تَخْبِيصَاتْ واحَدْ مرَشِّحْ!٠٠٠ - ۩ أكاديمية الفينيق ۩



لِنَعْكِسَ بّياضَنا


« تَحْــليقٌ حَيٌّ وَمُثـــابِر »
         :: رفيف (آخر رد :عدنان عبد النبي البلداوي)       :: الزمن الأخير (آخر رد :حسين محسن الياس)       :: ،، نهرُ الأحلام ،، (آخر رد :أحلام المصري)       :: صَمَتَ الليل؟ (آخر رد :أحلام المصري)       :: لغة الضاد (آخر رد :عدنان عبد النبي البلداوي)       :: إلى السارق مهند جابر / جهاد دويكات/ قلب.. (آخر رد :أحلام المصري)       :: لنصرة الأقصى ،، لنصرة غزة (آخر رد :محمد داود العونه)       :: السير في ظل الجدار (آخر رد :محمد داود العونه)       :: إجراءات فريق العمل (آخر رد :محمد داود العونه)       :: بــــــــــــلا عُنْوَان / على مدار النبض 💓 (آخر رد :محمد داود العونه)       :: إخــفاق (آخر رد :محمد داود العونه)       :: جبلة (آخر رد :محمد داود العونه)       :: تعـديل (آخر رد :محمد داود العونه)       :: إنه أنـــــــا .. (آخر رد :الفرحان بوعزة)       :: أُمْسِيَّات لُصُوصِيَّة ! (آخر رد :محمد داود العونه)      


العودة   ۩ أكاديمية الفينيق ۩ > ▆ أنا الفينيقُ أولدُ من رَمَادِ.. وفي الْمَلَكُوتِ غِريدٌ وَشَادِ .."عبدالرشيد غربال" ▆ > ⊱ السّـــــــــــــاخِر ⊰

⊱ السّـــــــــــــاخِر ⊰ الجد الباطن حين يكون خريج دفعة الظاهر الساخر ...

إضافة رد
 
أدوات الموضوع انواع عرض الموضوع
قديم 21-10-2018, 08:06 PM رقم المشاركة : 1
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي تَخْبِيصَاتْ واحَدْ مرَشِّحْ!٠٠٠


تَخْبِيصَاتْ واحَدْ مرَشِّحْ!٠٠٠
*****************************
هذا النَّص قد كتَبْتُه بين الساعة الثالثة والرابعة فجرَ هذا اليوم الأحد ، تحت تأثير هَجمةٍ شرسة للرَّشح ، أطارتْ النومَ من عيني اليمين كليَّاً ، وجزئيَّاً من عيني اليسار ، بينما هاجم العطاسُ والإحتقانُ مِنخريْ أنْفي فتارةً كانت تنغلق الجهةُ اليسرى وحِيناً الجهةُ اليُمنى وغالباً ما كانَ الإنسدادُ يصيبُ فتحتَيْ الأنف معاً فتنْتابُني حالةٌ لا أتمنَّاها لأَلدِّ أعدائي!٠٠٠

وسط هذه الأجواءِ ، خطرتْ على بالي فكرةُ الردِّ على من يتهمني جزافاً بأنِّي أقومُ الليلَ ساهراً رِفقةَ الكومبيوتر٠٠٠ لقد صدقَ من قالْ ; إنَّ الإبداعَ أو التَّخبيصَ(سمُّوهُ كما تشاؤون) يُولَدُ من كبِدِ المعاناةْ!٠٠وأنا يا جماعة مسَامْحكُمْ فيهِ دُنيا و آخرِةْ ، بَشْ هادا الرسِحْ [ عفواً ، قصدي بسْ هادا الرشِحْ ] اللعين يحِلْ عنِّي ، لا بدِّي معاناة ولا بدِّي إبداعْ ولا ضَرَّابْ السُّخُنْ[ و والله العظيم مغلَّظَةً ، إنِّي ما بَعرفْ معنى هاي العبارة الأخيرة ''ضَرَّابْ السُّخُنْ'' !٠٠هيك بَسْمعْ النَّاس بيقولوها]٠٠٠٠المهم إنَّي كتبتُ ما ستقرأونه وأنا منسِطِحْ ع التخت و عمْ أكِتبُه بواسطة الموبايل ، فلذلك كان النَّص مليئاً بالأخطاء الطباعية والنحوية!٠٠٠٠ والآن بعد أنْ حلَّ الصباح وفتحتُ جهازَ الكمبيوترْ العزيز سأحاول تصحيح الأوضاع و لفلَفِة الأمور والتستُّر ع الفضايح ، بس حِلِمكمْ عليِّ حتَّي أجيبْ فنجان قهوتي من المطبخ!٠٠٠٠
قالْ إبداعْ قالْ٠٠٠

فاصِلْ ونواصِلْ ، فلا تذهبوا بعيداً٠٠واللي عندو شغلة يرُوح يساويها ويرجَعْ لَهونْ بسرعة وما بِدنَا أي تأخير هَهْ٠
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ها قدْ عدنا والعَودُ أحمدُ وفي رواية أُخرى محمودُ٠٠٠

ومع أول رشْفِةْ قهوه من فنجاني أبدأ كتابتي التَّصحيحيَّة ويُسعدُنِي طبعاً بهذه المناسبة السعيدة أن أقولُ لكمْ صباحُ والخير والسعادة والفرح والأمانِ والسلام(وهذا مثلْ ما بتعرفوا جميعاً ، يعني منْ باب تفاءلوا بالخيرِ تجدوه) ، كما لا يسعني سوى أن أشكرَ لوحة المفاتيح العربيَّة[the arabic keyboard] ،التي تزيِّنُ شاشةَ الكومبيوتر وأخص بالشكر الجزيل الفأرة السوداء ،التي تسمح لي بالتلاعبِ بالأحرفِ والكلمات ، كما أرغبُ وأشاءْ٠٠ وقبل أن أبدأ مهمَّتي ، لازِمْ أستدرِكْ وأقولْ وهذا الشِّي خَلُّوه -من فضِلكم - بينِي وبينْكُم وما تواخذونيش على هالتعابير من الصُبحيَّات!٠٠٠ ;

كنُّو عنْجد ياجماعة ، كلْ ما يكون الواحدْ منَّا مزاجو مَبعوصْ أكتَرْ، كلْ ما كانتْ الجمَلْ والكِلماتْ وكمانْ التعابير والأحاسيسْ والمشاعِرْ أصدَقْ وأحلى وأجمل٠٠٠ و مشانْ الله ما تواخذوني كمانْ مرَّة عَ هالكلمة ،اللي ما لَقيتُ أَشَلْبَنْ منها في وصف المزاج المُعكَّرْ٠٠

وهايْ لَعيونْكو أحلى رشفةْ جديدة من القهوة٠
================================

هاظا يا جماعة الخير في واحدْ منْ أصدقائي ،حَبْ يعلِّمْ علَيِّ قال يعني إنُّو والله كاشِفنِي فَبيقولْ لي / وهوِّ يعني عمْ بيمسكْني متَلبِّساً / ; وَلَكْ أنا شايفَكْ طٌول الليل وانت قَاعِد ع النّت!...
فأنا جاوبْتُو وقلتلُّو ; طيّب ، يا فالِحْ ، ولنَفرِض انُّو هالكلامْ تبَعك صحيح ، طيّب حضِرة جنابكْ شو عم بتْساوي بِنْصاصْ هالليَالي؟!٠٠٠ شو عمْ تتْفقّد إنتِ وأمثالَكْ أحوالِ الرَعيّة مثلاً٠٠٠لَيكونْ انتو من عَسَس أميرِ البلادْ الوالي أبو يوسف الحجَّاج بن الثَقَفي ( وإذا بدْكُم بأقول لكم- على إعتبار إنِّي مثقَّفْ وفاضِي أشغالْ وأعمالْ- إيمتى ولِدْ وكيف صَار والِي وإيمتى حَكَمْ ، بسْ اعتقدْ إنُّو هالحكي مو ضروري) ، يعنِي بدِّي أسأَلكُمْ هوِّ ، يعني الوالي بسلامْتو مِعْطِيكُم مُهمِّةْ تفتيشْ وإحْنا مو عَارفِين؟!!!٠٠٠٠٠
هاي الشغلة ، وإسمحولي إنِّي أفتَح -إسْمِنُّو الله فاتِحْها هَالليلة عليِّ- قوس صغير :
٠٠٠{ هاي الشغلة ، خيَّا، بتذكِّرني بمخيَّم اليرموك ، لمَّا كنَّا صغار ، كان على ما أذْكُرْ - وإنتو أكبر قَدِرْ- في مزبلة كبيرة في منطقة ''السبينة'' المجاورة للمخيم وبتبعد عنُّو حوالي نُصْ-تلات أرباع السَّاعة مَشِي ع الأقدامْ ، يعني فيكو تقولوا 3-4 كلم ويمكن أقلْ أو أكتر شويِّة ٠٠٠والله وكيلكو كانت المزبلة [ مَكَبْ نفايات] ، عاملةْ زيِّ الجبل أو التَّلة الكبيرة ، والله العليم كانت البنوك والمطابع يكبٍّوا زبالتهم هناك ، فلمَّا كنَّا ولادْ صغار، قالْ كنَّا نروح /بالسِّر/ هناك ونْجِيبْ منها غنائِمْ عديدة ; دفاترْ حساباتْ وصوَرْ ومطبوعات وكاسات بلاستيك ( وكانت بهاديك الأيام بالنسبة إلْنا ,نِحنا الصغار, بمثابة ثروة كبيرة ، رغم إنُّو كان في المزبلة ، كمان أشياء خطيرة فعلاً مثل بقايا علبْ الأدوية ، وأكياس السيروم البلاستيكية الشفافة وغيرها ومرطَبَانات وبيدونات مواد كيمياويِّة[على الأرجح مواد تظهير وتثبيت الصور]٠٠
وياما كنَّا نتبهدل ونوكِلْ قتل من أهالينا، بسْ كانت العروضْ والمواد لنا مُغرية) ، ولكِن قالْ شو كنَّا نخاف ونخْجَلْ- ما شالله علينا- إنُّو حدا من الجيران أو منْ المعارف يكون شَافْنا هناك!!!٠٠٠٠'' كُلنَا كنَّا نروحْ لهناك ، ما عدا بعض الإستثناءات القليلة جداً، وأنا هنا أتحدَّث عن أعمار ما بين7/8 و12/13سنة على أكثر تقديرْ'' ٠٠طيِّب ما يشوفْنا! ، شو فِيهَا يعني، طيِّب طالما شافنا هناك فهو كمان زيّنا جاي يوخِذ من هالمزابل إللي فيهْ النصيبْ٠٠ يعني كُلنا في الهَوا سَوا٠٠٠بالمناسبة هذا السِّر الخطير ، أنا أكشِفْ عنُّو لأوَّل مرَّة ٠٠٠ومعلِش , سامحوني : يا كلِّ ولادْ حارتي، و يا كلْ جِيراني وبالأَحرَى يا كلِّ ولادِ المخيَّمْ ، إللي من جيلي وأعتذرْ منكو٠٠٠ وعلى كلْ حَالْ مِضي على هالقصص أكثر من خمسين سنة وكلْ قوانين الأقدمية بتِسمَحْ بنَشْرِه}٠٠

وبيرجع مرجوُعنا لصاحْبي على النِّتْ فكمَّلتْ كلامي معاه وقلتِلُّو :

-شوف يا اخونا الكريم : أنا مرشّحْ وعايف حالي ومش عارف أنام٠٠٠انت شو يللي حشرك بالنُّص ، نصيحتي إلك ولغيرَك : إنُّو رُوحْ ، بلا مؤاخذة، روح -عَ قولةْ مرتِي الأجنَبيِّة ، لمّا كانت تِحكي معي عربي- ''روحي شُخِّي ونامي''٠٠٠أنا ما دخلني ، هيك كانت تحاكيني ، مِتِل ما أنا كنِتْ أحَاكِيها إلْهَا أو لَبِنْتي الصغيرة بصيغة المؤنَّثْ ''مهو ،الله سبحانٍه وتعالى ما رزقْني بِذَكَرٍ يحملْ إسمِي من بَعدي'' فما كانوا -يعني زوجتي وبنتي- يسمعوا الكلام إلَّا بصيغة المؤنث فكانوا يفكروا إنُّو هيِّ هيك لغتنا العربية !٠٠فما كانت مَرْتِي -الله يِصلِحها- تقولِّي إلَّا : ''رُوحي وتعالي ، جِيبي أو خُذي'' ، ، تقولوا ياجماعة الخير إنها عم تحكي مع أختها مو مع جُوزْها ،[ يعني بالعربي الفصيح بَهدَلت قيَمْ الرجولة الشرقية ]٠٠٠ أي والله وكانَتْ فاضِحْتني بين أهلي ، وخاصّةً معْ أخوي الكبير ،الله يطوِّل في عمرُهْ ، وأبوي ، الله يرحمه ، فكان يقولْ ;

-إحنَا جوَّزنْاه مْشَانْ يصير زلمة!، بس مع الاسف هذا مصير كُلْ مين بيتجوّز أجنبية٠٠٠إحنَا المثل عنَّا ، بيقول : "خود من طين بلادك و دَهِّنْ ع خدادك"، بس هاي إرادة الله وهاي مَشيئته!...إحنَا بعتناه ع بلادْ برّه تا يرفَعْ راسْنا٠٠٠رجِعْ الأفندي [ يعني أنا] مَعاهْ هالشَّقْرة وشقْفِةْ هالشَّهادِة٠٠٠يلَّلا منيح ، كيفْمَا كَانْ ، أحسن من غيره ، يَامَا فِيهْ ناسْ بعتَت ولادْها ، ويا حَرامْ وَرِجْعولْهم إيدْ من وَرا وإيدْ مِن قدّام٠٠٠

وكمَانْ مرَّة بيني وبينكو ، كُنِتْ مشان أَخلُصْ من حكاية المُؤنَّث هاي واللي مَرْمَغتْ رجُولِتنَا بالأرِضْ ،كنِتْ أسَاوي - لَحَالِي وعن طِيبةْ خاطِرْ- وبدون أي أمِرْ ، هيكْ طواعيَةً ، كلْ شي بالبيتْ ; من القهوة ، لَلطَّبيخْ ، لَلجَلِي[ بشرط إنُّو تكونْ الميِّة سُخنة] ، / ما عدا، والحقُّ يُقال ، الكْناسِة والكَوِي والغَسيل فكانت هاي الشغلات من إختصاص زوجتي ، مَهو أنا كيفْمَا كَانْ كنِتْ زَلْمِة البيت!٠٠/ وكلْ هالشي كنت أساويه ، كُرمالْ إنُّو ما تِضْطر وتحَاكِيني مَرْتِي المَصون قُداَّم أهلي بصيغة المؤنَّت ، وأنا بالمناسبة - ومع مرور الوقت - تعوَّدتْ عَ هالشِّي وتأصَّلتْ فيني هالعادة ، وعجبَتني شَغْلة الطَّبخْ والنَّفِخْ!٠٠عَ القليلة بيعرِفْ الواحد شو عمْ يوكِلْ وشو عم يحُطْ في تِمُّه، ومرتي- والحمد لله- كانَتْ متفهمّة للأمور، وما كان عِندها أي إعتراضْ وبعدْنا عَ هَالمِنوال إلى يومِنَا هذا٠٠٠
يمكنْ بعضْكُو يستغرب هالشِّي ، يعني كيف تا إنُّو واحد شرقي يساعد مَرتو بشغل البيتْ ، بس لمَّا بتذكَّر رواية ''المتشائل'' للمبدع الفلسطيني''إميل حبيبي'' بتخِفْ مصِيبْتي بلْ وبالعكِسْ بحِسْ حَالي إنِّي صُرِتْ''خواجة'' ففي هذه الرواية/المسرحيّة يوجد مَشهَدْ للبطل ''سعيد ابن أبي النَّحس المتشائل'' إنُّو لمَّا يستجمِعْ شجاعتُه ويرُوحْ عَ بلدْهُم ،اللي إتهَجَّرْ مِنْها ولمَّا يوصِّل لعند بيتهُم وبِيشُوفْ واحدْ زلمة أشقر[ يمكن ،والله العليم، ألماني] بيطلعَ من البيت وحامِلْ معو لَجَن الغَسيلْ وبيبْدأ ينشُر الغسيل على الحبل ٠٠٠بيطلَّع سعيد مشدوهاً ، كيف إنُّو بيت أهلو ، - هادا اللي إنوَلَدْ ورِبي فيهْ- مَسْكونْ من الغُرباء وإنُّو بيقدَرِش يفوتْ عليه ، بِتفِرْ دَمعَة من عيونُه ، ومشان يخلصْ من هالمأزق والحزن بيلجأ إلى التساؤل وبسخرية لاذعة ويحوِّلْ اللقطة الى مشهد كوميدي ، حيث يتهكَّم على الأجنبي ،المستولي على بيت أبيه فيقول :
- وَلْ باطِلْ ع الرجَالْ ، وَلْ فِي زلمة بهالدِّنيا بيُنشُر غسيلْ مرْتو؟!٠٠٠وأنا بأقول لسعيدْ رغم عَمَالته وخدِمتُه ''للدُّولِة'' فما أحَبَّ غير ''يُعادْ'' وما تزوَّج إلا ''باقية''وما سمَّى إبنُه غير ''ولاءْ'' وما سَكَنْ إلا بـ ''الطنطورة'' !٠٠٠أقولُه; لأ في زلام بيساوا هيك وأكتر وهاي أنا الطنطوري أَسَاعِدْ مرتِي بشغل البيتْ٠

لا تآخذوني يا جماعة أنا إطلِعتْ عن موضوعنا شويّة!٠٠٠[ وَلَكْ هايْ شويِّة ، يا زلمِة ، نَسِّيتْ النَّاسْ المَوضوعْ الأساسي وفوَّتهُم بالحيط ] ، صحيحْ إحْنَا وين كنَّا وين وصِلْنا ؟!٠٠٠

وبنرجِعْ لَـ هاظولا جماعة عَسَسْ الحجَّاج الثَّقفِي ، قصدي إنتو يلِّلي مو جاييكوا النُّوم ، أنا ، مِنِّي وعليِّ ، عم أخبّص بالحَكي و ماخِدْ راحتي تحت تأثيرِ الرَّشِحْ٠٠٠أنا ما ضَربْتكُم ع إيديكُم تا تُقعدوا وتِقرُوا خَربَشاتي وتخبيصاتي وهَلْوساتي٠٠٠ وبَرجَع بَقول إلكُمْ ،الله يهديكوا : ما بتِعرْفوا ''أنَّ مَنْ راقبَ النّاسَ مات هَمَّاً''٠٠٠
وَلْكو أنا قاعِدْ بأمانِ الله في صَفحتي وكَافِي شَرِّي٠٠٠٠فَإنتوا يا أوادِمْ ، شُو عَمْ بتساووا بصفحتي ها!٠٠ وعنْجَدْ ما بَنْصَحكوا تْضيّعُوا وقِتكو مَعَاي ، أنا مُو فَارْقَة معِي ، والله يمْكِنْ أسْحَبها بالكِتَابة لَحتّى الصُّبِح، ومَا تنسُوشْ إنّو بُكْرة ( قصدي اليوم ) هوِّ الأحدْ ، يعنِي يومْ عُطلة وأنا أصلاً متقاعدْ، يعني عامِلْ متل ذَكَر النَّحلة لا شغلة ولا عملة أو متل ما بيقُولوا أَكْلْ ومَرْعى وقِلِّةْ صنعَة٠٠٠٠لا فِي من قُدَّامِي ولا فِي مِن وَراي٠٠٠٠٠٠٠٠

غريبِةْ!٠٠٠ عنجَدْ غريبة!...وَلْكو بعِدْكُو قاعْدِينْ مَعِي٠٠٠٠تَرَى إنتُو مو مْضايقينِّي ،بسْ أنا شفقَانْ عليكو٠٠٠٠ طيّب أنا /والله/ مشانْكُو ومشَانْ مصالِحكُمْ ، رحْ انسِحِبْ وأكتفِي باللِّي كتبتو وهاي عمْ اقولكم تصبحوا على خيرْ ،إذا كانْ فيكُو تنَامُوا٠٠٠٠تصبحوا عَ خيرْ مرَّةْ تانية وبَلالْكُو هَالبصْبصة٠٠٠٠هالعَادِة مِشْ مليحة٠٠٠
إسألوا مجرّبْ [يعني حَضرتِي ] ولا تِسأَلوا طبيب ،ياما أكَلتْ خوازيقْ منَجَّرةْ وما نابْنِي غير الصُّداع والعيون الحمرَة والتأخير على الشغل وقصص تانية ، ولو حتّى سألتُونِي عنْها ما رح احاول أجاوبكم لإنو هاي إلها حكايات طويلة وهاظا مُو وَقتها هسّا ، ولو بديتْ فيها ما بنُخلُصْ منْها لَبَعِدْ بُكرَة٠٠٠٠يللا تصبحوا ع خير للمرة التالتة!٠٠

ما تآخذوني اذا في اغلاط لإني كنتْ عم اكتب من المُوبايل ، وأنا بالتخت لابِدْ ، وكُلُّو مِنْ تِحْت راسْ هالجريب لعين الوالديْن٠٠٠وكمانْ وللمرّة الرابعة والاخيرة ، تصبحوا على كل الخير ٠
ملحوظة ; أعلن تنصُّلي وعدمْ تَحمُّلي المسؤولية عن أي كلمة مش مليحة ، سواءْ شَرَّقتْ أو غَرَّبَتْ أو قلَّلَتْ من أدبْها و فِلتَتْ منِّي تحت تأثير الجريب ، لا أراكُمْ الله إيَّاه لا بالصيف ولا بالشتاء ولا بأي وقتٍ من السنة وكل سنة٠

د٠ محمد طرزان العيق
20.09.2015






  رد مع اقتباس
/
قديم 22-10-2018, 11:08 AM رقم المشاركة : 2
معلومات العضو
زياد السعودي
الإدارة العليا
مدير عام دار العنقاء للنشر والتوزيع
رئيس التجمع العربي للأدب والإبداع
عضو اتحاد الكتاب العرب
عضو رابطة الكتاب الاردنيين
عضو الهيئة التاسيسية للمنظمة العربية للاعلام الثقافي الالكتروني
الاردن

الصورة الرمزية زياد السعودي

افتراضي رد: تَخْبِيصَاتْ واحَدْ مرَشِّحْ!٠٠٠

سلام الله
ميمون منجزكم
طمعاً في رايكم وتعقيبكم
نرشح لكم هذا المنجز :

http://www.fonxe.net/vb/showthread.php?t=71828

رايكم منارة

ود لا يبور






  رد مع اقتباس
/
قديم 02-11-2018, 02:12 AM رقم المشاركة : 3
معلومات العضو
سوسن شهيب
عضو أكاديميّة الفينيق
إحصائية العضو







آخر مواضيعي


سوسن شهيب غير متواجد حالياً


افتراضي رد: تَخْبِيصَاتْ واحَدْ مرَشِّحْ!٠٠٠

امتعتنا بفيض تجربتكم

زادكم الله الق

تحيتي






  رد مع اقتباس
/
قديم 02-11-2018, 02:34 AM رقم المشاركة : 4
معلومات العضو
حكمت البيداري
عضو مجلس إدارة
عضو مجلس امناء الأكاديمية
عضو تجمع أدباء الرسالة
يحمل أوسمة الأكاديميّة للابداع والعطاء
العراق

الصورة الرمزية حكمت البيداري

إحصائية العضو








آخر مواضيعي

حكمت البيداري غير متواجد حالياً


افتراضي رد: تَخْبِيصَاتْ واحَدْ مرَشِّحْ!٠٠٠

وبنرجِعْ لَـ هاظولا جماعة عَسَسْ الحجَّاج الثَّقفِي ،

رفيقنا العزيز , كم من شهيد وشهيد من أبناء شعبنا التليد دخل الجنة وهو لا يجيد كتابة بسم الله ..
شرفني واسعدني الحضور
بارككم ورعاكم الرب








أنا من ارتضى الموت طعنا بأشواك الورد
بيدارو
  رد مع اقتباس
/
قديم 03-11-2018, 11:04 AM رقم المشاركة : 5
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي رد: تَخْبِيصَاتْ واحَدْ مرَشِّحْ!٠٠٠

اقتباس:
المشاركة الأصلية كتبت بواسطة حكمت البيداري مشاهدة المشاركة
وبنرجِعْ لَـ هاظولا جماعة عَسَسْ الحجَّاج الثَّقفِي ،

رفيقنا العزيز , كم من شهيد وشهيد من أبناء شعبنا التليد دخل الجنة وهو لا يجيد كتابة بسم الله ..
شرفني واسعدني الحضور
بارككم ورعاكم الرب
نعم ، نعم صدقت عزيزي٠٠٠كم هناك ممَّن يتسلَّقون المواقفَ والظروف ليصلوا إلى ما كانوا لا يحلمون!٠٠ ٠
خالص شكري ومودتي لتجشمكم عناء قراءة تخبيصاتي وإنّي لأعترف بإصابتي بداءِ الإسهاب والإطناب٠٠٠ما عساني أفعل وأن أجدُ متعتي بالتلاعب بمفرداتِ لغةٍ أعشقها حدّ الهوسِ والجنون٠






  رد مع اقتباس
/
قديم 03-11-2018, 11:08 AM رقم المشاركة : 6
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي رد: تَخْبِيصَاتْ واحَدْ مرَشِّحْ!٠٠٠

اقتباس:
المشاركة الأصلية كتبت بواسطة سوسن شهيب مشاهدة المشاركة
امتعتنا بفيض تجربتكم

زادكم الله الق

تحيتي

أشكركِ من صميم قلبي على الدعم والمؤازرة وعلى جميل الكلمات!٠٠٠٠
آملُ أن أكون دوماً عندَ حسن الظَّنْ٠






  رد مع اقتباس
/
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة نصوص جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة

الانتقال السريع


الساعة الآن 09:18 PM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لأكاديمية الفينيق للأدب العربي
يرجى الإشارة إلى الأكاديمية في حالة النقل
الآراء المنشورة في الموقع لا تعبر بالضرورة عن رأي الإدارة بل تمثل وجهة نظر كاتبها فقط