نِعمةُ الحاكِمْ عَ المَحكومْ

[محمد طرزان العيق]

نِعمةُ الحاكِمْ عَ المَحكومْ
*************************
شو مالِكْ يا ''ميركل''؟!٠٠
فضحتينا يا مَرَةْ ٠٠٠
شو هالضَّجة؟٠٠
وعلى إيش ؟٠٠٠٠
قال شو ''السي٠ آي٠ إيه٠'' بتتنصَتْ عليها !!!!٠٠٠

طيِّبْ ما إنتو طول عُمركُمْ هيك ٠٠٠
ما حدا فيكم يثَقْ بحدا٠٠٠٠

وبعدين شوفِي هاي ''إسرائيل'' المدللة إتجسَّستْ وبعِدْها بتتجَسَّس ع أمريكا!!٠٠٠
ومو بسْ هيك كم مرَّة سرقت معلوماتْ وتصاميم و أموال وحتى زوارق وغيرو وغيرو , من هونْ وهون [ قصدي من حلفائها الأوروبين والأميركان ] , حتى إنْها زوَّرت جوازات سفر دول صديقة إلْهَا متل كندا وأستراليا وفاتَت فيها ع دول عربية عِملَت عمايل وفضايحْ!٠٠٠٠
إيه والله !٠٠٠

شو يعني صار ٠٠٠عادي ٠٠
مو بيقولوا; ''الصديق وقت الضيق''؟!٠٠٠
وبِـ هالعالم عمْ بتصير شغلات أكتر من هيك بكتير ٠٠٠٠
شُوفي ومنشانْ أطمنِّك يا ''إنجيلا'' ،إحنا كمان''السي٠ آي٠ إيه٠'' عم تتجسَس علينا وعم بِتفوتْ حتى على غُرف نُومنا !٠٠٠٠
حتِّى وبدِّي أذيعْ إلِكْ سِرّ /وما حدا بيعرفو/ وأجري على الله ، وإن شاء الله بيسامحني على هالنميمة والغيبة بحقِّ النَّاس!٠٠٠٠
بتعرفي يا ستْ ''إنجيلا ميركل'' إنُّو''السي٠ آي٠ إيه٠'' بيشْيلو وبيحطُّو الزعماء عنَّا في بلادنا وبيقبْضوهُم رواتبهُم من أموال البترول تبعِتْهم!!! و إنُّو هُمِّ اللي بيعَيِّنوا الرجل المناسب في المكان المناسب!!!!٠٠٠
طبعاً والنسوانْ كمانْ ٠٠٠إيه والله٠٠٠٠

لِكْ والله إحنَا سَكتنَا وضحِكنا بِعبْنا فَرحانين٠٠٠٠شو بدنا أحسنْ من هيك؟!٠٠٠
في ناس عم بتفكِّرْ فينا وعنَّا وبتخطِّطْ إلنا ونحنا نايمين!!!٠٠٠ هاي من أكبر نِعَمْ الله علينا ، بسْ شو بدنَا نساوي ٠٠٠
دايماً في ناس جاحدين ٠٠٠ زيْ هادول الفلسطينية ٠٠٠قالْ شو ; بِدهم يرجعوا عَ بلادهم!٠٠٠٠٠
طيِّبْ إسرائيل يعني لوين تروح؟!٠٠٠
لَكْ عِملولْهُم للفلسطينيِّة مخصوص وكالة ''الأنوروا'' وكانوا يعطوهم زيت وطحين!٠٠٠
وفوق كلْ هاد مِش مبسوطين؟؟؟!!!!!!!٠٠٠
معلش سامحيني يا ميركل ، خَرجِتْ شويِّ عن الموضوع وهاي أنا راجعلو ٠٠٠
عنَّا مثلْ بيقول ''كَبْرِيها بتكبَر و صَغْرِّيها بتِصْغَر'' وإنتي حُرمِة أوروبيّة محترمه ومترَبَيِّة منيح ٠٠٠٠٠
فإعتبري هاظا ''أوباما'' أخوكي الكبير وغِلِطْ عليكي وبعدين لا توَاخذِيه !٠٠٠٠٠ا

إنتِ عارفِه أصولُه ومنين جاي وبِدنَاشْ هسَّا نقلِبها عُنصريّة٠٠٠٠٠
إنتو أصلاً وبالذاتْ، يا ألمَانْ بَعْدُو مغضوبْ عليكُو منشان المَرحومْ هِتلر وإللِّي عِملو٠٠٠٠
أسُكتي أحسَن ما يفَيّعُوا عليكِي إسرائيلْ ٠٠٠٠٠٠٠
ما بتتذكري شو صار بـ ''كورت فالدهايم'' أمين عام الأمم المتحدة ورئيس النمسا السابق، و بِـ ''أولف بالمة'' رئيس وزراء السويد؟! ٠٠٠٠
ما بتِتذَكَّري لمَّا زِعلوا من ''كلينتُون'' / وهو رئيس أمريكا نفسها/ وكيف جابولو ''مونيكا لوينسكي'' ، اللي شلَّتْ عَرضُو وطلَّعتو مفضوحَاً من ''البيت الأبيض''!٠٠٠٠٠

وبالأخير هايْ إحنا العرب وحكَايِتنا مع الأميركانْ٠٠٠٠٠٠
لَكْ عم نعطيهم البترول ،لأ -عفواً- همِّ عم ياخْدُوه، بِبَلاشْ!٠٠٠ واللِّي بدْهُم إيَّاه بِنسَويِّه و مُو خَالصينْ !
و هاي ''السي٠ آي٠ إيه٠'' عم بتلاحقْنا عَ الدَّعسِة وعُمُرنا ما صرَخنَا '' آيْ'' بلْ وبالعكس دايما بنْقولُ ''إيهْ''!٠٠٠٠
خلَصْ أسُكتِي وبلا دُوشِة ٠٠٠
سِعرِكْ بسِعرْنَا!!!٠٠٠وإزا يعْنِي كُنْتي ألمانيِّة٠٠٠
عند''السي٠ آي٠ إيه٠'' مافِي لِحيِّة مُمشَّطة وكُلنَا سَواسِية٠٠٠٠
والله يديم ''اليانكي'' عَ رُوسنَا ورُوسكُمْ ٠٠٠٠ وهيك أنا بَرِّيتْ ذِمْتِي والسَّلام!٠

عَليِّ الطَّربوشْ إنِّكْ ضيعْتِي لي وقتي خَيْتَا ''ميركل''-معلش سامحيني رَفعْتْ التَّكليف- لإنَّا ''في أكْلِ الهَوَا ٠٠٠
سَوا'' واللي ''بيشوفْ مَصايِبْ غيرو بِتهُونْ مصيبتُه''٠٠٠٠٠

والله نسِّيتيني الموضوع إللي كُنت بدِّي أحكِي عنُّو٠٠٠٠
الله يسَامْحِك!٠٠٠٠

د٠ محمد طرزان العيق
22.12.203

[نوال البردويل]

الحمد لله شو بدنا أحسن من هيك وميركل زعلانة ما فهمت من شو
يمكن هم بس بيحاولوا يحموها وما قصدوا يتجسسوا وهي فهمت غلط
يلله منيح إنك فهمتها في الوقت المناسب قبل ما تتهور....
تحياتي د. محمد

[محمد طرزان العيق]

المشاركة الأصلية كتبت بواسطة زياد الشكري

ساخرة، بسردية متقنة ..
تجيد هذا الفن وتتربع على قمته ..
وهذا إقرار مني بذلك!

هذه شهادة كبرى وثمينة أعتزُّ بها٠٠٠لكَ منِّي كلَّ الشكر والتقدير ، وخالصُ مَحبَّتي للشعب السوداني الطيِّب!٠٠

[محمد طرزان العيق]

المشاركة الأصلية كتبت بواسطة نوال البردويل

الحمد لله شو بدنا أحسن من هيك وميركل زعلانة ما فهمت من شو
يمكن هم بس بيحاولوا يحموها وما قصدوا يتجسسوا وهي فهمت غلط
يلله منيح إنك فهمتها في الوقت المناسب قبل ما تتهور....
تحياتي د. محمد

لقد صدقتِ ، والحمدُ لله ، الذي ألهَمني أن أهْدِي عليها وأُرشِدها إلى ما فيٍ صَلاحَها٠٠٠ عسَاها أن تكون قد فهمت الموضوع وإتَّعظَتْ٠٠٠شكراً لك من القلب على مداخلاتك الدؤوبة واللطيفة٠٠٠تحياتي وتقديري لشخصِكِ الكريم٠