّدِ الفيـَّاض " .. زينـِةِ خْوالـَكْ ! هذا الزمن نَمرودْ ، بَعرِفْ .. وانتِ اللي لمـَّا يصيرِ الليلْ في نُصـُّهْ ، تِبكي في نُصِّ الليلْ ، وما هو عيبْ لو تِبكي ! وِدموعَكِ بْتِحكيْ ! دْموعِ الرِّجال يا وْليدي ثاني مطَرْ ! تِغسـِللِّي بَحري وِتفَيـِّقِ الثَّمراتْ من نومِ الشَّجَرْ ! قُلتِلها : يـَمـَّهْ والْدي تْصاوَبْ في المعرَكـِهْ وفيها انأَسَرْ ! وانكَسَر من حسِرتُهْ .. يمـَّهْ انكَسَرْ ! قالتْ : أبوكْ طالـِعْلـَكْ !! بطلْ وابِنْ بطـَلْ ، بصقوا على كـَفـُّهْ ، مسَحها بْلِحيـِةِ الغاصِبْ ! ما يْموتْ يا اللـِّي يْموتْ وْهُوِّي بيْحارِبْ !! وما يْجوع يـِمـَّهْ اللي القَمِحْ عن ديرْتـُهْ هـَجِّ وْرَحَلْ !! ما يْجوعْ رغمِ الجوعْ حاميكِ البَطـَلْ !! يِندَهْ على عُمـْرُهْ ، والجِنـِّهْ بِخْلودِ الشهيدْ بِتجاوِبْ ! وامِّ الشهيدْ بِتزَغرِتْ ويِنزَلْ دمِعها مثلِ الـَّلآليْ .. مينِ اللي سمـَّاها " فقيرِهْ " وعِندها هاذي الدُّرَرْ ؟! لا الغَني بْذُلـُّه اغتَنى ، ولا الفقيرِ بْطُهِرْ أعمالـُهْ انفـَقَرْ ! هاذي سَمَرْ ! وما يِعقِدْ عَقِدْ هالشَّهيدِهْ عالشَّهيدْ غيرَكْ يا سيـِّدنا " عُمـَرْ " !!! هاذي سَمَرْ ! *********** (4) هاذي سمَر ! هاذي اللي ظُلمِ الكُونْ كله نام عَفراشِ المَنامْ فيها وهِيـِّي فرشِتها أُبَرْ ! هاذي اللي ناشِفْ حَلِقْها والبيرْ بَعدو بيرها لزغيرها وِكبيرها شِرِبِ الغريبِ غيومها .. جَفَّف شُعاعِ نجومها .. وْمِن نوم حارِسها ، لَحلامْ خيمِتها عَبَرْ ! هاذي سمَرْ ! هاذي اليتيمِه وْأَهِلها مَلـْوِ البَوادي والحَظَرْ ! عزَفِ الزمانِ المِزّ لحنِ دْموعها .. وِعيونها نايِ وْوَتَرْ ! وِولادْها : واحَد شَهيد .. وْواحَد يُحرُسِ غيابِ السَّجينْ وْواحَد جُرحُه في الأَرظِ انحَفرْ ! صَوَّر زمانِ الموتْ كلِّ وْلادْها وما عِندْها حيطين تْعَلـِّقْ فوقِ صدورهُنْ ذِكرى وْصُوَرْ ! لكِنها ما تِتْنَسْوَنِ وْتِبكي .. على خطواتِها المَجدِ انتَثَرْ ! وْفي المعرَكِهْ ، ذَلُّو الأَعادي والسكاكينِ انطَفَتْ .. وِالقولْ ، لـَمَّا تْبَهدَلِ الغاصِب ، سَكَتْ .. والبَسمِه فوقِ شْفافْ هالباغيْ بَكَتْ .. لَمـَّا إلهِ الكونْ وفَّقها ونَصَرْ ! هاذي سمَرْ ! عاشَتْ عزيزِه وِحْلـَوَّتْ غَلاوِتها لمَّا المَجِدْ في هَوا رِيّاتْها شَهَقِ وْزَفَرْ ! وِتقولْ للأَغرابْ والغُربانْ وِكلابِ السـِّكَكْ .. ما يْرَجـِّعِ الحقِّ اللي سَكتَتْ خيمْتـُه طَقِّ الحَنَكْ .. أرظي لأَهليْ .. وِانتو حْظورْكو فِتْراب إيماني كَفَرْ ! يللـَّهْ على بَرَّهْ !! لَبَرَّه انقِلعو يا شِلـِّةْ نَوَرْ ! بِكْفي نظافِةْ زيتْنا سَمِّ وْعَكَرْ ! والعُرسْ ، يومِ العُرسْ دَبكِتها شَرَرْ ! وكإنـِّي شُفتْ عالأرِظْ طرَّاحَه من نورِ وْطُهُرْ .. وْعلى الطَّراحَهْ قاعِد سيِّدنا " عُمَرْ " !! واللهْ ما يِعقِد عَقِد هالشَّهيدِه عالشَّهيد غيرَك يا سيِّدنا " عُمَرْ " !! هاذي سمَرْ !! ***************** ( 5 ) طَفى قناديلو الْوطنْ ، غِفي بَكـِّيرْ فِخْيامو السَّهَرْ ! خَلَصِ النهارْ ونامَتْ في شوارِعها المُدُنْ .. نامِ التـَّعَبْ .. واللـِّي سرَقْ بيتيْ كَسَر بابو .. جرَحْ دَفا حِلمي تَيصادِرِ ثْيابو .. قَتَلِ وْبِكيْ .. وبِلسانْ " تِمساحو " اعتَذَرْ ! لكِنْ عذابِ اللي احترَقْ قلبو على بيتو ، ما سامَحِ المجرِمْ على جُرمو الحقيرِ وْما غَفَرْ ! نامِ التَّعَبْ ، والحِلِم قام من نومو تيِتعَكـَّزْ على دْموعِ العَتَبْ .. غسَلْ وِجُو بعِدْ ما سوَّدلو وِجُو خْنوعِ العَرَبْ .. وانصابَتِ زْنودِ الشهامِه بالخَدَرْ ! والمُبتَدا ما عُدنا نِسمَعلو خَبَرْ ! لكنْ سَمَرْ ، ما هَمّها إلاَّ ثَقالِةْ هَمّها .. واللي شِرِبْ يومِ العطَشْ من دَمّها .. واللي مَكَرْ .. واللي غَدَرْ .. واللي هَجَرْ .. وْما عادْ بَيـَّنلو أَثَرْ ! والعَتمِهْ ، لمَّا العتمِهْ تتخبَّى ورا ظِلِّ البَصَرْ ! والمارِقِ اللي أَكَلْ خُبزِ وْلادْها وْعَقّ وْنَكَرْ ! والكَلبْ لمـَّا حَظـِرتو يْصَدِّقْ زميلو اللي شِهِدْ بإنـُّو سِمعو في الغابِهْ زأَرْ !! لكنْ سمَرْ ، لِمجـَرَّبي ولِمجَرّبي بتِعرِفْ مينِ اللي يومِ المعركِهْ غابِ وْحَظـَرْ ! إمِّ الشهيد وْزوجْتو وأُختو ، وْبِنتِ الأَكارِم والظَّفَرْ ! بِنتِ الطَّهارَهْ والشَّطارَهْ تِعرِفِ الخَوَّانْ والنِذلِ الجبانْ ، وِتلَبـِّي نَدهِةْ هالأَذانْ ، إذا الآمِرْ أَمَرْ ! والعُرسْ ، يومِ العُرسْ دبكِتها شَرَرْ ! وْلَمـَّا زفافِ الحُرَّه يُطرُقْ بابْها .. وْيِرجعوا يومِ " الخَميسِ " حْبابْها .. والله ما يِعقِد عَقِد هالشهيدِه عالشَّهيدْ ، غيرَكْ يا سيـِّدنا " عُمـَرْ " !! هاذي سَمَرْ ! ( 6 ) هاذي سمَرْ ! هاذي اللي قَعدَتْ على رْمالِ الشَّواطي .. وْما بَنَتْ قَصرِ الأَماني من رَملِ وْوَبـَرْ ! تِحكي لـَسـَمكـِةْ هالبَحِر عن جوعْها .. وصيادْها اللي راح وما رِجِع لَرْبوعـْها .. سِمعَت بَحـِرها يقول : يا بـْنـَيـِّه ، صـُبـِّي إِديكِ عا إِديكِ وإغِسلي وِجهِ النـَّدى ! وتوَظـِّي تَيصـَلـِّي حـَنينـِكْ ! دينِ الأَرِظْ دينِكْ ! واندَهي ، يِمكِن حيطانِ " البيتْ " تِسمَع هالنـِّدا ! وهاذي اللي ظَلـَّت هونْ تُحرُسِ غْيابِ الأَهِلْ .. هيـِّهْ سَمَرْ .. أختِ القـَمَرْ .. هاذي فلسطينِ الطَّهارَهْ والتحدي والظـَّفـَرْ ! ويقـُلّها : يا ميمـْتي ما يـْظـَلّ في الوادي الوَفـِيْ إلاّ زْنودِك والحـَجـَرْ ! أصدَق عـِبـَرْ .. ثايِر ثأَرْ .. هادِر هـَدَرْ .. يومِ الفرَح قـَرَّبْ ! لا تـْجـَرّبي مـْجـَرَّبْ ! بالبُقجـِه قومي أُرُقصي وتغَندَري يمـَّه على كيفـِكْ ! " واندَهو لَولادِ عـَمّه ييجولو واندَهو لولادِ خالُه ييجولو ! " بالبُقجِه قومي أرقصي وتغندري يمـَّه على كيفِكْ ! أنا اللي كـَنتِ وْبـَعِدني بيومِ الوَغى سيفـِكْ ! ثوبـِكْ أنا إن بَردَتِ دْموعـِكْ ! نورِكْ ، إذا رْياحِ الأَعادي طـَفـَّتِ شْموعـِكْ ! وْلـَو صادَروا شَمسـِكْ أو بلـَّلو صيفـِكْ ! وْكـِسرِة خـُبـِز لو جاعـَت دْروبـِكْ ! وصـُرمايْتـِك لو دروبـِكْ جرَحها الشوكْ .. أو انجـَرَح فوقِ الأَرِظْ طيفـِكْ ! لـِكْ درِدبي وتغندَري يمـَّه على كيفـِكْ ! قلبي أنا بيتيْ ، وبيتي أنا بيتـِكْ ! إنتِ إِلـِك هالبيت وحَظـِرتي ظيفـِكْ ! يوم العُرٍس قَرَّبْ .. يومِ اللي يِرجَع فارسِ اتغـَرَّب ! وانتِ الشهيدِه الحـَيـِّه ، وشعبـِكِ الحيّ الشهيدْ .. ونَسـْلـِكْ اللي مـْرابِط بهالأَرِظْ ورجالـِكْ قـَدَرْ !! والله ما يِعقِد عقـِد هالشهيدِه عالشَّهيد ، غيرَك يا سيـِّدنا " عُمـَرْ " !!! هاذي سمرْ ! هاذي سمرْ ! هاذي سـَمـَرْ !. |
||||
أدوات الموضوع | |
انواع عرض الموضوع | |
|
|
|