18-02-2018, 04:35 AM | رقم المشاركة : 1 | |||
|
كيفْ حَضِرتي صَارْ مَشهورْ!٠٠
كيفْ حَضِرتي صَارْ مَشهورْ!٠٠
*********************************** صباحُ الخيرْ يا مُحَمَّد قدّيش أنا مبسوطْ من حَالي وفَخورْ بنفسي٠٠٠حاسِسْ حالي رح أطير في السما٠٠٠هسّا أنا مْعرِّمْ و نَافِشْ ريشَاتِي زيِّ الطَّاووسْ!٠٠ يا سَعدي ويا هَناي٠٠٠صُرتْ مَشهورْ ومَعروفْ وبتِكْتِب عنِّي الجرايد!٠٠٠لأ شُو الجرايد٠٠٠!٠٠٠لأ وانتِ الصَّادق و حتَّى كُلّ وسَايِل ''الميديا'' والتَّواصل الاجتماعي٠٠٠ايه نعمْ ، لا تستغربوا!٠٠٠عَنْجدْ عم يكتبوا ويحكُوا عنِّي وينْ مَا كانْ٠٠٠يا جماعة بيحْكوا عنِّي حتَّى أكتَرْ من ترامب بحَدْ ذَاتُه (خلّيه يِزعلْ ، شُو أعمَلُّه يَعني) وغيرُو وغيرَاتو٠٠٠ نَطْ واحَدْ كتِيرْ غَلَبِة وحَقُود وحَسُودْ وقالِّلي : أيْ طَوِّلْ بَالَكْ يا زَلمِة ، أنا شخصيَّاً متَابِع الاخبارْ في التلفيزيون والراديو ساعةْ بِساعةْ و كمان أقرا كُلّ الجَرايد و نَشْراتْ كُلّ أنباءْ وكالات الصحافة العالمية و أيضاً أطالعُ كلَّ ما يرِدُ و يُكتَبُ في شبكة الانترنت العالمية ، وعُمري ما شُفِت إسمَكْ مَذكورْ فيها! ، وبحَياتِي ما سْمِعتْ عنَّك ، فَـ رَجاءً لا تْبِيضْ عَلينَا٠ قلتُ لِهذا الدَّعِي وكتير الغَلَبِة : انتِ جَاهلْ و رَحْ تظَلْ جَاهلْ!٠٠٠ ولَكْ كُلْ هالشُّهْرة والطَنْطَنِة وما سمِعِتْ عنِّي٠٠٠الظَّاهر انّكْ لا بتِسمَعْ ولا بِتْشوفْ ، ويمكِنْ خَفَى الله إنّكْ تْكُون أُمِّي وما بْتِعرفْ تِقرا!٠٠٠ ولإنّه كتيرْ غَلَبِة ، رَدْ عليّي وقاللي : هاتْ فَهِّمنِي كيف هيك انتِ مَشهورْ ؟!٠٠٠و حَضِرتَك مِش مَذْكورْ ولا بِأيِّ مَحَلْ!٠٠ قُلْتلُّلو : هايْ وصِلنَا بيتْ القَصيدْ٠٠٠يا زلمة وَكِّلْ الله وتوَاضَعْ شْوَي ، وكُونْ مَوضُوعِي ومُنصِف شْوَيّة٠٠٠ إسمَعْنِي ملِيحْ : هَلأ لَمَّا تقرأ ايْ خَبَر او تِسمَعُه في ايْ وسيلة مِن وَسائِل الإعلامْ ، مِشْ بيقُولُوا : ''ولقَدْ حَضرَ وكَانَ هناكْ في عَيْنِ المكانْ فُلانْ وفُلانْ وآخَرونْ''!؟٠٠٠ قالَّلي : مَزبوطْ ، بس ما ذَكَروكْ!٠٠٠ قلتُ لَه : شَايفْ انَّك جَاهِلْ وما بتِقرأْ اوْ تفْهَم ما بينَ السطور٠٠٠وَلَكْ و هاي كِلمِةْ'' آخرون'' ، اللِّي بتِظْهَرْ في كُلِّ الاخبارْ (و أحياناً بتكون مكتوبة ع شكل'' آخرين'' ، وذلكْ حسَبْ محَلِّهِا مِنَ الإعْرابْ)٠٠٠وَلَكْ هاي الكلمة ، يعني ; (آخَرونَ أو آخَرينْ) هيِّي أهم شِي بالخَبَرْ وحُطْ تَحِتْها خَطْ أحمَرْ٠ ردْ وقالِّلي : طيِّبْ وانتِ شُو دَخَلَكْ أو دَحَشَكْ بالمَوضوعْ؟!٠٠٠ جاوبْتُه: كِيفْ شو دَخلْنِي ؟، وَلَكْ يا جاهلْ ، مَهُو أنا وَاحَدْ من هؤلاء ''الآخرون'' او ''الآخرين'' ، لأ و مِشْ بَسْ هيكْ ، بَلْ وأهَمْ وَاحَدْ فيهُمْ!٠٠٠ شُفِتْ كِيفْ إنِّي مَشهورْ ومعروفْ ، بَسْ إنت ما بتِنْلامْ لإنَّك جَاهلْ وغَشِيم كَمانْ!٠٠٠ هايّ هيِّ كُلّ الحكاية ، وإن شاءَ الله تكُونُوا إنتُو كَمانْ قدْ اقْتَنعْتُوا بشُهُرتِي٠٠٠وإلَّا قسمَاً باللهْ مَا بَعودْ أحْكِي مَعَاكو ولا أكتِبْ شِي ، وخلِّي ''ترامْب'' يركبْ أعلَى خيلُهْ!٠٠ كلمةْ ''آخرون'' هَايْ هيِّي لُبُّ الموضوعْ ، والله يرحمك يا ''إميل حبيبي''٠٠٠مَهُو وبفَضْلُه صُرتْ أنَا مَعروفْ ومَشهورْ!٠٠( بيني وبينْكُو هوِّ إللِّي فتَّحْلِي عيوني عَ أهميِّة هايِّ الكِلمةْ)٠ مَعقولْ ياجماعة إنُّو كُلّ هَاظا يكونْ مِن تِحتْ تَأثير حُمَّى الجْريب والرَّشِح٠٠٠الله اعلم!٠٠٠ خليني أقوم أروح أتوضئ وأصلِّي ...أحسن مِن كُلّ هالحَكِّي الفَاضي٠٠٠بس لا تِنْسُوشْ بأنِّي أشْهَر وأهَمْ واحَدْ في هؤلاء ''الآخَرين''!٠٠أيْ والله ، ويلَّلا كِيفْ لَعَادْ!٠ محمد طرزان العيق 17.02.2017 |
|||
18-02-2018, 02:37 PM | رقم المشاركة : 2 | |||
|
رد: كيفْ حَضِرتي صَارْ مَشهورْ!٠٠
ساخر جميل
دمت اجمل الآخرين مودتي وتقديري |
|||
18-02-2018, 03:31 PM | رقم المشاركة : 3 | ||||
|
رد: كيفْ حَضِرتي صَارْ مَشهورْ!٠٠
ههههههه
هههههههه أنا اقتنعت بشهرتك كتير ! مافي مجال لعدم الاقتناع بس عن جد عجبتني فكرة "الآخرين " وبهالحالة لازم كل الآخرين يفتخروا أنهن مشهورين كمان . المجد للآخرين! مع التحية للأستاذ محمد طرزان العيق |
||||
19-02-2018, 02:26 AM | رقم المشاركة : 4 | |||
|
رد: كيفْ حَضِرتي صَارْ مَشهورْ!٠٠
يعني على هيك ما عاد فيه حدا مش مشهور
إلا مايكون مرة صدفت وكان أي شخص مارر من شارع أو مكان من "الآخرين" أو "الآخرون" شكراً لهالكلمة مرفوعة أو منصوبة أو مجرورة وما جرت من أشخاص خلفها ودفعت فيهم للشهرة بس إلي عندك رجاء ما تعرض حالك مرة تانية للبرد أو الجريب دمت بكل الخير والصحة والعافية تحياتي د. محمد |
|||
|
|
|