|
|||||||
| ⊱ تجليات ســــــــــــردية ⊰ عوالم مدهشة قد ندخلها من خلال رواية ، متتالية قصصية مسرحية او مقامة |
 |
|
|
أدوات الموضوع | انواع عرض الموضوع |
05-05-2014, 10:37 PM
|
رقم المشاركة : 1 | |||||||
|
مسرحيـة رُوميـُو وَ جولييت / زجلا
مسرحيـة رُوميـُو وَ جولييت للكاتب الإنجليزي ويليم شكسبير تم تحويرها زجلا قصصيا وإسناد الحديث فيها إلى راو وأفراد من عائلات مغربية عُمَـر و حليمَة وخطابها من النثر إلى الزجل بقلم الشاعر الزجال المغربي : بنعيسى الحاجي 12/2012 |
|||||||
|
|
09-05-2014, 08:03 PM
|
رقم المشاركة : 2 | |||||||||
|
رد: مسرحيـة رُوميـُو وَ جولييت / زجلا
اقتباس:
مساء الخير الاخ بنعيسى فين هي المسرحية؟.. ما كاين والو هنا في الصفحة؟؟؟
|
|||||||||
|
|
|
09-05-2014, 08:41 PM
|
رقم المشاركة : 3 | |||||||
|
رد: مسرحيـة رُوميـُو وَ جولييت / زجلا
مسرحيـة رُوميـُو وَ جولييت للكاتب الإنجليزي ويليم شكسبير تم تحويرها زجلا قصصيا وإسناد الحديث فيها إلى راو وأفراد من عائلات مغربية عُمَـر و حليمَة وخطابها من النثر إلى الزجل بقلم الشاعر الزجال المغربي : بنعيسى الحاجي 12/2012 تمهـيــــــــد القصة تدور حول صراع بين عائلتين من سكان دوار الخير بالمغرب . عائلة " سليمان" الغنـي ، وعائلة " العياشي" الفقير ..وهذا الصراع ناتج في حد ذاته عن تأثير النظرة الدونية إلى الآخر حسب مستواه الاجتماعي ماديا ومعنويا . عُمر ولد العياشي كانت مهنته راعي الغنم عند سليمان الفلاح .ذات يوم راودته فكرة طلب مهمة فلاحية من سليمان الفلاح مقابل حصوله على خُمس المحصول الزراعي في السنة وبعد موافقة سليمان،كثف عُمر جهوده بعناية كاملة أعطت أكلها فكان المحصول الزراعي موفقا، مما خوّل عمر أن يجني منه نصيبا مربحا أحاله على تميز مادي واجتماعي ،وذلك ما أحرج سليمان ودفعه إلى تغيير تعامله مع عمر مما نشب عنه خصام كبر حجمه وشمل كل أفراد العائلتين .خلال هذا الصراع يخرج من صلب العائلتين عاشقان: عُمر من عائلة العياشي وحليمة من عائلة سليمان .غير أن الراوي يخبرنا بأن العاشقين يقادان إلى مصيرهما المحتوم وهو الموت بسبب هذا الصراع . طبعا للتفاعل مع مضمون هذه القصة دور إرادي، تأتى ذلك بعد قراءة متأنية كانت محط اهتمام برغبة تحوير نصها من جنس المسرحية إلى جنس القصة وخطابها من النثر إلى الزجل .فهي بناء على هذا " قصة زجلية " أو " زجل قصصي" مع ما يقتضيه ذلك التحوير من إسناد الحديث فيها إلى راوٍ وأفراد من عائلات مغربية وتكييـف أحداثهــا والعـادات والتقاليد المتداولة محليا وتوظيـف الكلمات المناسبة والأسماء المطابقة للواقع المغربي المعيش، بخصوصياته الاجتماعية والثقافية . .................. تمهيـد بلسان دارج هاذ القصة كتحكي لينا على انه كان ف قديم الزمان زوج عائلات تيسكنوا ف دوار الخير بالمغرب . وقع بيناتهم خصام سبابو قلة لعقل والأنانية الساكنة ف قلوب بعض الناس اللي تيبغيوا ريوسهم اكثر من لقياس وتيظنوا باللي هما خير من جميع الناس ، هما لمرفحين هـما لمبرعيـن الواكليـن الشاربيـن وُهما العارفيـن ، موالين الشان والهمة وما فوق كلامهم كـلام وبنـادم اللي عايـش على قـد الحـال عندهـم محـﯖور وكيبـان لهم ضعيف وقيمتو ما ساوياش يلا لبس وسطهم ويلو ويلا بقى عريان فضيحة .. ومرحبا بكم يا لخوان تبْعوا معايا هاذ القصة كيف حكاها الراوي وبيَن لينا فيها علاش وكيفاش حتى وقع لخصام بين ذوك العائلات ؟ .عمر ولد العياشي كان سارح لغنم عند سليمان الفلاح ، فيها متهلي تيسرح ويروح بيدو تيحلب ، يْولـّد ويداوي ويربّي الخرفان ، وكان واكل شارب عندو ما خصو خير معه تيضربوا به المثل أهل الدوّار . مشات أيام وجات أيام زاد الله ف المدد وكثر الخير ، سليمان قرّا لولاد وكل واحد فين دّاتو لقمة العيش وُبقى سليمان ف الدوار . عُمَر السّارح تباركه الله كبر ولى عزري مع لمتارف بـدا يتجمع وما خفاكم حال لكلام فيه وفيه كلمة تخوي وكلمة تعمّر، ودماغ بنادم سبحان الله دغيا كيتقلب وراسو تيدور وكيف ﯖالوا زمان : الراس اللي ما يدور كديَة . واحد النهار ف لمسرح عُمَر ظل تيخمّم وكيف العـادة روّح لغنم للزريبة دخلها بعد ما ورّد وتـبّـن ، شويَة وهو يزعم وعلى سليمان الفـلاح نهـم ، ﯖالـّو : آعمّي سليمان ، شحال هذي ونا عندك سارح لغنم ومقابلها مزيان وكيف كتشـوف فيا أنا كبرت ومعك بغيت نوَلي خمّاس وبالفلاحة نتكلف ، نحرث ونزرع وف وقت لحصاد لا تخمّم ندير تباندة ومنجل ومع الحصّادة نشد الصـف ونطلب الله يكمل بالخير، ندير خيمتي حتى أنا وبحال ﯖراني نتزوج ، سليمان ما خسّر لو نظر وافق وضرب لو ع لكتف . عُمَر الخمّاس دار اكثر من جهدو ف خدمة لأرض دراع وﯖـدم واللي تيخدم بالنية عمْرُو ما يندم ، ف ذاك العام جات الصابة كيف راد الخاطر وبغا ، باع وشرى وشاط الخير زيان حالو وزال الهول عليه وبدا يشارك الناس هدرة وكلام ف لمجمع والعين بدات تشوف ليه ، سليمان الفلاح ما عجبو حال بعد ما كان يفتي ويآمر وف كل ملامة تيكون حاضر ، غادي يولي عمر الخماس يـﯖلس معَاه وهكذا بدا سليمان تابعو بحال الظل ومع من ما شافو تيضايقو وينصب عليه حتى شعلت نار لخصام وكثرت عوافيه، الصهد لحق بذوك العائلات وبقــاوا شد لي نقطع لك، وريحة لخصام بخـرت الدوار . وسبحان الله من وسط ذاك لخصام غاديا تبان لمحبة بين زوج أفراد متعاشقين من ذوك العائلات : عمر ولد العياشي ... وحليمة بنت سليمان .لكن الحاكي لينا هاذ القصة خبرنا باللي ذوك لمتعاشقين غيكون مصيرهم ف الأخير هو الموت بسبب ذاك لخصام .. وانا بصراحة عجبنـي مضمون هاذ القصـة بعد ما قريتهـا شحال من مرّة ودوّرت معانيها ف الرّاس ، خدات مني عقلي وشغلتني بلا قياس حتى ﯖال إحساسي لراسي : ايوا يلا عجباتك هاذ القصة وشغلاتك كيف ﯖلتي حاول تصرّفها مغربية وتنسبها لشي عائلات فشي منطقة من المناطق ف لعروبية ، ياك انت ﯖلتي زجال ايوا زوّل لها تشامير المسرحية ولبّسها فقطان القصة الزجلية غيَر لكلام ونظمو كيف هو رايج عند سكان ذيك البادية بالعادات والتقاليد اللي موالفينها من زمان كيف هيَ ... وحيث رْجَعت لذاتي يا لخوان لقيت القصّة تنظمت ف خيالي وبيدي تكتبت زجل وكنتمنى تعجبكم كيف عجبتني ،النص قسّمتو لعدة مشاهد رقم واحد بيه بديت والنهاية كانت هي ختـم لكــلام ... .............................. الفصل الأول عُـمَــر و حليمـة 1 2ـ سليمان الفلاح .. .. .. .. .. إيــوَا ﮔالوها ناس زمــان اللـي فيـك آهنيـة رُدّيه ليــا عنـداك يغـرّك الشيطـان وتعـلـّي صوتـك عليـــا غير البارح وانت بين المطرقة والسندان سارح عندي وبلا منـّة تربيتي بين يديـا كتسرح وتروح منك الرشـّاش والصبّان واليوم بخمسك ف الفدّان نفختي قرْفادتك عليـا /// ـــــــــ /// يتبع عُـمَــر و حليمـة 2 3ـ عُمرـ السارح ......... ـ آعمي "سليمــان" ... يـلا بغــاك الله لا تكلـّـف كـل شـي عنـدُو قـريـــب السمـا عالية بلا وقاقــف ما تّحلحـل مـا تريــــــب ويـلا عطـاك ما يخالــف الــرّزق حبلـُــو قـريـــب الحــوت تـشـدّو ب لحفانــي بـلا ﯕـصبـَـة بـلا سبيــــب /// ـــــــــ /// يتبع عـُمَــر و حليمـة 3 2ــ سليمان الفلاح : ـ ـ ـ ـ ـ ـ ـ ـ ـ هاك يلي ..‼ ... هـاك أوَا ... ‼ سمعي آودني الرعد بلا أوَان والشتا من غير فصلها كتصب عليا ضرُبْني يا خبزي بعصات الرّعيان وعَكِـّي آليَام من قلـّة جْداك ونفري فيَا حالكم آولدي مرﮔوم وشمَة بين الحجبان واللي رمَى حايكو عليا ما غطى رجْليا سوّل خيمتكم شحال هدي وحنا جيران خمّم يوا ف كلامي وتـْصَنـّت ليــا ما تعد جديك من الجديان.............. ............. حتى تفوت الليالي وحيان خُمسك ف لحصيدة خودُو وبعـّد عليـا /// ـــــــــ /// يتبع عُمَـــر و حليمـة 4 3 ـ عمرـ السارح : ......... آعمي "سليمان" ....... ناس زمان داروا لمزية شلا معاني فتلوا تساوى لكلام النيـة بالنية والحاجة مقضية وزواج ليلــة تدبيرُو عــــام وانـت ياعمي لا تخمّم وعلى الـدّنيــا لا تسـال بـاش ياتيـك ما تعرفـُو حكـم الله ليـه بــــــال والزمان ديما هو الزمــان يـــــلا عـطــاك بالقفــــا غير لا تكثر معاه ف غنان عليا وعليك شهادتو ما تخفا غشيم الدنيا ما ينال غاية مسَدي ايامو هدرَة وكلام الطريق طويلة ولبهيمة مشّاية واللابس من غير قدّو ما عليه سلام /// ـــــــــ /// يتبع عُمـــر و حليمـة 5 1ـ الراوي:......................... هاذ لخصام بالعناية تورْخو الزمان وسبّـب ف غرايب كثيـرة عائليـة حكاية حـار فيها بـال الإنسان بالعنعنة من حد لحد وصلت ليـا ﮔالوا كـان جنان قبالة جنـان بالمعنى هكـذا حكاوْا ليــا كـل جنان مقابلو ربّـاع فنـّان والربّاع ﮔالـوا يـدُو نقيـَـة تيلقـّم العـُود العيَان بالمزيان والنقلـة مْليحة أصيلية منها تغرسُوا زُوج عِيدَان التربة ف الأصل مغربية /// ـــــــــ /// يتبع عُمـــر و حليمـة 6 مسمِّي " بدوار الخيـر" ذاك لمكان ف جنانو كل ربّاع دايْـر مزيَـة بالعناية كبروا ذوك العِيـدَان وحب الغلة بين لوراق بان ليـا لايـق ف النظرة بذوق الإنسان كبـروا تباركه الله ولاوْ شجرات سـمية "سليمان" كانت لاولى عنوان والثانية بسمية "لعياشي" تعَرفت شجرة قبالة شجرة وكل شجرة ف جنان بالصدفة وْقع بيناتهم لغــوات السامع توﮔض والراوي كان فنـّـان غيَر كلامُو دغيَا وسرّب ع لبَاقي من أحداث /// ـــــــــ /// تابع عُمَـــر و حليمـة 7 هاذ لحكاية عاشوها ناس زمان خصام عرفوه زوج عائلات ف دوار"الخيـر" كانوا جيران وخبارهم ف لقبيلة تعَرْفـَت عُمَر الخمّاس .................. تخاصم هو وصاحبو سليمان وعشرة زمان بيناتهم فنــات لكن عُمَر ما نساش الولف اللي كـان ف خيمة سليمان عندو مع لولاد ولبنات /// ـــــــــ /// تابع عُمَـــر و حليمـة 8 لخصام حرّك حب ساكن قلبو من زمان وصروف الولف عاد تحَطـّو فوق الكفــّات صادق من قال العافية كتشعل تحت الدخّان وكثير شي إيلا كان الكانون فيه تبينـَة وعويدات عُمَر ولد العياشي وحليمة بنت سليمان والقدر محكوم بأجل وليه مسببات وكان الرّاوي متأسف ف حكيه زربان حيت لخصام غ يسبب لهم ف الممات /// ـــــــــ /// تابع الفصل الثاني عُمَـــر و حليمـة 9 شوقنا كبر ومازال راس الخيط ف لحكاية ما بان وبدا الرّاوي تيصَرّف لينا لكلام سوينتات "عُمَر" طاح ف غرام "رقيَة" بنت حديدان عشـّاق مـﻶل لحكاية به بـدات كان هلالي ولبيب تيـﯖول كلام مزيان صاحبو هو "جلول" من سنوات اللي كان قريب من شيخ الدوار يا لخوان بالصدفة خبار لامَة مخفية لعُمَر وصلات كيحييها قاسم خـُو"سليمان" كل عام من زمان وعرف باللي عشيقتو "رقية" من المعروضات حتى هو قرّر يحضر بأي وجه من الوجهان راجت ف خيالو شلا نواعر وحيلات وقت ما حل شي باب كيتسدوا لو بيبان ومع "جلول" و"بوسلام" المشكلة تحَلـّت /// ـــــــــ /// تابع عُمَـــر و حليمـة 10 حضر ف الڷامَة كيف راد ف أمن وأمان شاف بعينو ما عجب قلبو وكرّر الشوفات وما بقاتش "رقية" قدّام عينو كتبان شاف حليمة وْمَا لها بإشارات وهاذ الشوفة ما كانت لـُوش ف الحسبَان اللي بغاه لقاه ف "حليمة" كيف رادت نفسُو وتشهّات لكن القدر بالأجل حاكمُو الزمان الغيرة كتولد الكراهية والحقد ف جرّة لبنات "علال" ولد عم "حليمة" على عُمر قوّس الحجبان سمع صوتـُو عرفـُو تيمعني على حليمة بشي كلمات وبغى يتقاتل معه قتـال الشجعان عُمَر ولد العياشي ضيف عندنا ف البيت ولمقاتلة معه عيب ﮔالها قاسم خو سليمان أُو وَلـّى السيف لغمدو تـَمْ النِّيـت /// ـــــــــ /// تابع عُمـَــر و حليمـة 11 بدا الهيت غنا وشطيح وما بقاش بيناتهم غنان علال ﮔال لعُمَر ماخفتيش مجيك ينوّض لغوات وعائلتكم متخاصمة مع عائلة عمي سليمان؟ المهم ذيك الليلة الناس ف لفرحة سهرات اللي غلبو النعاس نعس واللي مشى كان عيان عُمَر مشى تيدق على حليمة ف شرجم البيت هدروا ودواوا وزواج السّر ﻹتفاق عليه كان لفقيه شهد، عُمَر خدا "حليمة" ولقبيلة تهنات وبقى الزواج سر بين لفقيه وذُوك زُوج ﮔران حكاية غريبة فيها حب مبشـّر بالممات زواج ما عرفو حد لا رجال ولا نسوان وظن لفقيه باللي هاذ الزواج غ يصالح العائلات /// ـــــــــ /// تابع عُمـــر و حليمـة 12 وعِش نهار تسمع خبار كيف سمعنا شاعت بكثرة باللي "حليمة" تخطبات بشي واحد قريب من شيخ قبيلتنا لاباس عليه وبخير من لغنم عندو قطعات مولوع بالفلاحة مرضي وحالتو زينة بسعدها اللي خداتو هي لالة لبنات بلا شقا تبقى ف خيمتها حاجبة مخزونة وحتى "حليمة" بنفسها تفاجآت كيف تعمل وهي بزواج عُمَر مرهونة قصدَت لفقيه تعلمو، ب لخبار اللي جات يساعدها تخرج من هاذ الورطة الملعونة آش المعمول هي وعُمَر قاتلين الغرزات /// ـــــــــ /// تابع عُمـــر و حليمـة 13 أيـام مشات وأيـام جـات وحقد الغيرة مازال ساكن "لعَلال" ف القلب تيقلـّب على عُمَر يفدي فيه اللي فات وبلا ميعاد لقاه مربّع مع زوج صحاب حالـف بحلوفو يتقاتل معه بلا ما يحنت عُمر منو تهرّب حيث صبحوا بزوج نساب وعلال ما عارفش باللي هما متزوجين بالسكات الزواج بقى سر على جميع لحباب ولصحاب العارفين ربْعـَة لفقيه وعُمَر،حليمة وطامو بنت الهيات وهاذ السر ف الزواج حتى هو كان ف لخصام سباب /// ـــــــــ /// تابع عُمـــر و حليمـة 14 تقلـّق ف خاطرُو جلول بـزّاف حيث شاف علال تهدّد على عُمَر بلا قياس وظن باللي عُمَر دهـَش ٷ منـُو خـاف وقرّر هو يتقاتل مع علال بكثرة طلوع الدّم للرّاس لكن علال قتل جلول وشحال صعيبة ضربة الخوَاف موت جلول وقفت التقشاب اللي كان يمتـّع به الناس جابت غيوم لغيار ونشرتها كيف هي هرب علال القاتل وخلى عُمَر غضبان تيحلف يفدي الثار لجلول عاد تبرَد لـُو الكيَة والقدَر بأجلو هكذا زمّم الرحمان رجع علال بعد ما كان هربان لوطية لفرايجية بالشوفة عُمَر توَترُو عصابو فقد صوابو بحال السّكران ثار ف وجه علال وضربو ضربة قاضية وحيث عرفو مات هجر الدوار ومشى هربان /// ـــــــــ /// تابع عُمَـــر و حليمـة 15 شيخ الدوار تمنى لذوك لمتخاصمين الموت من صداعهم يرتاحوا السكان والجيران يخويوْ هاذ الدنيا الموت خير لهم من الحياة دوار"الخير" هاني ما مهوسينو غير ذوك العديان وحيث سمع خبار عُمَر قتل علال علم السلطات تقرّر النفي عوض القتل ف ذاك الزمان به حكم الشـرع وبغاتو گـاع الجيهات عُمَر يخوي لبلاد ما يبقاش ف الدوار يبان "حليمة" ساقت لخبـار وعلى فراقو شحال بكـات ف واحد الليلة جا عُمَر مخفي ولفقيه خبرو باللي كان /// ـــــــــ /// تابع عُمَـــر و حليمـة 16 وف هذاك الليل ما زهّد لعندها ف مشـي من فوق الزّرْبْ نقـّزْ تنقيزة مليحة وبزايد رهبة شد لرض جبد المطوي وبدا يكمي كـْمى وعرف آش تمّا ودرّح لمجاج بتنفيحة ف الباب على حليمة دق وبمعريفتو تَيوْمِي حسّي مسّي جاوباتو ردت عليه بكلمات شحيحة شكون انت ياللي نطـق فمّـك باسمي و جايني ف الليل بخطوات صحيحة فيقتــي نعاسـي وشوكتـي لحمـــي ما خفتيش مجيـك ينـوّض عليا لفضيحة ؟ /// ـــــــــ /// تابع عُمَـــر و حليمـة 17 3ـ عمر : ـ ـ ـ ـ ـ ـ ـ ـ ـ ـ اسمي ما طاق يذكرو فمّـِي حروفـو لسمعك ما عادت مليحـة كنــت وباقـي نوفـي بكلامـي وحب الولف فيك شميتو ريحـة كيف نْساك وانتِ المالكة عقلي واحلامي أنا عمر... لفقيه گالي عليك خبار صحيحة لا تهولني بكلام أنا بغيت نشوفك قدامي هديرك ريح قلبي ومجيك زادُو تمريحة /// ـــــــــ /// تابع عُمَـــر و حليمـة 18 وبقى معاها حتى بدا ضو لفجر يبان بغا يخرج منين دخل لكن هيهات شي قوانع بالتهرنين خلعوه وخاف يبان بدا يفكـّر غير كيف يدير من هاذ الحصلة يفلت وذوك لقوانع سبحان الله عاسّين عليه مزيان وقت ما قرقب الباب تيوقفوا لـُو قدّام باب البيت فاق سليمان كحب وحنحن ودوَر عينيه ف لمكان مادّا ما جاب تبعوه لكلاب بعدوا على ذاك البيت ف جنب الزّرب كرمة عليها نقـّز عمر ومشا هربان حزنوا عليه حبابو وامّـُو على فراقو ما صبرت الرّاوي حتى هو بكثرة ذكـر لموات كان غضبان مرّة يسرّب ف تعاويد لحكاية وشي مرّة تيسكت /// ـــــــــ /// تابع الفصل الثالث عُمـَــر و حليمـة 19 ولحكاية كتبقى حكاية تصورها ف خيالو وليم شيكسبير لخيـال حبلو للأقـدار غايــة قريب غير ما كيتوقعهاش الإنسـان وهذا هو حـال الدنيـا شي طالع وشي هواد لقاع البيـر عائلة الطيب ناويين الزواج بالنية بعرس "حليمة" جاوا يخبروا سليمان يجهّـز لبنتـو دغـيـا ويدعــي لهــم بالتيسيـر الطيب مقـوّم ورَاض بالقسميَة وعلى لعـرْس كـان زربان /// ـــــــــ /// تابع عُمـَــر و حليمـة 20 باش حليمة تخبر عُمَر باللي جرى وكان كـن لقات تفرفر ولعندو تطير يعجّل بمجيه ويكون زربان حيث ف البَادِيَة تيرجع القرار وكيف العادة للأب هو مول الشان شي حد ف الخيمة ما يقدر وما ليه طاقة كيف ما كان يعارضو ويفتي عليه شي أمر لا كلام فوق كلامو هو وحدو مول التسيير ليه الكلمة هو الرئيس وهو الربّان /// ـــــــــ /// تابع عُمـــر و حليمـة 21 حليمة ماعرفت باش تـّبْلات واش يمكن لها ف هاذ الحزّة تديـر ضاقت بها لحوال وعلى آش تعمل تلفات وقصدت لفقيه يلا يكون رأيو فيه التيسير وبلا ما تعطل كابرت ومشات عزمت وخدات القـرار من باب الجامع بيدها عليه شيرت جا لفقيه ف جلابتو كيعتر غير شاف حليمة عرف خبار البيت واش هاذ المجية گاليها الله يستر ؟ /// ـــــــــ /// تابع عُمـــر و حليمـة 22 حليمة :.................... ـ رحمنـي آسيـد لفقيـه شي عقل أنا ما بقى لي الغرض اللي جيت ليه قضيه لي نمشي بحالي وعجّل بوقتي طويـه الهدرة لاصقة في جلالي والسر اللي بينا حضيه ف لمثلى خليك عالي وصيفط لعُمَر ﯖول ليه يجي عندي يشوف حالي رَانايَ ليه ما لغيرُو فطين ولسانـُو هـلالي ف عنقي مثلـُو اللي نديرُو وفاهم ف المعنى بحالي /// ـــــــــ /// تابع عُمَـــر و حليمـة 23 وما خفاش عليكم لفقيه كل مسالة دايـر لها تدبير وگاع الخطط ما تخفاش عليه حافظ لمسارب وفيها معمّق النظر عطاها دْوَا ٷ ورّاها كيف تدير ليه ليلة العرس تشربو يْنَعّسْها بلا تأخير يضنّوها ماتت وذاك العرس تلغيه ف الروضة يدفنوها وما يبقى اسمها يتذكر ورسل لعُمَر مرسُول ذيك الخطة يبلغها ليه من الروضة يخطفها ف الليل ولا حد به يشعر /// ـــــــــ /// تابع عُمـَــر و حليمـة 24 باش من زواج الطيب تفلت وتكون من نصيب عُمر لكن المرسول الطريق به خانت وما وصّلش ليه ف الحين لخبــار وحيث موت حليمة عند الناس تسمعت وعرفها لكبيـر ف لقبيلة والصغيـر عاد عُمَر عرف باللي حليمة ماتت وبدا يتحَك ويتـّفرك حيث ما وصلتوش لخبار /// ـــــــــ /// تابع عُمـَــر و حليمـة 25 وبكثرة حبو ليها بغى ينتحر ويموت قلـّب على السّم وشراه بثمن كبير جا للروضة وقلب ع لقبر ف كل قنت وبدا يحل عليها جدبان بحال المجنون شاف وْجَهّا ناير ما تاقش بالموت ظنها حيَة ب لفرحة كان غادي يطير ما عرفش باللي الخطة ليه ما وصلت والمرسول هو اللي كان سباب و به خان وذيك الخطة بينها وبين لفقيه ترسمت وهي غير شوية وتفيق وتأثير الدوا غادي يطير لكن الجاية ف الطريق لشي واحد ما علمت وكيف يدير يعرف ولى يديرها ف الحسبان /// ـــــــــ /// تابع عُمـَــر و حليمـة 26 جا الطيب يشوف حليمة لقى عُمَر حداها گالس تفاجأ وحار وحيث لعداوة بيناتهم قديمة ظنـّو بغى يفدي فيها الثار وبداوا ف لقتال بلا ما يعرفوا آش تما عندي عندك الطيب مات قتلو عُمَر عمر شاف الطيب مات ف جنب حليمة وف موت علال حتى هو بدا يفكـر قدر الله ما يحصرو تفكير ولا تخميمة معروف من عائلة العديان واش غينتظر تسامح من دايتو لراسو مع حليمة شرب السّم وموتو حداها عليه كان مقدّر /// ـــــــــ /// تابع عُمـَــر و حليمـة 27 خلق الله النفس وعْطاها أجل وقدَر تطلع وتهبط كيف بغات ف ذات الإنسان وفاقت حليمة لقات ف شمال جنبها عُمَر ململاتو لقاتو مات وحتى الطيب ف جنبها ع ليمان وهي مازالت كتأمل فاش جرى وسار عرفت راسها فين وخطة لفقيه أثرت فيها مزيان اللي وقع ندمت عليه وعلاش خدات ذاك القرار وبدات تفكر بعد ما ضيعت باش كان مواعدها الزمان سمعَت هدير للروضة قريب وقتلت راسها بلا تأخير حيث وصلوا أهـل الدوار لقاوا اللي ما كان ف الحسبان /// ـــــــــ /// تابع عُمـَــر و حليمـة 28 كل شي مات الطيَب وحليمة وعُمَـر وعاد جا لفقيه بدا يعاود ليهم على اللي كان العياشي عانق سليمان ولخصام اللي كان رجع لهم بالخير رجْعوا حليمة ف قبرها كيف كان ودفنوا ف جبنها ولد العياشي عُمَــر والطيب دفنوه ف جنب عُمَر وانتهى لخصام اللي كان سليمان بنى قبر ولد العياشي عُمَـر والعياشي بنى قبر حليمة بنت سليمان نعـّاوهـم مجموعين وعرضوا على اهل الـدّوار بلا عداوة ما تكون لمحبة وهاذ الشي باش حكم الزمان النهايــــــــــــــة |
|||||||
|
|
|
09-05-2014, 08:47 PM
|
رقم المشاركة : 4 | ||||||||
|
رد: مسرحيـة رُوميـُو وَ جولييت / زجلا
اقتباس:
شكرا لك لاله فاطمة الزهراء العلوي
على اهتمامك الفني بما أشارك به من محاولات شعرية في هذا المنتدى الجميل تحياتي لك والاحترام |
||||||||
|
|
|
09-05-2014, 09:59 PM
|
رقم المشاركة : 5 | ||||||||
|
رد: مسرحيـة رُوميـُو وَ جولييت . زجلا
دابة عاد بان النص
والعفو خويا كنمر على كاع النصوص لانها من رحم الوجع وكل النصوص تستحق ان تقرأ همسة: وليتك تشارك الاحبة رغيف البوح تقديري
|
||||||||
|
|
|
10-05-2014, 05:14 PM
|
رقم المشاركة : 6 | |||||||
|
رد: مسرحيـة رُوميـُو وَ جولييت . زجلا
شكرا لك لاله فاطمة الزهراء العلوي ،
طبعا لاخوتي وأحبتي الرواد ومعهم متعة التواصل والتفاعل وتقاسم في طعم الحرف تحياتي الخالصة |
|||||||
|
|
|
|
|
|
|
العرض العادي
