وينْ كنَّا و وينْ صُرنَا - ۩ أكاديمية الفينيق ۩



لِنَعْكِسَ بّياضَنا


« تَحْــليقٌ حَيٌّ وَمُثـــابِر »
         :: طيور في عين العاصفة* (آخر رد :عبدالرحيم التدلاوي)       :: الأصمّ/ إيمان سالم (آخر رد :إيمان سالم)       :: حلم قصير وشائِك (آخر رد :أحلام المصري)       :: ،، نهرُ الأحلام ،، (آخر رد :أحلام المصري)       :: جبلة (آخر رد :أحلام المصري)       :: إخــفاق (آخر رد :أحلام المصري)       :: ثلاثون فجرا 1445ه‍ 🌤🏜 (آخر رد :راحيل الأيسر)       :: الا يا غزّ اشتاقك (آخر رد :ممدوح أسامة)       :: الأزهر يتحدث :: شعر :: صبري الصبري (آخر رد :ممدوح أسامة)       :: صَمَتَ الليل؟ (آخر رد :ممدوح أسامة)       :: الادب والمجتمع (آخر رد :ممدوح أسامة)       :: مقدّّس يكنس المدّنس (آخر رد :ممدوح أسامة)       :: تعـديل (آخر رد :الفرحان بوعزة)       :: رفيف (آخر رد :عدنان عبد النبي البلداوي)       :: الزمن الأخير (آخر رد :حسين محسن الياس)      


العودة   ۩ أكاديمية الفينيق ۩ > ▆ أنا الفينيقُ أولدُ من رَمَادِ.. وفي الْمَلَكُوتِ غِريدٌ وَشَادِ .."عبدالرشيد غربال" ▆ > ⊱ السّـــــــــــــاخِر ⊰

⊱ السّـــــــــــــاخِر ⊰ الجد الباطن حين يكون خريج دفعة الظاهر الساخر ...

إضافة رد
 
أدوات الموضوع انواع عرض الموضوع
قديم 02-02-2018, 03:34 AM رقم المشاركة : 1
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي وينْ كنَّا و وينْ صُرنَا

وينْ كنَّا و وينْ صُرنَا
******************
الحِمِدْ لله ولا لسِواهْ فموجة السَّكْعة كِنْها كَرَّرتْ تزيح عن ظهورنا وهيَّاتها الشمِس تشجَّعتْ وطلَّت علينا بأشِعتها الدافية / بعد ماكانت ، خفَا الله / متخبيِّة في وكِرْها ، اللي بعرفِش وين من الكَروزِة وندِفْ التلِجْ ، إللي كان نازل علينا ''كبِّ من الرَّبْ'' ودرجات الحرارة كانت، في المتوسط ، ما تزيد عن العشر درجات تحتِ الصفر وأما في ساعات الليل والفجريّة كانت تنزل ،الله وكيلكو لَـ حد ال25 درجة تحت الصفر ، فلا كانْ /بهاي الأوكات/ ديكْ يكَاكِي ولا حتّى طنطوري إلو نِفِسْ يحْكي٠٠٠مين هاظا الكَبَظاي وأخو أختو ، اللي بيكدَرْ يوَرْجي خُشمُو برَّاتْ الدَّار!٠٠٠أغلب النَّاس العَاكْلِة و وإللي ما عندهاش شغل ظروري عملَت ''بَيَاتْ شتوي''، بس كمانْ في ناسْ بتِكْدرِشْ تظَلْ لابْدِة في ديَارْها ،لإنو -خفا الله- في بِـ خورانْها دُودْ٠٠خلَصْ بتِكْدرِشْ ، والله حتَّى ولو ربطوهَا ، بألف مَرَسِة٠٠٠ يعني وبفضل من ربِّ العالمين ورحمته ، راحت موجة الصقيعْ وحلَّت أخيراً عن ظهورنا وهسَّا الدنيا ويا مَحْلاها ٠٠٠ درجات الحرارة يعني بتتراوح مابين درجة فوك الصفر وخمس درجات تحت الصفر ، يعني زي ما بيكولوا نعمة كريم !٠٠٠يِي يِي ، وينْ كنَّا و وينْ صُرنَا ، بس بيني وبينكو التلج بعدو ما ذاب ، خاصَّة في الحارات والشوارع الزغيرة ، الله وكيلكم والنَّبي شفيعكم الأرظ بعدها مكزِّزة والواحد فينا ماشي على الكزاز٠٠طبعاً بدُّو وَكِتْ حتى يذوب والشمس بعِدْها خايفة ومستحيِّة٠٠٠
بتعرفوا ، يا جماعة الخير ذكّرني التلج المجمَّد بالشوارع بـ ''ألواح البوظ'' إللي كانوا أجدادنا يستخدموها مشان تبريد السمك وأكواز الصبَّارة(يابييه ما أزكاها وهي باردة) ، حتى بتذكر إمي /الله يرحمها ويرحم أمواتكم/ كانت تعطيني فرنكين مشان أروح أشتري نُص لوح بوظ مشان نبرِّد ميّة الشرب واللبن والعصير ، مهو -سلامة فهمكو- بهاذيك الأيام لا كان في بالبيوت برَّادات ولا غسّالات ولا شْحَار البين٠٠٠٠ أي أصلاً ما كانت الكهربا واصلِة لأغلب البيوت٠٠٠ما علينا ،الله يرحم أيام زمان ، كانت عنجَدْ صعبة ، بس واللهِ كانت هَنِيِّة!٠٠
ومنِرجَع لهون في صوفيا ومتل ما كُلتْ إلكو الجو تحسَّن ، بس الأرض بعدها زُحْليقة زي باحات التزلج والركِص ع الجليد٠٠٠ أنا منِّي وعليِّ ما كنت من جماعة ''البيات الشتوي'' وأنا - ويا خوفي من كلمة أنا - كنِتْ من أنصار شعار ''في الحركة برَكِة'' وما حدا بيغْدَر يخلينِي أبْكَى في البيت ولو إنْطَبْكَتْ السما ع الأرِظْ!٠٠٠ وبدِّيش أخبِّي عليكو [ مهو إحنا صرنا أهليّة بمحليِّة وزي ما كالوا ، صرنا ''خوشْ بوشْ''] ، وبعرِفْ ومتأَكِّدْ إنكو ما بتِفشوا سِرّْ ; تزحلكِتْ كذا مرَّة في كذا شارع ، ولكن كل محاولاتي بالوكُوعْ على الأرظْ باءتْ بالفشل الذريع ،مش لإنِّي منتبه ع حالي ولا لأنّي واثقُ الخطوةِ يمشي مَلَكاً ، ولكن هذا يعود إلى لطف الله وتخفيف قدره وكذلك يعود إلى رظَا الوالدين!٠٠٠
وفي شغلة تانية هون بهاي البلاد ، إنو الماشي في شوارعها بيكون معرِّض نفسو لخطرين ; الأول الوقوع ع الأرظ نتيجة الزحلقة وتكون نتيجتها كسور ورضوض والذي منُّو ، ويمكن تنتهي برعبِة فقط !٠٠٠إلخ ، والثاني وهو الأخطر وخصوصاً للماشيين، زي الناس الأوادم، عَ الأرصفة وهاظا الخطر ناتج عن سقوط كُتلْ جليدية كبيرة (بفعل الذوبان) من أسقف البنايات ، وإللي إزا وقعت ع راس شي حدا ، ممكن إنُّو ما يُعطٌسْ بَعِدْها٠٠٠وهاي عنجد هي إحدى مشاكل العاصمة في فصل الشتاء وكثيراً ما تلجأ البلديات والأهالي من سكَّان العمارات بوضع شرائط ملوَّنة على الأرصفة لكي تحذِّرْ الناس من خطر المَشي على الرصيف ، وهاي سبحان الله ، ذكَّرتني بظاهرة منع السير على بعض الأرصفة في بلادنا العزيزة ، ولكنْ ليس نتيجة خطر سقوط أشياء من أعالي البنايات وإنَّما نتيجة خطر تعرضك لشتائم وأحياناً حتَّى لرصاص الحراس والمرافَقَة {وإنتِ وحَظَّك} ، حيث يسكن في هذه العمارات بعض شخصيات الدولة وبعض حماة الوطن من ذوي الرُتَب والمناصب والمكاسب العليا٠٠٠مرَّة تانية ما علينا!٠٠
أنا هون في صوفيا أفضل إنو أمشي بنُصِّ الشارع وتدعسني ، لا سمح الله شي سيارة ، ولا إنُّو أموت من شقفِة تلج نازلة زي الصاروخ من سطح البناية على راسي ، وموتة عن موتة بتفرِقْ ٠٠٠ ونصيحة لإخواني اللي عايشين هون في البلد; لا تغُرْكوا الشَّمس وتظحَك عليكو ; الجو بعده سَكْعَة ، إلبسوا أواعي مليح وتنسوش تِلِبسوا ''أبو علي'' تحت البنطلون٠٠٠إدرَعْ يا خيَّا السَّاكا الثكِيلة ، وتلفَّعْ باللَّفحَة وفٌوكْهِنْ الكُوفيِّة ، إلبس بإجريك جوز-جوزين كَلسَاتْ ، وتنساش المِصْبَعنِيَّات!٠٠تمشيش ع الرصيف!٠٠٠ وإمشي بنص الشارع وإطلَّعْ منيح ع محل دعستَك٠٠٠ وإتِّكل عَ الله ، وما حَدا بيموت ناكِص عُمُر، والله يحسن ختامنا أجمعين ٠


-------------------
هوامش :
سَكْعَة ; برد وهي من كلمة الصقيع٠
كَرُوزِة ; البرد الشديد٠
الخوران ; كلمة خاصة بالطناطرة ولذا أخذِت راحتي بكتابتها ويُفهَم معناها من سياق الكلام٠
المَرَسِة ; الحبل وبشكل خاص للخيل وتعادل الرسن في أحد معانيها
مكزِّزة ; من الكزاز أي القزاز يعني الزجاج
أبْكَى ; أبقى
إدرَعْ ; يعني إلبِسْ
أبو علي ; سروال داخلي طويل من الصوف أو القطن (متل الفيزون بل مؤاخذة)
الَّلفحة أو اللَْحشة ; هي الشال وأنا عندي لفحتين من شُغُل خواتي ، الله يطوِّل في عُمرهنْ٠
المصبعنيات ; الكفوف يعني القفازات
الكلسات ; الجرابات
السَّاكا أو السَّاكة ; هي الجكيت الثقيل

محمد طرزان العيق
02.02.2017






  رد مع اقتباس
/
قديم 02-02-2018, 01:40 PM رقم المشاركة : 2
معلومات العضو
زياد السعودي
الإدارة العليا
مدير عام دار العنقاء للنشر والتوزيع
رئيس التجمع العربي للأدب والإبداع
عضو اتحاد الكتاب العرب
عضو رابطة الكتاب الاردنيين
عضو الهيئة التاسيسية للمنظمة العربية للاعلام الثقافي الالكتروني
الاردن

الصورة الرمزية زياد السعودي

افتراضي رد: وينْ كنَّا و وينْ صُرنَا

محكية دافية هوﻻ هوﻻ
رغم السكعة
كل الود






  رد مع اقتباس
/
قديم 02-02-2018, 01:55 PM رقم المشاركة : 3
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي رد: وينْ كنَّا و وينْ صُرنَا

اقتباس:
المشاركة الأصلية كتبت بواسطة زياد السعودي مشاهدة المشاركة
محكية دافية هوﻻ هوﻻ
رغم السكعة
كل الود
تحياتي مقرونة بكل التقدير والمحبّة ....يسعدني مروركم الكريم وتعليقاتكم الدافئة






  رد مع اقتباس
/
قديم 03-02-2018, 10:30 AM رقم المشاركة : 4
معلومات العضو
هيام صبحي نجار
عضو أكاديميّة الفينيق
تحمل وسام الأكاديمية للإبداع والعطاء
فلسطين

الصورة الرمزية هيام صبحي نجار

إحصائية العضو







آخر مواضيعي

هيام صبحي نجار غير متواجد حالياً


افتراضي رد: وينْ كنَّا و وينْ صُرنَا

كل شي تمام التمام في بلاد الجليد
حتى الأفكار بتتجمد
والشوارب بتصير واقفة متل المسمار
أخذنا بنصائحك
بس شي واحد بحب ذكرك فيه
انه ترش الملح عباب الدار.
تحياتي من شلالات نيغارا
.






نعبُّ الكأسَ من ألقِ المعاني ... وتَعْبَقُ في مناحينا الأماني
ربوعُ الشعْرِ منتَجَعُ الأماني.... بحورُ الشعرِ يا أحلى المواني
  رد مع اقتباس
/
قديم 03-02-2018, 03:36 PM رقم المشاركة : 5
معلومات العضو
محمد طرزان العيق
عضو أكاديميّة الفينيق

الصورة الرمزية محمد طرزان العيق

افتراضي رد: وينْ كنَّا و وينْ صُرنَا

اقتباس:
المشاركة الأصلية كتبت بواسطة هيام صبحي نجار مشاهدة المشاركة
كل شي تمام التمام في بلاد الجليد
حتى الأفكار بتتجمد
والشوارب بتصير واقفة متل المسمار
أخذنا بنصائحك
بس شي واحد بحب ذكرك فيه
انه ترش الملح عباب الدار.
تحياتي من شلالات نيغارا
.
بارك الله فيكم
نصيحتكم في محلها
كل الاحترام والتقدير مع الشكر الجزيل على مروركم الكريم
بالمناسبة البلدية تقوم بواجبها على أكمل وجه وتتوفر الملح في كل المحطات وفي الطرق






  رد مع اقتباس
/
قديم 04-02-2018, 04:51 AM رقم المشاركة : 6
معلومات العضو
نوال البردويل
عضو أكاديمية الفينيق
عضو تجمع أدب الرسالة
فائزة بالمركز الثالث
مسابقة القصة القصيرة2018
عنقاء العام 2016
تحمل وسام الأكاديمية للابداع والعطاء
عضو لجنة تحكيم مسابقات الأكاديمية
فلسطين

الصورة الرمزية نوال البردويل

افتراضي رد: وينْ كنَّا و وينْ صُرنَا

الله يعينكم على هالسكعة والكرزة
وقال احنا بنشكي وبنبكي من سكعتنا
وأتارينا في نعمة والحمد لله على النعمة
بيكفي إنه مرتاحين من زحلقة الشوارع والكتل
الثلجية من الأسطح
تحياتي وانتبهوا على حالكم






  رد مع اقتباس
/
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة نصوص جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة

الانتقال السريع


الساعة الآن 03:49 PM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لأكاديمية الفينيق للأدب العربي
يرجى الإشارة إلى الأكاديمية في حالة النقل
الآراء المنشورة في الموقع لا تعبر بالضرورة عن رأي الإدارة بل تمثل وجهة نظر كاتبها فقط