مِنْ أحَادِيثِي أنا و''مارك''٠

[محمد طرزان العيق]

مِنْ أحَادِيثِي أنا و''مارك''٠
***************************
السلامُ عليكمْ
قبلَ عامٍ بالتَّمامِ والكمالْ ، وفي مثلِ هذا اليومِ بالضَّبطْ كنتُ قدْ كتبتُ موضوعاً عن ''الديموقراطية العرجاء'' والتي تقفُ وتعتمدُ على الرأيِّ الواحدِ الأوحدِ الوحيدْ ، ولاتقيم وزناً للرأيِّ الآخرْ ولا تعترفُ به أصلاً٠ ولا أدري - ربَّما لعدمِ نضوجِ الفكرة - إرتأيتُ أنْ لا أنشرُهُ للعامَة وإنما إحتفظتُ بهِ على صفحتي لنفسِي ، حيث وضعتُ عليه شارةَ القفلْ ، كنايةَ عن أنَّه لي فقطْ ولا يراهُ أحدٌ سِوايْ!٠٠٠
و اليومُ وأنا أتصفَّحُ صفحتي ككلِّ صباحْ ، وجدتُ -وكما درجت العادة - بأنَّ أخينا ''مارك'' / راعي الفيس بوك ، كثَّر الله خيرُهْ وسَتَرَ على وَلايَاه وأبعدَ عنْهُ أولادِ الحَرامْ ويسَّرَ لهُ أمرَه ٠(أعتقد بأنِّي وفِّيته حقّه من الدعاء له!٠٠) ، المُهمْ وجدتُه ، يعني ''مارك'' أفندي قدْ ذكَّرني بمواضيعِي التي كتبتُها ونشرتُها في مثلِ هذا اليوم منَ السَنواتِ الخوالي!٠٠٠٠
لحَدْ هونْ ومنيحْ ، بسْ هالمرَّة أخونا ''ماركْ'' رفعْ حواجبُه وتطَّلَعْ فيني٠٠٠
قلتلُّلو : خير في شي؟!٠٠٠
قالِّلي : كُلْ هالشِّي وبتِسْألني شُو فِي!٠٠
قلتلُّلو : لأ هيكْ شَغلتِلِّلي بَالِي ،عنجدْ!٠٠٠
قالِّلي : شايفَكْ كاتبْ موضوع ، بس ما نَشَرْتو لأصحابكْ!؟٠٠
قلتلُّلو : آآه مزبوط وهايْ مُو أوَّل مرَّة أعْملْهَا!٠٠
قالِّلي : اللِّي فَاتْ مَاتْ ، بس منْ هلَّأ ورايِحْ ما رايحْ يمشِي الحالْ!٠٠
قلتلُّلو : إيهْ طيِّبْ شُو يعنِي؟٠٠٠ و شُو المطلوب؟!٠٠
قالِّلي : والله الشَّغْلِة هيكْ مَا عَادْ وفَّتْ معَانَا!٠٠
قلتلُّلو : بِصَراحةْ أنا ما فهِمِتْ شي٠٠٠شُو بدَّك منِّي؟!!!٠٠
قامْ أخونَا ''مارك'' عصَّبَ وعَقدَ ما بينَ حَاجِبيْهِ والشَّرَرُ يتطَايَرُ مِن عَينيْهِ و٠٠٠
قالِّلي : مُو بسْ بدِّي منَّك ، وكَمانْ بِدِّي من الكُلْ!٠
قلتلُّلو : أُفْ ، أُفْ شُو يا زلَمِة ، بَايِنتْها الشَّغْلة كبِيرةْ!٠٠٠ طوِّل بَالكْ عَلينَا ٠٠٠خيرْ؟؟!٠٠٠
قالِّلي : طَبعاً الشَّغْلة كبيرِةْ ، وكبيرِة كتِيرْ كمانْ!٠٠٠لإنكُمْ تَخَّنتُوهَا ، قَالْ طوِّلْ بَالكْ قالْ ، و كَمانْ لسَّا بتقولِّلي خير!٠٠٠ وَلَكْ ، مِنِّينْ الخيرْ بدُّو ييجي؟!٠٠
قلتلُّلو : خايفْ أحكِي وتزعَل منَّي بزيادة!٠٠٠ وَلَكْ ، فهِّمنِي شُو القِصَّة؟!٠٠ عَ حْسَابْ إحنا صْحَابْ!٠٠٠
أخَذَ ''ماركْ'' نفَسَاً عظيماً ومِنْ ثمَّ زَفَرَ زفرَةً ، لمْ أرَ مِثلَهَا وخَشِيتُ ، من شِدَّتها عليهِ ، ثمَّ تنهَّدَ ولاحَظتُ بريقَ دمعَةٍ في عينِه وهي تَتَلألئُ وتكَادُ تفضحُه ٠٠٠وَ٠٠
قالِّلي (وبدا صوتُهُ متحَشْرِجاً ، وبالكادِ أسمعُه) : يا زَلَمِة والله إنِّي صَبَرتْ عليكُمْ كتِيرْ وأكتَرْ مِن صَبِرْ أيُّوبْ٠٠٠ يا زَلَمِة شُو مفكرينْ إنُّو ''الفيس بوك'' هُوِّ دَفتَرْ مُذكَّراتْ إلْكُو وللِّي خلَّفوكو؟٠٠٠ ها؟!٠٠٠ وَلْكُمْ هَايْ صَفحةٌ للتَّواصلِ الإجْتماعي وتَلاقُحِ الأفكارِ وتَبادلِ الأخبارِ والآراءِ والمَعلوماتْ وكذلكِ الخبراتْ و٠٠٠٠
قاطعتُ أخانَا ماركْ ، لمَّا حسِّيتْ بدرَجَة الأسَى والحزنِ والتَّأثُرِ والألمْ وإنُّو في عِنْدو عَتَبْ و٠٠٠
قلتلُّلو : واللهِ يا صَاحْبي كَلامَكْ مَزبوطْ ، وعَ رَاسِي من فٌوقْ ، بسْ شُو المُشكِلةْ؟!٠٠٠
قالِّلي : لا حَولَ ولا قوَّة إلّا بالله ، ولَكْ لسَّا بتِسْألنِي ; '' شُو المُشكِلةْ؟!٠٠'' ، يعني إللِّي بنِحْكِيه لازِمْ نِرجَعْ نْعِيدُه!٠٠٠اللهمَّ طوِّلِكْ يا رُوحْ٠٠٠٠ آآآخْ وَلَكْ ، شُو بدِّي أشْرَحلَكْ تَا أشْرحْ٠٠٠٠ إنتُو مَا بتِنْعَطُو وِجِهْ، وَلَكْ هَاظَا ''الفيس'' صفْحَة للتواصُلْ الإجتِماعِي!٠٠٠صَحْ؟؟؟!٠٠٠
قلتلُّلو : أيْ والله صَحْ ونُصْ كَمانْ ، و عَدَّاكْ العيبْ٠٠٠
قالِّلي : أيوااا ، طيِّبْ وطالمَا عَدَّانِي العيبْ وكَلامِي مزبوطْ!٠٠٠ طيِّبْ ، ليشْ لَكَانْ بِتْسَاوُووو هيك؟؟؟؟!٠٠٠
فتَحتُ فَاهِي(فَمِي) كَي أُجاوبَهُ ، فَلمْ يتركْ لِي مجالاً البَتَّة وتابعَ حَديثَهُ٠٠٠و٠٠
قالِّلي : يازلَمِة إتَّقوا الله وتُوبُوا إليه٠٠٠ وَلْكُمْ هذا ''الفيس'' للتواصُلْ ، مو مِنْشانْ تِعْملوا مِنُّو دَفترْ مذكَّرات!٠٠٠٠ يَعنِي مُمْكن يُصدُفْ إنُّو شِي فِكرَة أوْ مَعلومُة تِحْتفظُوا فِيها إلْكو، لإنْهَا عَجْبتْكُم ، أو لإنها مِشْ كاملة أوْ مِشْ ناضجة إلخ ، بَسْ إنُّو تصِيرُوا عَ الطَّالعَة والنَّازلِة ، تكتْبوا مواضِيعْ وتحطُّوا عليها القِفِلْ مشَانْ مَا حَدا يشوفْها وطبْعَاً ما بتِنشْرُوها!٠٠٠لأْ لَكَانْ إزا هيكْ القصَّة ، أحسَنْ إِلِي وأشْرَفْ إنِّي أسكِّر المَوقِعْ مِن أسَاسُو ، لأْ وشُو كَمانْ عمِلتُوهْ موقِعْ للرَّدِحْ والقَدِحْ وتبادُلْ المسبَّات والشتايِمْ والمُزاوَداتْ والإتِّهَاماتْ ، وحتَّى السِّرقاتْ منْ بَعضكُمْ البَعِضْ!٠٠٠ لأ وغيرْ هيكْ ; مافِي أشطَرْ مِنكُو بالحَظِر والحَذفْ!٠٠٠ وتَابعَ وهوَ يَقولْ :
اللهْ لا يسَامِحكُوا ولا يوَفِّقُكوا وَلكُمْ ، حوَّلتوا هذا المَوقعْ الحِلُو والمُفيدْ من موقِع للتواصُلْ الإجتِماعِي والتَّعارُفْ ونشِرْ أفكارِ المَحبِّة والتَّسامُح ، إلى موقِعْ لنشرِ الكَراهية والطَّائِفية والحروبْ ، غير المسبَّاتْ والشَّتائِم٠٠٠٠لأْ هاظَا كتير هيك ، عَنجَدْ يَا إمَّا رحْ أسكِّر المَوقِع أو إنُّو بِتصِيروا أوَادِمْ!٠٠
قلتلُّلو : خَلَصْ إللِّي بدَّكْ إيَّاهْ رحْ يصِيرْ٠٠ ومِنْ اليوم ورايحْ رَحْ تكون صَفْحاتْ الفيس ، بَسْ للصَداقَة والمحبِّة ونشرِ البَسْمِة وأفكارِ التَّسامُحْ والتَّعارُفْ والسَّلام!٠٠٠
قالِّلي : قولْ إنْ شاء الله !، وأنَا هايْ آخِرْ مرَّة أحْكِي معاكُمْ بِـ هَالخُصُوصْ٠٠٠
سَلَّمنا ، أنا و''مارك'' ، عَ بَعَضْ و بعْدِينْ حِمِلْ حَالُو ومِشِي!٠٠٠
وهاظَا - يا جمَاعِةْ الخِيرْ - اللِّي صَارْ بينَاتْنا وما زِدِتْ ولا نقَّصِتْ عَليه بِأيْ حَرفْ مِن كَلامْنَا أبَداً أبدَاً ، وطبعاً فِشْ حَاجِة أحلِفلكم ، لإنَّو مَافِي بالعادِة إلا إنِّي أكذِبْ عَليكُو!!!٠٠٠٠ومشان هيك الله يخلِّيكوا لا تفشْلوني ولا تسوِّدُولي وجهي قدَّامُو ، ومِشْ كُلْ مَرَّة بتسلَمْ الجرَّة!٠٠
---------------------
ملاحظَةْ : رحْ أنشُرْ ، في وقت لاحق ، الموضُوعْ ، إللي كُنتْ أنا كاتبُه وما نَشَرتُه واللِّي كان السَّببْ فِي زَعَلْ ''مارك'' منِّي ومِنْكو!٠٠
وملاحظَةْ تَانيِة : ( بَسْ هَايْ ، خَلُّوهَا ، بينِي وبينْكُو ، وإسْتِحْيَاطاً ، الله يِلْعنْ كُلْ فسَّادْ بينَاتْنَا ) ، بصَراحَة أنَا مَا شُفِتْ حَدَا راسُو أيبَسْ مِنْ راسْ ''مارك''٠٠٠ أيْ واللهِ ، إنِّي مَا صَدَّقتّ كيفْ أخْلَصْ، مِنُّو ومنِيحْ اللِّي عَدَّتْ الحْكَايِةْ علَى خيرْ!٠٠

محمد طرزان العيق
14.08.2016

[خالداحمدمحمود]

خالص الشكر والتقدير
لترجمتكم ماقاله السيد/ مارك
وإلا ماكنت حفهم منو شىء .........

دمت بخير.
تقديرى

[محمد طرزان العيق]

المشاركة الأصلية كتبت بواسطة خالداحمدمحمود

خالص الشكر والتقدير
لترجمتكم ماقاله السيد/ مارك
وإلا ماكنت حفهم منو شىء .........

دمت بخير.
تقديرى

ولكم جزيل الشكر على حسن المتابعة
مع صادق تحياتي