(يا مَن للعُمُر مِلحه ـ حكمت البيداري/ رقم الايداع : ح.ب/ 04 / 2014) - ۩ أكاديمية الفينيق ۩



لِنَعْكِسَ بّياضَنا


« تَحْــليقٌ حَيٌّ وَمُثـــابِر »
         :: رفيف (آخر رد :عدنان عبد النبي البلداوي)       :: الزمن الأخير (آخر رد :حسين محسن الياس)       :: ،، نهرُ الأحلام ،، (آخر رد :أحلام المصري)       :: صَمَتَ الليل؟ (آخر رد :أحلام المصري)       :: لغة الضاد (آخر رد :عدنان عبد النبي البلداوي)       :: إلى السارق مهند جابر / جهاد دويكات/ قلب.. (آخر رد :أحلام المصري)       :: لنصرة الأقصى ،، لنصرة غزة (آخر رد :محمد داود العونه)       :: السير في ظل الجدار (آخر رد :محمد داود العونه)       :: إجراءات فريق العمل (آخر رد :محمد داود العونه)       :: بــــــــــــلا عُنْوَان / على مدار النبض 💓 (آخر رد :محمد داود العونه)       :: إخــفاق (آخر رد :محمد داود العونه)       :: جبلة (آخر رد :محمد داود العونه)       :: تعـديل (آخر رد :محمد داود العونه)       :: إنه أنـــــــا .. (آخر رد :الفرحان بوعزة)       :: أُمْسِيَّات لُصُوصِيَّة ! (آخر رد :محمد داود العونه)      


العودة   ۩ أكاديمية الفينيق ۩ > ▂ 📜 ▆ 📜 دار العنقاء 📜 ▆ 📜 ▂ > 🔰 سجلات الايداع>>>

إضافة رد
 
أدوات الموضوع إبحث في الموضوع انواع عرض الموضوع
قديم 02-07-2016, 04:01 AM رقم المشاركة : 1
معلومات العضو
المنظمة العربية للاعلام الثقافي الالكتروني
المنظمة العربية للاعلام الثقافي الالكتروني

الصورة الرمزية المنظمة العربية للاعلام الثقافي الالكتروني

افتراضي (يا مَن للعُمُر مِلحه ـ حكمت البيداري/ رقم الايداع : ح.ب/ 04 / 2014)


عُيونَك الحُلوات ..
ـــــــــــــــــــــــــــــــ

عيونك الحلوات
يابعد عيني وماي عيني، سِحرنّي
إسمـ الله عَلّيهِن، الله واكبر سِبنّي ..
عُيونَك الحُلوات ..
لعشرت احبابي وسوالفهم خِذِنّي
لأحلى أيام عُمري وشبابه رَجّعَنّي ..
بيهم شفت كل الوطن
كل العراق الحبيب الغالي ..
من جنوبه لحد شروقه
من غروبه للشمالي ..
وشفت دجله والفرات
أبو الخيرات وميّه الزُلالي ..
گاع وسما، بشر ونخل
الرؤوس مرفوعه للعالي ..
عُيونَك الحُلوات ..
فِدّوه الهِن، فِدّوه ارّوح
نَظّراتهِن تِجّن، تِسلِب الرّوح ..
عُيونَك الحُلوات ..
يابعد عيني وماي عيني، أذبحنّي,
والله أذبحنّي



مزمن وجع
ـــــــــــــــــــــــــــــ

مزمن وجع ..
روح وجسد أحس بيك
مزمن وجع ..
بحلو العمر متمرمر الآگيك
لیش تتصنّع آلفرحه ؟
من تحاچيني وأحاچيك
اترك للزمن جرحه
تراه، ماغيره اليداويك
کافي تحلم بالوهم ..
حلم الوهم تاليها يأذيك




هذا عهدي وياكم
ــــــــــــــــــــــــــــــــــ

أضحك ..
يل أنتَ وصاحبك عالي ضحككم
ياهو بيكم ومنكم شريف
مو ذيج العراقية، أمكم، أختكم
هاي المتوسده كاع الرصيف
كروشكم شبعانه
بما لذَّا لها من الحرام وطاب
وجيبوبكم مليانه
وك حرامي ومصاحبله نهاب
بالك تظن يحميكم المحتل
لو حاكم طهران وقم ومشهد
يجيك يوم وياه تسَّحسَل !
ومصير ركابكم بالحبل تنشد
هذا عهدي وياكم
وباجر التاريخ عالعهد يشهد




يابن الحلال
ــــــــــــــــــــــــــــــــــ

يا أبن الحلال هَدّي
حَبّه حَبّه
مِنك أنا ودّي
حَبّه حَبّه
مِن ريحان عودك
مِن تُفّاح خُدودك
أنطيني حَبّه
يا أطيب من العَسّل
طَعم وأمل
لوتدّري بيّا شحصّل
سِحرتني نظرّات عيونَك
بيهم صِرت مَجنونك
بالشعبي تتعرب
صِرتلك مخبّل
يل تمشي تتمَختَر
الله، الله وأكبر
عالي وتظل يا گُمر
عَلّينا تتأمّر
يابو حِسّن چَتّال
ماچذّب من گال
مِن الجَنّة أنتَ المَلك
ويمكن أكثر




يا مهاجر
ـــــــــــــــــــــــــــ

بعدك تذكر لو ناسي
حنن گلبك لتظل قاسي
أحنا الچنا أحبابك وأهلك
وتصيح إلنا، أعز ناسي ..
يا مهاجر
بعدك تذكر لو ناسي ..
عشرتنا مو ليلة ويوم
دم ونسب، أهل وگوم
ذاك الزاد وذاك الملح
أخوه وصحبه، صلاة وصوم ..
يا مهاجر
بعدك تذكر لو ناسي ..
ديرتنا ويانا الضلت
وبيوتها الذيج حبيبه
مايوم من عدنا تخلت
ربتنا بدلال وطيبه ..
يا مهاجر
بعدك تذكر لو ناسي ..
شوگ البينا يصب نهرين
فرات ودجلة، جبل و وادي
مثل عراگنا نِلگه وّين
گاع الخير تبقى بلادي..
يا مهاجر
بعدك تذكر لو ناسي ..
عزيز الوطن لا ميهون
ضميناه وسَّط العيــــون
مخلص وفي قلبه حنون
مو من عدنا البيه يخون ..
يا مهاجر
بعدك تذكر لو ناسي



أبتسم ارجوك
ــــــــــــــــــــــــــــــ

ابتسم ارجوك ولو لحظه ابتسمْ
ليش الحزن والهم على وجهك يرتسمْ
عيش عمرك ساعه ساعهْ
وإلا تندم على ضياعهْ
والندم كاساته سمْ
ابتسم ارجوك ولو مرة ابتسمْ
ياحبيب العمر واغلىْ
الدنيا حلوه وانت احلىْ
كل مصاعبها تهونْ
بسحر رمشك والعيونْ
اغمزلها اتصير سهلىْ
عيش عمرك ساعه ساعهْ
وإلا تندم على ضياعهْ
والندم كاساته سمْ
ابتسم ارجوك ولو مره ابتسمْ
اقترب مني تعالْ
انعيد ايام الوصالْ
يكفي تحرم روحي منكْ
احير من تسالني عنكْ
بُعدك الها هوايه طالْ
عيش عمرك ساعه ساعهْ
وإلا تندم على ضياعهْ
والندم كاساته سمْ
ابتسم ارجوك
ولو مره ابتسمْ
ياحياتي
ياصبر مرمر مهجتيْ
المن اشكي همومي
المن وانتَ علتيْ
كافي تظلم كَلبي كافيْ
عيوني تسهر وانت غافيْ
يمتى تضحكلي
يمتى ترجّع ضحكتيْ
عيش عمرك
ساعه ساعهْ
وإلا تندم على ضياعهْ
والندم كاساته سمْ
ابتسم ارجوك
ولو مره ابتسمْ



عندك أمل جرحك يطيب ؟
ــــــــــــــــــــــــــــــــــــــــــــــ

عندك أمل جرحـك يطيـب؟..
لا مِن قريب
لا مِن غريب
لا مِن عدو
ولا مِـن حبيـب
اطلب الرحمة مـن السمـا
هنـاك بـس تـلگه المجيـب
وي الناس يل تمشي بعدل
وسفـه تالـي ظـنـك يخـيـب
وانـتَ زارع خيـر
تحـصـد غير
وطمع حاسد يصيـب
طبـع شـر ونـغـرس بيـهـم
ذاك مـــن ذاك مـــو ذيـــب
المـا يعـض ايـدك بالنهـار
ينـهـش ظـهـرك بالمـغـيـب
طـيـب قـلـب كـافــي تـظــل
وك يا بَشـر امـرك عجيـب
شكـثـر صـابـك
مـنـهـم اذى
وعندك أمل
جرحك يطيب؟



ليش كل هَل القَسوه
ــــــــــــــــــــــــــــــــــــــــــــــ

ليش هَل القَسوه
ليش كل هذا الظلم
گلبي اليودّك مسكين
ياوسفَه، بحبُك ينهُضّم
عالي النَجّم إنتَ
عالي النَجّم
وأنّا على گاع الله
أبعينَك قِزّم ..
ليش كل هَل القَسوه
ليش كل هذا الظلم ..
بَشّر إحنا
هَم مِثلك بَشّر
وضّلوع بينا
مِن آدم وحوا
لانَعُبِد شَمِّس
لا نَعُبِد قَمَّر
أهِّل توحيد إحنا
وكِتّاب الله ..
عالي النَجّم إنتَ
عالي النَجّم
وأنّا على گاع الله
أبعينَك قِزّم ..
ليش كل هَل القَسوه
ليش كل هذا الظلم ..
هَم عِندَك گلُّب مِثلي
ينبُض يدِّك
ودّگاتَه ماأظِنها
لا ماأظِنها چِذّب
وعِندك عِيون
ياما بللِّت خَدّك
وكُل دَمعَه مِنهّا
مَعطّره بالحُب ..
عالي النَجّم إنتَ
عالي النَجّم
وأنّا على گاع الله
أبعينَك قِزّم ..
ليش كل هَل القَسوه
ليش كل هذا الظلم ..
للدّنيا جيّتنا
بآمر واحد احد
مُنّو البينا
اختار أمّه لو أبوه؟
لو جِنسه يكون
بنيّه لو ولّد
وكلّمَن علَّى دين أهله قيّدوه
عالي النَجّم إنتَ
عالي النَجّم
وأنّا على گاع الله
أبعينَك قِزّم ..
ليش كل هَل القَسوه
ليش كل هذا الظلم



يا صحبه ، يا أحباب
ـــــــــــــــــــــــــــــــــــ

لا أحنا سود القلب
ونخون صحبتكم
ضميرنا حي مو خشب
وننكر مودتكم
مهما غبنا ونروحْ
نبقى حمام الدوح
أعزاز عدنا وأهلْ
ونفس يرد الـروح
وعيون نظل عالباب
مشتاگة شوفتكم



مجروح
ـــــــــــــــــــــــــ

وين؟؟
منو اليضمدك
الـ ترتاح له الروح
الدِنيا غَدّاره تضدك
الـ يضحك لها ينوح
الناس حولك شياطين
لا تصدها رحمه لا دين
لا تأمن كفّك لكفها
ولو سلمت, بالظهر سكاكين
مجروح ..
اصبر على بلوتك
للرب تضل شكوتك
هو اليحس علتك
يا من لآجل طيبتك
خلاك الزمن مذبوح ..



رن
ــــــــــــــــ

يمتى ترن
وقلبك على قلبي يحن ..
بنتظارك,
كل احساسي الك
راحت تجن ..
رن ..
هاك اسمع,
صوت روحي
وهي تتألم تون ..
سكتتك,
عذبتني
مرمرتني
عيشتني بسجن ..
يا مَتىَّ تخلص
أيام صَدّك يا ظالم
لحبي ترجع
كامل الأوصاف سالم ..
عندي أمل
رغم المحن,
باقي أنتَ هَذّاك أنتَ
ما غيرك يوم غدر الزمن
رن



إِحچي
ــــــــــــــــــــــــــ

إِحچي گوَل لا تَسْكُت ..
خَل الدّنيا كُلها تسمَعَك
قابلهُم عين بعين ..
ولا تَرخِص أبد دَمعَك ..
يَلّي غْفَيت ..
متَلَحِف حُزْنِك نَمَت
عَللي صَوْتَك ..
إِكْسِر أَبْوَاب الْصَّمْت
إِحچي گوَل لا تَسْكُت ..
تَنْدَم إِذَا ..
بِوَجْه الْخَوْف مَاگمُت
تِخْسَر إِذَا ..
للْوَهْم أَمْرَك سَلَّمت
إِحچي گوَل لا تَسْكُت ..
بَالك يَوْم..
تَشْعُر وَتُحِس نَدَّمّت
صَارَت گوَل..
عِبْرَه وَمِنْهَا تَعَلَمت ..
إِحچي گوَل لا تَسْكُت



لابد يوم
ــــــــــــــــــــــــ

لابد يوم, نشعر بالندم
نمر بهموم, يا أذينا ألآلم ..
صعبه نطوي قصة حُبنا
الشوق واللوعة تعذبنا ..
وعيونا, يذبلها السهر
مو بس دمع, نبچي دم ..
لابد يوم ..
أتمنا لك, من كل قلبي
تعيش أحلامك, مثل الطير ..
من كل روحي, اطلب وادعي
كل أيامك, سعادة وخير ..
بس يا خوفي ..
عِشق البينا, ما يخلينا ..
بعز النوم ..
يصحى يفز, ويصحينا ..
وعيونا, يذبلها السهر
مو بس دمع, نبچي دم ..
لابد يوم ..
لا مو سهله ..
ننسى العشرة والعمر ألفات ..
اشتسوه الدنيا ..
من غير ماضي وذكريات ..
هذيچ أيامنا,
لتظن ترجع وترجعنا ..
وسفه وحيف,
ضاعت منّا, وضيعتنا ..
وعيونا, يذبلها السهر
مو بس دمع, نبچي دم ..
لابد يوم



من يوم يومَك عَنّيد
ـــــــــــــــــــــــــــــــــــــ

من يوم يومَك عَنّيد
وياك الحَچّي، ميفيد
ياما نصحتك
أمسح دمعتك
خَلّي لضحتك
كل لحظة عيد ..
مِن يوم يومَك عَنّيد ..
ياريت كِثر الحِزن
يرجِّع الفات
وعقل عاقل يجّن
يرتاح بالآهات
العُمّر إلنا يدوم!
يا للأسف هيهات
والجاي مِن الأيّام
باچِر تصّير بعيد ..
ياما نصحتك ..
اتحمّل النّاس
عالحِلوه والمُره
لا تجرح إحساس
سامح الف مَره
كاس النَدّم مَعلوم
ترا ما ينجِرّع مُره
هنيال مَن عاش
بضّمير وقلب سَعّيد ..
ياما نصحتك ..
طبعَك حُلو خَلّيه
مِثل العَسَّل صَافي
ومن يسئلك أنطيه
أدعيله با لعَوافي
ولو نخّاك مَظلوم
أركضله بِجِدم حَافي
الأخوّة بين البَشّر
مَحبّة وسَلام اتزيد ..
ياما نصحتك ..



يا مالك روحي
ــــــــــــــــــــــــــــــــــ

يا مالك روحي بودك
بكبر عمرك , قلبك
رغم كل تجاعيدك
رغم شيباتك احبك..
اتعجب على الـ ينسون
من العمر ما فات
العشره لا ما تهون
الا على البذات ..
يا بو قلب صافي
بحضن الهوى غافي
اتحمل تغيب!
اكذب
هيهات أبد, هيهات ..
أنتَ يا حزام الظهر
للشدة , للكلفات
ارض ما مرها النهر
لو لاك الحياة ..
يا عمد بيتي
يا ستري وحميتي
يا ابو اولادي
بنين وبنات



هذا العراقي
ــــــــــــــــــــــــــــ

هذا العراقي
عَلـَّى آصله باقي ..
وَفّي ومَثّل لأهله
عاشق مُغرم بگاعه
ونهرينها المِنهن رضّع ..
هذا العراقي
عَلـَّى آصله باقي ..
مقدام حُر وابي
نشمي وحلوه أطباعه
عالي هامه وما ركع ..
هذا العراقي
عَلـَّى آصله باقي ..
صادق وعادل يضل
للصُحبه ميل ساعه
شما صابه مِنهم ما وگع
هذا العراقي
عَلـَّى آصله باقي ..
دوم شرّاي غداره
ما يوم باع مَن باعه
ومِن غير چَدَّه ما شبّع ..
هذا العراقي
عَلـَّى آصله باقي ..
ترخص روحه للطيب
يمينه يصير وذراعه
وللعطشان مَحنَّه ، گلبه نبع ..
هذا العراقي
عَلـَّى آصله باقي ..
يمشي للكلفات مبحِر
عالي رافع شِراعه
جَسّور وشايل
طبع السَبّع ..
هذا العراقي
عَلـَّى آصله باقي



وك صَبره
ـــــــــــــــــــــــــ

صَبره, لگلبك الطيب
وك صَبره
لابد يجينا يوم تفرج
وتطلع الگمره
شما سدو من البيبان
شما علو من الحيطان
على دگات گلبك وگلبي
وشريعة ربنا بالفرقان
تتفلش تصير تراب غبره
وجسر المحبه للسما, سوا نعبره



ارجوك
ـــــــــــــــــــــــــ

لاتقول بعدك تبيني
في حبي هايم
لاتصحي الجرح فيني
خلّه نايم
يكفي منك مابدر
يكفيني
صعب أنسى الغدر
اعفيني ..
مخنوك
مااطيق الهوى من صوبك
ولاحتى النَسايم
ارجوك ..
خلك بعيد عني
قربي لاتصل
أبد مالك معي
غير الفشل ..
الروح مني
صابها علت ملل
كيف اعيش
بجسد ماالو أمل ..
ارجوك ..
ماعاد يفيد الكلام
تعبت من العتب
أتركني أستريح ..
تراه الندم ما يقدر
يجمع قلب مكسور
ويرده صحيح ..
ارجوك ..
حكاية حب كانت، بيننا
كانت أحلى مافي الدنيا لنا
وغلاها ، من غلا نور عيوننا
أنتهت، ياحيف ضاعت ..
وضاع معها عمرنا ..
مخنوك
مااطيق الهوى من صوبك
ولاحتى النَسايم
ارجوك ..



يامعوّد
ــــــــــــــــــــــــ

تصّد مِن أحّاچيك
ليش يامعوّد
خيّبت گلبي بيك
وغيرك فلا ودّ
يَل ماتِحّن عالفؤاد
رايح أجّن كافي عاد
لهّذا الظُلم يافلان
يمتى تضّع حد
يامعوّد ..
لِعبه صرّت بيديك
أسّير أسرني
بأصغَر أصّابيعَك
خاتم تُفّرني
وكّلت ربّي عَلّيك
ماغيره أحّد
يامعوّد ..
حِرت أشلّون أرّاضيك
زَعلك مرمُرني
أشّرلي وأنّا أجّيك
أگلّك أأمرني
مراسيل الّك ودّيت
مِنّك فَلا رَد
يامعوّد ..
خُبزه بوسّط تَنّور
روحي لحُطلك
نار وعَلّيها أدّور
فدوه ترخَصلك
ارحَم دَمّع عيناي
لنزلت عَلى الخد
يامعوّد



يا صاحبّي
ــــــــــــــــــــــــــــــ

إللي ما يجي أبطخ الراس
ما يجي گوّه
شلك على أبن الناس
غير المروّة
بالك تمد أيدك
للگال ما أريدك
كلمة العُمر تسوه ..
يا صاحبّي
بحكم الصدّاقة
أريد أسالك
گوّه إللي يحب
لو بس الك
اتركهُم وعوف
والدوُّر يشوف
يرخّص لك الأغلى
بالك تمد أيدك
للگال ما أريدك
كلمة العُمر تسوى ..
يا صاحبّي
درب العِشّگ
شوك وزلّگ
كلمن يُمر فوگه هلك
أتسمّى بالله
وأبعِد عَن الآه
ضحكات الفَرّح أحلى
بالك تمد أيدك
للگال ما أريدك
كلمة العُمر تسوى ..
يا صاحبّي
على الغِدّر بيك وبّدلك
أصبر بعّد دورة فلك
يرد لك ردود
دموعه على الخُدود
بِل خَلاك، خَلَّى
بالك تمد أيدك
للگال ما أريدك
كلمة العُمر تسوى ..
يا صاحبي



الناس معادن
ــــــــــــــــــــــــــــــ

يَاصَاحِبي
الْنَّاس، تَرَاهَا مَعَادِن
ذَاك مِن ذَاك
مَعْدنّ ذَهَب
وذَاك مِن ذَاك
مابيه عيب وعِلّه
أنصَحّك ..
أَفْرُك صَاحِبَك زيِّن
حتى تعرف من يا مله
شنْهُو فَصْله
وشنْهُو أَصْلُه
لَابُد
يِجِيلك يوْم
بيهم تنصدم ..
ويَّ الَّشِّيْن منْهُم
من تمشي تَتَعَثَّر ..
عَجْن مَعْجُوْنَيْن
بِالْحِقْد وَالشَّر ..
هَذَا طَبْعُهُم
من الْمَهْد
مَن الْحَلِيْب
من الْظُّهْر ..
يَاصَاحِبَي ..
مهما حاولت
ما يتَغَيَّر البيهم
أكيد موسهله ..
حيل صَعْبَه
وهاي خُصّلَه ..
بس ..
لَاتگطَع أَمَل بِالْطَّيِّبِين
هَمُّه نَص الْبَشَر وَأَكْثَر
وبِيْهُم تَحَلَّى الْحَيَاة
تزهي سعادة وفرح
وَالْدُّنْيَا بِمَحَبَّتهم
تكبر وتُعَمِّر
وبس ..
هيج بشر
وهيج إنسان
وبهذا الزمان
هْنِيَّال من صادفه
هنيال, هنيال
من يحَّصِّله



مليتك يا بو وجهين
ــــــــــــــــــــــــــــــــــــ

روح ..
مليتك ياأبو وجهين
ارحمني من كذبك ..
بيّا غدرت عين بعين
يل ما خفت ربك ..
يا مسبب جروحي
يا سجان روحي ..
خليني أنساك, روح
اتركني أنساك, روح ..
عِشرة محبتك سم
مَرمُرّتني حيل
أيامي تمضي بهم
من الصبح للّيل ..
شوفتك تذبحني
أرحل وريحني
ما بيا أتحمل
ماضل بعد حيل ..
يا مسبب جروحي
يا سجان روحي ..
أدريها مو سهله
خسران كل عمري
ما ضل بعد مهله
لا بيدي لا بآمري ..
إلي بنيته أنهدم
لا فاد وسفه وندم
أتحملت ما يكفي
لهنا خلص صبري
يا مسبب جروحي
يا سجان روحي



لا تعاتبني
ــــــــــــــــــــ

لا تكَلمني
مَاعَاد، بَيْنَك وَبَيّنْي كَلام
لا تناظرني
الْدُّنْيَا فِي عَيْنَي ظَلام
عَنِّي أَبْعِد، ضَل بَعِيد
لا تَظّن، نَدَمك يِفّيد
لا تُعَاتَبَنِي لا
اشُودَّه وَاشْجَاب الْمَلام ..
ضَاعَت أَيَّام الْصَبَر
وِيَّاك يَاكَذّاب
يَامَن بِنَالِي قَصَّر
كُوْمّة رَمُّل وَتُرَاب
تَّوْبَه أرْجْعَلك وَأَحِن
عَقْلِي بْغَرَامَك يجَّن
عَيّشْتَنِي عالأَمّل
تَالِي وُعُوْدَك أَوْهَام
عَنِّي أَبْعِد، ضَل بَعِيد
لا تَظّن، نَدَمك يِفّيد
لا تُعَاتَبَنِي لا
اشُودَّه وَاشْجَاب الْمَلام ..
بِالْحُب مَاضَل صَدِك
وَيَن الْوَفِي، وَيَن
الـلِي عَلَّى صَدْرَه يُدُّك
يَلْعَب عَلَّى الحْبلِين
كَلامِه مُجَرَّد جِسر
وَالغَدّر مَّوَدَّة عَصّر
وِالْخِيّانّه بِالعُشك
خَبَّر عَادِي بَهَل الأيَّام
عَنِّي أَبْعِد، ضَل بَعِيد
لا تَظّن، نَدَمك يِفّيد
لا تُعَاتَبَنِي لا
اشُودَّه وَاشْجَاب الْمَلام ..



مُشتاگ
ـــــــــــــــــــــــــ

مُشتاگ الكم ..
محتاج ..
اسمع طاريكم
سوالفكُم, صوتكُم, حَچيكُم
محتاج أصيح, حيل أصيح ..
بعلو صوتي, بأسَّاميكُم ..
أنا ..
بفراگُم ما بُطّل نوحي,
متعذب, وأعذب وياي روحي ..
لو تجوني, لو ميت اجيكُم ..
اگّول ..
متندم ترا والله قليله,
مذهول عقلي, منصدم
بيا الجسد منهدم, منهد حيله ..
آه ..
احس تعبان قلبي ونفسي عَليله ..
آه ..
كل لحظه من عُمري تُمُر,
اجبر كسر, ينكسر مية كسر
وادري تالي رماد يصفى الجَمُر ..
عايش ..
على الأوهام
أصحى وأنام
خيال وصُور ..
دارت الأيام
ضاعت الأحلام
ما ظل أثر ..
ياحيف ..
الناس تاليها صفت !
أشكال والوان أتغيّرت ..
شابت والظهور انحنت,
بالوجوه التجاعيد حفرة ..
كل شي بيها يبس وتحجّر,
قلوبها, مشاعرها, أحّاسيسها
الله, الله واكبر, صارت صخر,
بعد شيفيد؟
شيفيد لو ينزل مُطر ..
هيهات ترجع عود اخضَر ..
هيهات ..



اتقاسَمِت روحي وياك
ـــــــــــــــــــــــــــــــــــــــ

ظالم وگلبك قاسي
مايوم رحّمت أحساسي
أنطيتك وماخَلّيت
نَفس الطبُّع ظَلّيت
أتقاسَمّت روحي وياك
حتّى أنفاسي
ظالم وگلبك قاسي ..
يل طاعِن بيّه الفؤاد
جُر خَنجرّك كافي عاد
نَشَّفِت جِسمي مِن الدَّم
شَنزِفلك بَعّد والهَم
حرّگني حرّگ
خَلاني حفنة رَماد ..
أنطيتك وماخَلّيت
نَفس الطبُّع ظَلّيت
أتقاسَمّت روحي وياك
حتّى أنفاسي
ظالم وقلبك قاسي ..
عَنّي دظّل بعيد
دظّل ليغاد
للعُمُر ظَنيتك عيد
وعِز المُرّاد
أندِم، النَدّم شيفيد
أسامِح, جروحي اتزيد
كابوس حُبّك چان
ياريته أبد ماينعاد ..
أنطيتك وماخَلّيت
نَفس الطبُّع ظَلّيت
أتقاسَمّت روحي وياك
حتّى أنفاسي
ظالم ..
ظالم وقلبك قاسي



أرّيد أذَّكِر واحد ناسي
ــــــــــــــــــــــــــــــــــــــــــــ

أرّيد أذَّكِر واحد ناسي
أحنن بيه گلبه القاسي
لا مَكّان ولا زَمّان
نَسّاني حُلّو أحلامَه
ليليَّه أسهر حيران
أتأمَّل تِرجع أيامَه
مِن غيره عايش مَخنوگ
عَلَّى لحظَه تِنگطِّع أنفاسي ..
أريد اگلّه بالك تظِّن
هَجرَك ينسّينى الرّاح
أسمَك عَلّى شِفتي لحّن
بِغنوتَّها روحّي تِرتاح
إرجَع يامَن چِنّا وچِنِت
غير الوفَّى ويانا أشّفّت
يل ضيّعت عُمرَك سَفّر
ياطير ما تعبله جِناح ..
لا مَكّان ولا زَمّان
نَسّاني حُلّو أحلامَه
ليليَّه أسهر حيران
أتأمَّل تِرجع أيامَه
مِن غيره عايش مَخنوگ
عَلَّى لحظَه تِنگطِّع أنفاسي ..
كافي هَجّر ديلّه إِرجَع
طوُّلِت يافلان الغُربه
ليمتى أظل بيك أتلوَّع
فَرگِتَّك والله صَعبه
تألمني حيل الأشواگ
يا معذّبني وين الگاك
مُرلي بحِلِم ولّو مَرّه
اقبلّها مِنّك لو كِذبَه ..
لا مَكّان ولا زَمّان
نَسّاني حُلّو أحلامَه
ليليَّه أسهر حيران
أتأمَّل تِرجع أيامَه
مِن غيره عايش مَخنوگ
عَلَّى لحظَه تِنگطِّع أنفاسي ..



ياساهر الليل
ـــــــــــــــــــــــــــــــــ

ياصديق العمر ياطيب
یاسهران
ياسائل الليل بسماك
ليش تعبان
مهدود حيلك أشوفك
عاشگ ولهان
تسأل عن القسمة
وعن النصيب
والرابح
والخسران
سمعت الليل
أشگلك
كلامه عدل
حگ الميزان
صدگ الليل ماكذب
كلامه أمان
خلي الأمل
خَلّيه دوم وياك
والك عنوان
گللي
هم أبيوم سمعت
وللا شفت
وكف الزمان
وللا الشمس زعلت
وبطلت تطلع
ونورها يبان
ياصديقي
يكفيك أتعيش
مرتاح الضمير
سعيد فرحان
ودگات گلبك
خلها أتزيد
لعمل الخیر
والأیمان
أحلم
وحقق أحلامك
ولولا الهمة
الحديد مالان
موعجيبه
ولاحرام
يتحقق حلم
للأنسان



كذب مِن گال
ــــــــــــــــــــــــــ

كذّب مِن گال، كذّب
سهل الگه، مو صَعب..
مثلك اصّادف مُحِب
اعشگ وگلبي يحِب ..
روحي ماهامَت ..
وأبد منّي الدَمّع لغيرك يصُّب ..
يا أطيب ويا .. سيد الناس،
بالدنيا كلها والكواكب والشُهٌّب ..
يا جَميل، يا نَبيل إحساس ..
يا صَادق مَشّاعِر، يا نبع، يا عذب ..
خَل يگول من گال ,, يحلَم؟
اي نعم، اي أحلَم ..
ويا مَحلى ويّاك الحِلِم ..
واذا گال ,, مَجنون الهوى بالدّم؟
مَجنون يل ماالك بشجرة الحب,
مثل الحبايب, گلب مطعون بسهم,
وحرفين من أول حروف الأسّم ..
يا عذول، يا حَقود النَفِس،
گلي يمتى تتوب، تندم تحّس ..
المَحَبَّة، مِن خِلقت الله،
بگلوب البَشّر سرها خَلّه،
طين ونفّخ بيه النفَس ..
يا محروم ..
ظَل إلهَم هَم على هَم،
ومِن الحَسّد والغيرة إجرع ..
طَعم المَراره سَم ..



يا مَن للعُمّر مِلحه
ــــــــــــــــــــــــــــــــــــ

يا مَن للعُمّر مِلحه ..
يمتى تحن لهَوّاك
وشوگ البيك يصحى
گلبي غَدى بِليّاك
ما يلتِئِم جَرحه
ناطور ليلك أظل
لا بُد يجي صُبحه
عايش عندي أمل
حزني يصير فَرحه
أنا الما قَصّرت ويّاك
لا راحتي لا صِحّه
جَسّدي وروحيَّ فِدّاكَّ
يا مَن للعُمّر مِلحه



يا طيبة العراقي
ـــــــــــــــــــــــــــــــــ

يا طيبة العراقي
يا تمر نخلتنا
يا لبن ديرتنا
يا خبزة التنور
من خير حنطتنا
يا گيمر المعدان
يا أستكان الچاي
يا ناگوط الطيب
من حِب الحبيب
طعم العسل وأحلى
صدگني يا خايب
روح الحياة
مو ماي
يا صوت الربابه
للفاگد احبابة
يا دگت العود
والجوزه جوابه
يا دبكة العربي
الأشوري والكردي
يا هجع جنوبي
يا ونة الناي
يا أبو الخيرات
دجله والفرات
يا مهد الحضارات
وبيت النبوات
يا سيف المجرب
والشاهد أعداي
هلا بيك
هلا بگلبك
هلا بروحك
هلا بريحتك
أحضنها وأشمنها
وأحبنها هواي
يل مني وبيا
يا بعد أمي وأبيا
دم وجسد
لاخر نفس بالريّا
أضل خويك
وتضل أخواي
التفرقه، بذرة فِتن
زرعوها أعداء الوطن
لا تگربلها وخلها
أتركها يا كلها العفن
هيَّ المرض
هيَّ الداي
لا تگلّي سني وشيعي
لا تگلّي عربي وكردي
لا مسيحي وصابئي
لا تركماني ويزيدي
ولا حتى اليهودي
گلّي عراقي ..
وأخذ عيناي




ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـــــــــــــ
عدد النصوص : (31) نص

المنظمة العربية للاعلام الثقافي الالكتروني
أكاديمية الفينيق للأدب العربي

يا مَن للعُمُر مِلحه ـ حكمت البيداري
المادة محمية بموجب حقوق المؤلف عضو تجمع أكاديميّة الفينيق لحماية الحقوق الابداعية
رقم الايداع : رقم الايداع : ح.ب/ 04 / 2014
تاريخ الايداع : 01 - 06 - 2014















  رد مع اقتباس
/
إضافة رد

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة نصوص جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 08:36 PM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لأكاديمية الفينيق للأدب العربي
يرجى الإشارة إلى الأكاديمية في حالة النقل
الآراء المنشورة في الموقع لا تعبر بالضرورة عن رأي الإدارة بل تمثل وجهة نظر كاتبها فقط